ފަރުވާ ނުދެވި ހުއްޓާ އއ.ތޮއްޑޫގައި މާބަނޑު މީހެއްގެ ބަނޑަށް ދަރިފުޅު މަރުވި މައްސަލައިގައި، އެ އަންހެންމީހާ ރަށުން ބޭރަށް ދާން ބޭނުންވާ ހުއްދަ ވަރަށް އަވަހަށް ދިން ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވެއްޖެ އެވެ.

ބުރާސްފަތި ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ތޮއްޑޫ ފުރަން އެދުނު މާބަނޑު އަންހެން މީހާ ހުއްދަ އަށް އެދުނުތާ ގާތްގަނޑަކަށް 15 މިނެޓް ތެރޭގައި ހުއްދަ ދެވުނު ކަމަށެވެ.

މަބްރޫކް ވިދާޅުވީ މިމައްސަލައަކީ ހެލްތް މިނިސްޓްރީން މިހާރު ތަހުގީގު ކުރަމުންދާ މައްސަލައެއް ކަމަށާއި، މައްސަލައާ ގުޅޭ ގޮތުން ވަކި ޖަވާބެއް ދެވޭނީ މިނިސްޓްރީން މައްސަލަ ބެލުމުން ކަމަށެވެ.

ފުރުމުގެ ހުއްދަ ގާތްގަނޑަކަށް 15 މިނެޓްގެ ތެރޭގައި ދީފައިވާ ކަމަށް މަބްރޫކް ވިދާޅުވެފައިވާއިރު، ސިއްހީ މަރުކަޒުން ހުއްދައަށް އެދި ރިކުއެސްޓް ކުރީ މާބަނޑު އަންހެން މީހާ އެޑްމިޓްކުރިތާ 5 ގަޑިއިރު ފަހުން ކަމަށް އާއިލާއިން ބުނެފައި ވެއެވެ.

މައުލޫމާތު ލިބިފައިވާގޮތުގައި އެމީހާ ޞިއްޙީ މަރުކަޒަަށް ގެންދިޔައީ ބުދަ ދުވަހުގެ ވަގުތެއްގައި ކުއްލިއަކަށް ބަނޑަށް ތަދުވާން ފެށުމުންނެވެ. އެހެންނަމަވެސް، އޭނާ ވިއްސާނެ އެއްވެސް ވަޞީލަތެއް އެ މަރުކަޒުގައި ނެތް ކަމަށް ޚަބަރު ލިބެ އެވެ.

'ރާއްޖެއެމްވީ' އިން އެރަށު ހެލްތު އޮފިސަރަކާއި ގުޅާލުމުން މިކަމާއި ބެހޭ ގޮތުން އެއްވެސް މަޢުލޫމާތެއް ނުދެއްވި އެވެ.

މިކަމާއި ގުޅިގެން ރަށު ކައުންސިލާއި ގުޅާލުމުން ބުނީ އެމީހާއަށް ދަތުރުކުރުމުގެ ހުއްދަ ކައުންސިލުން ދިން ކަމަށެވެ. އެހެން ނަމަވެސް، ރަސްދޫގައި ހުންނަ އއ. އަތޮޅު ހޮސްޕިޓަލުން ޚިދުމަތް ދެވެން ނެތް ވާހަކަ ބުނި ކަމަށެވެ.

'ރާއްޖެއެމްވީ' އިން އަތޮޅު ހޮސްޕިޓަލާއި ގުޅާލުމުން ބުނީ އެމީހާ އަކީ 'ހައި ރިސްކު' ޕޭޝަންޓެއް ކަމަށެވެ. އެއީ ދުވަސް ނުފުރާ ވިހާ މީހެއް ކަމަށްވުމާއެކު، ކުއްޖާ ވިހެއުމަށް ފަހު ކުއްޖާއަށް ފަރުވާދެވޭނެ ނަރސަރީ އެއް ނެތް ކަމަށެވެ. ހޮސްޕިޓަލުގެ ޙާލަތު ހުރިގޮތުންނާއި، ބަލި މީހާގެ ހާލަތަށް ރިޢާޔަށް ކޮށް، ހޮސްޕިޓަލުން ޚިދުމަތް ނުދެވޭނެ ކަމަށް އެންގި ކަމަށް ބުނެފައި ވެއެވެ.