ރާއްޖެއިން ބޭރުގައި ދަތި ހާލުގައި ދިރިއުޅޭ މީހުން ގެނައުމަށް ދައުލަތުގެ ބަޖެޓުން މިހާތަނަށް 1.89 މިލިއަން ރުފިޔާ ރުފިޔާ ހަރަދުކޮށްފި އެވެ.
ބުރާސްފަތި ދުވަހުގެ ރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވީ ރާއްޖެއިން ބޭރުގައި ގިނަ އަދަދެއްގެ ދިވެހިން ދިރިއުޅެމުންދާ ކަމަށެވެ. އަދި ހާލުގައި ޖެހިފައިވާ މީހުން ގެނައުމުގެ މަސައްކަތް ފޮރިން މިނިސްޓްރީއާ ގުޅިގެން ކުރަމުންދާ ކަމަށެވެ.
މަބްރޫކް ވިދާޅުވީ މިދަނޑިވަޅުގައި ރާއްޖެއިން ބޭރުގައި ތިބި ދިވެހިން ގެންނަން ބަލާއިރު، އެހެން އިންތިޒާމްތަކަށް ވެސް ބަލަން ޖެހެއެވެ. އެގޮތުން މީހުން ގެނައުމުގައި ކަރަންޓީން ފެސިލިޓީތަކުގެ ޖާގަ ހުރި ވަރަށް ބަލަން ޖެހޭ ކަމަށް ވެސް މަބްރޫކް ވިދާޅުވި އެވެ.
މީގެ އިތުރުން މަބްރޫކް ވިދާޅުވީ ދާދި ފަހުން އިންޑިއާގައި ތިބި ދިވެހިން ތަކެއް ވެސް ރާއްޖެ ގެނެސްފައިވާ ކަމަށެވެ. އަދި ރާއްޖެއިން ބޭރުގައި ތިބި ފަރާތްތަކަށް އެހީތެރިކަން ފޯރުކޮށްދިނުމުގެ ގޮތުން މިހާތަނަށް 1.89 މިލިއަން ރުފިޔާ ހަރަދު ކުރެވިފައިވާ ކަމަށް މަބްރޫކް ވިދާޅުވި އެވެ.
މިކަހަލަ ގޮތެއްގައި ހާލުގައި ޖެހިފައިވާ މީހުން އަޅުގަނޑުމެން އެދެމުން މިދަނީ ފޮރިން މިނިސްޓްރީއަށް އެންގުމަށް އެމްބަސީ މެދުވެރިކޮށް. މިކަންކަމުގައި އެހީތެރިކަން ފޯރުވާ ދެމުން އެބަދޭ. ދެވަނަ ކަމަކަށް އެބޭފުޅުން އަނބުރާ ގެނައުމުގެ ކަންތަކުގައި އެބަ ނަގާ ދުވަސްތަކެއް ނެގޯޝިއޭޓް ކުރަން ޖެހޭ. އަދި ހަމަ ކުރިން ވެސް އަޅުގަނޑުމެން ބުނިހެން ކަރަންޓީން ފެސިލިޓީތަކުން އެޖާގަ ލިބޭ ވަރަކުން.ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް
ރާއްޖެއިން ބޭރުގައި ތިބި ދިވެހިން ގެނައުމުގެ މަސައްކަތް ސަރުކާރުން ކުރަމުންދާއިރު، ކޮވިޑް-19 އާއި ގުޅިގެން އަވައްޓެރި އިންޑިއާގައި ތާށިވެފައި ތިބި 185 ދިވެހިން މިމަހުގެ 12 ވަނަ ދުވަހު ރާއްޖެ ގެނެސްފައި ވެއެވެ.
އިންޑިއާގައި ތިބި ދިވެހިންގެ ތެރެއިން މިފަހަރު އިސްކަންދިނީ ކުރު މުއްދަތެއްގެ ވިސާގައި ގޮސް ތިބި ފަރާތްތަކަށާއި، ބޭސްފަރުވާއަށް ގޮސް ތިބި ފަރާތްތަކުގެ އިތުރުން، ލޮކްޑައުންގެ ސަބަބުން ބޭސްފަރުވާ ހުއްޓިފައިވާ ފަރާތްތަކާއި، އިންޑިއާގެ ދުރު ހިސާބުތަކުގައި ދިރިއުޅެމުންދާ ދިވެހިންނަށެވެ.
