އިންޑިއާގައި ދިރިއުޅެމުންދާ ފަގީރުންނާއި ހާލުގައި ޖެހިފައިވާ މީހުންނަށް އެހީވުމުގެ ގޮތުން ވަރލްޑް ބޭންކުން 1 ބިލިއަން ޑޮލަރު ދޭން ނިންމައިފި އެވެ.

ވަރލްޑް ބޭންކުން ނެރެފައިވާ ބަޔާނެއްގައި ބުނީ މި ފަންޑު ދެވެނީ ދެ ބުރަކަށް ބަހާލައިގެން ކަމަށެވެ. ފުރަތަމަ ބުރުގައި ފައިސާ ދޫކުރަނީ 2020 ގައެވެ. ދެވަނަ ބުރުގައި ފައިސާ ދޫކުރަނީ 2021 ގައެވެ. 2020 ގައި 750 މިލިއަން ދިނުމަށް ހަމަޖެހިފައިވާއިރު ބާކީ 250 ޑޮލަރު ދޫކުރަނީ 2021 ގައެވެ.

އިންޑިއާގައި ހާލުގައި ޖެހިފައިވާ މީހުންނަށް އެހީ ފޯރުކޮށްދެވެނީ އިންޑިއާގެ ފަގީރުންނަށް އެހީ ފޯރުކޮށްދިނުމަށް ހަދާފައިވާ ސްކީމްއެއް މެދުވެރިކޮށެވެ. އެހެން ސްކީމްތައް މެދުވެރިކޮށްވެސް ކާބޯތަކެތި ފޯރުކޮށްދެވޭނެ އެވެ.

މި ސްކީމް ޚާއްސަކުރެވިފައިވަނީ ހިޖުރަކޮށްގެން މަސައްކަތްކުރާ މީހުންނަށާއި އާދައިގެ މަސައްކަތްތެރިންނަށެވެ.

ކޮވިޑް-19 އާއި ގުޅިގެން ގިނަ ގައުމުތައް ލޮކްޑައުން ކުރެވިފައިވާއިރު، ވައިރަސް ކޮންޓްރޯލް ކުރުމަށްޓަކައި އެޅިފައިވާ ފިޔަވަޅުތަކުގެ ސަބަބުން ގައުމުތަކުގެ އިގްތިސާދަށް ވަރަށް ބޮޑެތި އަސަރުތައް ދަނީ ކުރަމުންނެވެ.

އިންޑިއާގައި ދުނިޔޭގެ އެންމެ ބޮޑު ލޮކްޑައުން ކުރެވިފައިވާއިރު އެގައުމުގެ ފަގީރުންނަށް ވަނީ ކާބޯތަކެތި ހޯދުމަށާއި އަސާސީ އަދި ޒަރޫރީ ބޭނުންތައް ފުއްދޭނެ މަގުތައް ބަންދުކުރެވިފަ އެވެ. ވަރލްޑް ބޭންކުން ވަނީ މީގެކުރިން، އިންޑިއާގެ ސިއްހީ ދާއިރާއަށް 1 ބިލިއަން ޑޮލަރު ހަދިޔާކޮށްފަ އެވެ.