މިނިސްޓަރު ނަހުލާ ރިސޯޓްގައި ހުންނެވީ އޯނަރެއްގެ ހައިސިއްޔަތުން: މަބްރޫކް

ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު އާއިޝަތު ނަހުލާ ރިސޯޓެއްގައި މަޑުކުރައްވާފައި ހުންނެވީ އޯނަރެއްގެ ހައިސިއްޔަތުން ކަމަށް ކޮވިޑް-19 ގެ ތަރުޖަމާން މަބްރޫކް އަބްދުލް އަޒީޒް ވިދާޅުވެއްޖެ އެވެ.

ބުރާސްފަތި ދުވަހުގެ ރޭ ކޮވިޑް-19 ގެ ޓާސްކް ފޯހުން ކުރިޔަށް ގެންދިޔަ ނޫސްވެރިންގެ ބައްދަލުވުމުގައި މިނިސްޓަރ ނަހުލާ މާލެ ލޮކްޑައުންކުރި ފަހުން ރިސޯޓެއްގައި ހުންނަވާ ކަމަށް ދެކެވޭ ވާހަކަތަކަށް ޖަވާބު ދެއްވަމުން މަބްރޫކް ވިދާޅުވީ މިނިސްޓަރު ނަހުލާ ރިސޯޓެއްގައި މަޑުކުރައްވަނީ ދާދިފަހުން އެކުލަވާލި ޚާއްސަ އުސޫލެއްގެ ދަށުން ނިންމުނު ނިންމުމުގެ ތެރެއިން ކަމަށެވެ. އެއީ ރިސޯޓުތަކުގެ އޯނަރުންނާއި އެނޫންވެސް އިންވެސްޓަރުންނަށް ރާއްޖެ އައުމުގެ ހުއްދަ ލިބޭ ހާއްސަ އުސޫލުގެ ދަށުންކަމަށް މަބްރޫކް ވިދާޅުވި އެވެ.

ރާއްޖޭގެ ބޯޑަރ ބަންދުކުރެވިފައި ވުމުން މިވަގުތު ޚާއްސަ ވިސާގެ ދަށުން ރާއްޖެ އަށް ރިސޯޓް އޯނަރުންނާއި އިންވެސްޓަރުން އަދި ބައިނަލްއަގްވާމީ ޖަމިއްޔާ ޖަމާޢަތްތަކުގެ ބޭފުޅުންނަށް އާދެވޭނެ އެވެ. މިގޮތަށް އަންނަ ރިސޯޓް އޯނަރުންނަށް އެމީހުންގެ ރިސޯޓްގައި ތިބުމުގެ ފުރުސަތު އޮންނާނެކަމަށް އެ އުސޫލުގައި ވެއެވެ.

މި އުސޫލުގެ ދަށުން އެޗްޕީއޭ ގެ ޓެގް ޓީމުގެ ހުއްދަ ނަގައިގެން މިނިސްޓަރ ނަހުލާއާ އެކު އިތުރު ހަތަރު މީހަކު ރިސޯޓެއްގައި މަޑުކުރައްވާ ކަމަށް މަބްރޫކް ވިދާޅުވި އެވެ. އަދި ކާބޯތަކެތީގެ އިންތިޒާމު ހަމަޖެއްސުމާއި ހިދުމަތްތައް ފޯރުކޮށްދިނުމުގައި އުޅޭނީ ލިމިޓެޑް ސްޓާފުން ކަމަށް މަބްރޫކް ވިދާޅުވިއެވެ. އެ ސްޓާފުންވެސް 14 ދުވަހުގެ މުއްދަތު ހަމަ ކުރަން ޖެހޭނެ ކަމަށް މަބްރޫކް ވިދާޅުވި އެވެ.

ނަހުލާގެ ފިރިކަލުން ގާސިމް އިބްރާހިމްގެ ވިލާ ގްރޫޕުން ފަސް ރިސޯޓު ހިންގާ އިރު ތިން ރިސޯޓު ވަނީ ކަރަންޓީން ފެސިލިޓީތަކުގެ ގޮތުގައި ސަރުކާރަށް ދޫކޮށްފަ އެވެ. ނަހުލާ ހުންނެވީ މިތަނުން ކޮން ރިސޯޓެއްގައި ކަމެއް މަބްރޫކް ހާމައެއް ނުކުރައްވަ އެވެ.

ކޮވިޑް-19 ގެ ކަންކަމުގައި ސަރުކާރުގެ ވުޒާރާތަކުގެ ވެރިން ފެންނަމުން ދާއިރު ނަހުލާ ނުފެންނާތީ އެކަމުގެ ވާހަކަތައް އާންމުންގެ ތެރޭގައިވެސް ވަނީ ކޮންމެސް ވަރަކަށް ދެކެވިފަ އެވެ.