ލޮކްޑައުން ކުރުމާ ގުޅިގެން އަލީފުށީގެ ގާތްގަނޑަކަށް 50 މީހުން މާލޭގައި ތާށިވެފައި އެބަތިބި: ކައުންސިލް
14 މެއި 2020 | ބުރާސްފަތި 12:51މާލޭގައި ތާށިވެފައި ތިބި މީހުން ގެނައުމުގެ މަސައްކަތް ކުރެވޭ
ރ.އަލިފުށީގައި ކޮވިޑް-19ން ރައްކާތެރިވުމަށް ގިނަ ފިޔަވަޅުތަކެއް އަޅާފައިވޭ
މާލެ ސިޓީ ލޮކްޑައުން ކުރުމާ ގުޅިގެން، މާލޭގައި ރ. އަލިފުށީގެ 50ށް ވުރެ މީހުން ތާށިވެފައިވާ ކަމަށް އެރަށުގެ ކައުންސިލުން ބުނެފިއެވެ.
ރާއްޖެޓީވީގެ ކޮވިޑް-19ގެ ޚާއްޞަ ކަވަރޭޖަށް ދެއްވި އިންޓަވިއުއެއްގައި ކައުންސިލްގެ ރައީސް އަބްދުﷲ ރާޒީ ވިދާޅުވީ ޒަރޫރީ އެކިއެކި ބޭނުންތަކަށް މާލެއަށް އައިސް ތިބި 50އަށް ވުރެ ގިނަ މީހުން ލޮކްޑައުން ކުރުމާއި ގުޅިގެން ތާށިވެފައިވާ ކަމަށެވެ.
ރާޒީ ވިދާޅުވީ އެމީހުންގެ ތެރެއިން ރަށަށް އަންނަން ބޭނުންވާ މީހުން ގެނައުމުގެ މަސައްކަތް އެޗްޕީއޭއާ، އެލްޖީއާ ގުޅިގެން ކުރިއަށްދާ ކަމަށެވެ. ނަމަވެސް ކުރިއަށް އޮތް ދެހަފުތާއަކީ ކޮވިޑް-19 އެންމެ ބޮޑަށް ފެތުރޭނެ ކަމަށް ލަފާކޮށްފައިވާ ދެހަފުތާ ކަމަށްވާތީ އިތުރަށް ބަލަންޖެހޭ ކަންކަން ބަލަމުންދާ ކަމަށެވެ.
ރާޒީ ވިދާޅުވީ މާލެސިޓީގައި ތިބި މީހުން ރަށަށް ގެނެސް ކަރަންޓީން ކުރާނެ އެކަށީގެންވާ ފެސިލިޓީއެއް ނެތް ކަމަށެވެ. އެހެންކަމުން އެމީހުން 14 ދުވަހުގެ ކަރަންޓީން ކުރުމަށް ރަށް ކައިރި ރިސޯޓެއް ހަމަޖެއްސުމަށް މަޝްވަރާތައް ކުރަމުންދާ ކަމަށް އޭނާ ވިދާޅުވިއެވެ.
އަލިފުށީގެ ޞިއްޙީ މަރުކަޒަށް އަލިއަޅުއްވާލައްވާ ރާޒީ ވިދާޅުވީ ކޮވިޑް-19އާ ގުޅިގެން ރައްކާތެރިވުމަށް ޞިއްޙީ ޚިދުމަތްތެރިން ބޭނުންވާ ޕީޕީއީ ފަދަ އާލަތްތައް ހޯދުމުގެ މަސައްކަތްތައް ކުރިއަށްދާ ކަމަށެވެ. އެޗްޕީއޭގެ އިރުޝާދާއެކު ޞިއްޙީ މަރުކަޒު އޮތީ ކޮންމެ ޙާލަތަކަށް ވެސް ތައްޔާރަށް ކަމަށް ރާޒީ ވިދާޅުވިއެވެ.
އަލިފުށީގެ ޢާންމު ޙާލަތާ ބެހޭ ގޮތުން ރާޒީ ވިދާޅުވީ ޖުމުލަ ގޮތެއްގައި ރަށުގެ ޙާލަތު ރަނގަޅު ކަމަށެވެ.
އީދާ ހަމައަށް ބޭނުންވާ ވަރަށް ރަށުގައި ޒަރޫރީ ބޭނުންތަކަށް ބޭނުންވާ އާލާތްތައް، ކާނޑުގެ ބާވަތްތައް ހުރިކަން ރާޒީ ފާހަގަކުރެއްވިއެވެ. އަދި ވިދާޅުވީ ރަށުގެ ރައްޔިތުންގެ ރައްކާތެރިކަމަށް ގިނަ ފިޔަވަޅުތަކެއް އަޅާފައިވާ ކަމަށެވެ.
އެގޮތުން ރަށަށް ގެންނަ މުދާ ބާލަނީ ޑިސްއިންފެކްޓް ކުރުމަށްފަހުއެވެ. އަދި ރޭގަނޑު 6:00ން ހެނދުނު 6:00ށް ބޭރުގައި އުޅުން ވަނީ މަނާކޮށްފައެވެ.
މީގެ އިތުރުން ރާޒީ ވިދާޅުވީ ބިދޭސީންގެ ޙާލަތު ވެސް ވަރަށް ގާތުން ބަލަމުންދާ ކަމަށެވެ. އަދި ބިދޭސީންގެ ދަފްތަރު އެކުލަވާލުމުގެ މަސައްކަތް ވެސް ކުރިއަށްދާ ކަން އޭނާ ފާހަގަކުރިއެވެ.
