ލޮކްޑައުންއަށް ފަހު އެމެރިކާގެ ސްޓޭޓްތައް ހުޅުވާލާއިރު އަމަލުކުރާނެ އުސޫލެއް އެކުލަވާލައިފި

އެމެރިކާގެ ސްޓޭޓްތައް ލޮކްޑައުން އަށް ފަހު އަލުން ހުޅުވާލާއިރު ސްކޫލްތަކާއި ވިޔަފާރިތައް އަދި އޯގަނައިޒޭޝަންތަކުން އަމަލުކުރާނެ އުސޫލުތަކެއް އެމެރިކާގެ ސިއްހީ އޮފިޝަލުން ހާމަކޮށްފި އެވެ.

ސެންޓަރ ފޮރ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އިން ވަނީ "ޑިސިޝަން ޓޫލް" ގެ ނަމުގައި އޯގަނައިޒޭޝަންތައް އަލުން ހުޅުވާލާއިރު އަމަލުކުރާނެ އުސޫލުތަކެއް ނެރެފަ އެވެ. މީގައި ޓްރެފިކް ނިޝާނާއި ތަފާތު އެކިކަހަލަ ގްރެފިކްސްތައް ހިމަނާފައިވެ އެވެ. މި އުސޫލުތައް ނެރެމަށް އެތައް ދުވަހެއް ވަނީ ނަގާފަ އެވެ.

މީގައި ސްކޫލްތަކާއި، މަސައްކަތްކުރާ ތަންތަނާއި، ކޭމްޕްތަކާއި، ކުޑަކުދިން ބަލަހައްޓާ ސެންޓަރުތަކާއި، ބަރ އަދި ރެސްޓޯރެންޓްގެ އިތުރުން މީހުން ދަތުރުކުރާއިރު ޓްރާންސިޓްވާ ތަންތަނުގައި އަމަލު ކުރަންވީ އުސޫލުތައް ވެއެވެ. ސީޑީސީން ވަނީ ވަކިން ޚާއްސަކޮށް އަޅުކަން ކުރާ ތަންތަނުގައިވެސް އަމަލުކުރަންވީ ގޮތްތަކެއް އެކުލަވާލާފަ އެވެ. ނަމަވެސް އަދި އެއުސޫލު އާންމެއް ނުކުރެ އެވެ. އެއުސޫލު އާންމު ނުކުރާ ސަބަބެއް ސީޑީސީން ހާމައެއް ނުކުރެ އެވެ.

ކުރިން ހާމަކޮށްފައިވާ ޑޮކިޔުމަންޓްގައި ވަނީ އަޅުކަންކުރަންދާ ޗަރޗް ގައި މީހުން ތިބޭއިރު ވަކި ވަރެއްގެ ދުރުމިނުގައި މީހުން ތިބުމަށެވެ. އަދި އެއްވާ އެއްވުންތަކަށް ވަކި މިންވަރަކަށް މީހުންނަށް ބައިވެރިވެވޭ ގޮތަށެވެ. މިޑޮކިޔުމެންޓް ނެގީ ވައިޓް ހައުސް އިން މިކަމާއި ގުޅޭގޮތުން ކަންބޮޑު ވުންތަކެއް ފާޅުކުރުމުން ކަމަށް އޭޕީން ވަނީ ވަނީ ބުނެފަ އެވެ. އެމައުލޫމާތު ހާމަކުރި މީހާއަކީ ކާކުކަމެއް ހާމަކޮށްފަ އެއްނުވެ އެވެ.

ސީޑީސީން މި އުސޫލުތައް އެކުލަވާ ލާފައިވާތާ މަހަކަށް ވުރެ ގިނަ ދުވަސް ވެފައިވާ ކަމަށާއި ނަމަވެސް ޓްރަމްޕްގެ ސަރުކާރުން މިއުސޫލުތައް އަދި ހާމަނުކޮށް އޮތީ ކަމަށް އެސޯސިއޭޓެޑް ޕްރެސް (އޭޕީ) އިން މިދިޔަ ހަފްތާގައި ވަނީ ރިޕޯޓްކޮށްފަ އެވެ.

ސީޑީސީން 57 ސަފްހާގެ ތަފްސީލީ އުސޫލުތަކެއް އެކުލަވާލާފައިވާ ކަމަށާއި އެހެންނަމަވެސް އަދި އެއުސޫލެއް ނުނެރެ އެވެ. އޭޕީން ބުނާގޮތުގައި މި އުސޫލުގައި ކޮންމެ އޯގަނައިޒޭޝަނެއް އަލު ހުޅުވާލާއިރު ވައިރަސް ފެތުރުން ކޮންޓްރޯލް ކުރުމަށް ކަންކަން ކުރާނެ އުސޫލުތައް ވަކިވަކިން ލިޔެފައިވެ އެވެ. އެގޮތުން މަސައްކަތްކުރާ ތަނެއްވިޔަސް އަދި ސްކޫލެއް ވިޔަސް ކޮންމެ މީހެއްގެ ދޭތެރޭގައި 6 ފޫޓްގެ ދުރުމިން ހުންނަންޖެހޭނެ އެވެ. އަދި ރޫމްތަކާއި ކެފޭތަކުގައި ވަކި އަދަދަކަށް މީހުންނަށް ތިބެވޭގޮތަށް ވަނީ އެކުލަވާލާފަ އެވެ.

ސިއްހީ ބައެއް އޮފިޝަލުންގެ އިތުރުން ސިޔާސީ މީހުންވެސް ގެންދަނީ ސީޑީސީން މިފަދަ ގައިޑްލައިންތައް ވީވަރަކުން އެކުލަވާލާ ނެރުމަށް އެދެމުންނެވެ.

މި އުސޫލުތަކަށް ފެޑްރަލް އޮފިޝަލުން އަންނަނީ ތަފާތު އެކި ބަދަލުތައް ގެނެސް ރަނގަޅުކުރުމުގެ މަސައްކަތް ކުރަމުންނެވެ. އެގޮތުން ކުރީގައި ކޭމްޕްތަކުން ކުރިޔަށް ގެންދާ ޕްރޮގްރާމްތައް ހަމައެކަނި އެ ސަރަހައްދުގައި އުޅޭ މީހުންނަށް އެކަނި ޚާއްސަކުރުން ފަދަ ކަންކަން ވަނީ ހިމަނާފަ އެވެ. އެގޮތަށް ކޭމްޕްތަކުން އެއްބަސްނުވާނަމަ އަލުން ހުޅުވާލުމުގެ ފުރުސަތު ނުދިނުމަށް ވަނީ ނިންމާފަ އެވެ. އެހެންނަަމަވެސް އާންމު ކުރެވުނު އުސޫލުގައި އެކަން ހިމަނާފައެއްނުވެ އެވެ.