ކޮވިޑް-19 އާ ގުޅޭ މަސައްކަތްތައް ކުރުމަށް ބަޖެޓެއް ދޭން ޖެހޭ: ހޯރަފުށީ ކައުންސިލުން

ކޮވިޑް-19އާ ގުޅޭ މަސައްކަތްތައް ކުރުމަށް ރަށްރަށުގެ ކައުންސިލްތަކަށް ޚާއްސަ ބަޖެޓެއް ދޭން ޖެހޭ ކަމަށް ހއ. ހޯރަފުށީ ކައުންސިލުން ބުނެފި އެވެ.

ރާއްޖެޓީވީގެ ކޮވިޑް-19ގެ ކަވަރޭޖަށް ދެއްވި ބަސްތީގަތުމެއްގައި ކައުންސިލްގެ ރައީސް މުހައްމަދު ވަހީދު ވިދާޅުވީ ކޮވިޑް-19ން ރައްކާތެރިވުމަށް ގިނަ ފިޔަވަޅުތަކެއް އެޅިފައިވާ ކަމަށެވެ. އަދި ކުރަމުންދާ މަސައްކަތްތަކުގައި ރައްޔިތުންގެ ފުރިހަމަ އެއްބާރުލުން ލިބޭކަން އޭނާ ފާހަގަކުރެއްވި އެވެ.

Advertisement

ނަމަވެސް މިބައްޔާ ގުޅިގެން ކަންބޮޑުވުންތަކެއް ހުރިކަން ފާހަގަކުރައްވައި ވަހީދު ވިދާޅުވީ ރަށުގެ އާންމު ހާލަތު ރަނގަޅުވި ނަމަވެސް ކޮވިޑް-19އާ ގުޅިގެން ކުރެވޭ މަސައްކަތްތައް ކުރުމުގައި ކަމާ ބެހޭ ފަރާތްތަކުން މިކަމަށް ޚާއްސަ ބަޖެޓެއް އެބަ ޖެހޭ ކައުންސިލްތަކަށް ފޯރުކޮށްދޭން ޖެހޭ ކަމަށެވެ.

ވަހީދު ވިދާޅުވީ ސަރކިއުލަރތަކުންނާއި، ނޫސްވެރިންގެ ބައްދަލުވުންތަކުން ވަކި ގޮތަކަށް އަމަލުކުރުމަށް އެންގި ނަމަވެސް ފައިސާ ނެތި، ވަސީލަތްތައް ނެތި އެންމެ ފުރިހަމަ ގޮތުގައި އެއްވެސް ކަމެއް ނުކުރެވޭނެކަން އެންމެނަށް ވެސް އެނގޭ ކަމަށެވެ. އެހެންކަމުން އޮންނަ އުސޫލުގެ ތެރެއިން މިފަދަ ކަންކަން ކުރެވޭނެ ގޮތް ސަރުކާރުން ހަމަޖައްސައިދޭން ޖެހޭ ކަމަށް އޭނާ ވިދާޅުވި އެވެ.

ވަހީދު ވިދާޅުވީ ހޯރަފުށީގެ އާންމު ހާލަތާއި ބެހޭ ގޮތުން ކޮންމެ ދުވަހު ވެސް ރިޕޯޓެއް އާންމުކުރަމުންދާ ކަމަށެވެ. މިރިޕޯޓުގައި އެރަށުގައި ހުރި ކާނޑުގެ ބާވަތްތަކާއި، ބޭސްހުރި ވަރާއި، އަދިވެސް އިތުރު މައުލޫމާތު ހިމެނިފައިވާ ކަމަށެވެ. އަދި ފިހާރަތައް ޑިސްއިންފެކްޓް ކުރުމާއި، ފިހާރަތަކަށް އެއް ފަހަރާ ވަދެވޭ މީހުންގެ އަދަދުތައް މަދުކޮށްފައިވާ ކަމަށް މައުލޫމާތު ދެއްވި އެވެ.

މީގެ އިތުރުން ވަހީދު ވިދާޅުވީ އެރަށުގައި މިހާރު ދިރިއުޅެމުންދަނީ 190 ބިދޭސީން ކަމަށާއި، އެބިދޭސީންގެ ހާލަތުގެ ވެސް ވަރަށް ގާތުން ބަލަމުންދާ ކަމަށެވެ.

ކޮވިޑް-19އިން ރައްކާތެރިވުމަށް ދުރާލާ ފިޔަވަޅުތައް އެޅުނުކަން ފާހަގަކުރައްވައި ވަހީދު ވިދާޅުވީ ހުރިހާ މަސައްކަތެއް ވެސް ކުރެވެމުންދަނީ ޚާއްސަ އުސޫލެއްގެ ތެރެއިން ދާއިރާގެ މެންބަރު އަހުމަދު ސަލީމްގެ އިރުޝާދުގެ ދަށުން ކަމަށެވެ.