ސައިފް އާއި ދަރިފުޅު ސާރާ އެކުގައި ފިލްމަކުން ފެނިދާނެތަ؟

ސާރާ އަލީ ޚާން ބޮލީވުޑަށް ތަޢާރަފުވީ އަބީޝެކް ކަޕޫރުގެ ފިލްމު "ކެދަރްނާތު" އިންނެވެ. އެއަށްފަހު ސާރާ ވަނީ ރީޯހިތު ޝެޓީގެ "ސިމްބާ" އަދި އިމްތިޔާޒް އަލީގެ "ލަވް އާޖްކަލް 2" އިން ފެނިގެންގޮސްފައެވެ.

ސާރާގެ ފޭނުން މިހާރު އެންމެ ބޭނުންވަނީ އޭނާގެ ބައްޕަ ސައިފް އަލީ ޚާނާއެކު ސާރާ ފިލްމަކުން ފެނިގެން ދިއުމަށެވެ.

ސާރާ ދާދިފަހުން ބޭއްވި ލައިވް ޗެޓްގައި ފޭނަކު ވަނީ ސައިފް އާއި އެކު ސާރާ ފިލްމަކުން ފެނިދާނެތޯ ސުވާލުކޮށްފައެވެ. އެސުވާލުގެ ޖަވާބުގައި ސާރާ ބުނީ ވަރަށް އަވަހަށް އެފުރުސަތު ލިބިގެންދާނެ ކަމަށް އުންމީދުކުރާ ކަމަށެވެ.

"ރަނގަޅު ޕްރޮޖެކްޓެއް ލިބިއްޖެ ނަމަ، ބައްޕަ އަހަރެންނާއެކު މަސައްކަތް ކުރަން ހުރިނަމަ އަދި ޑައިރެކްޓަރ އަހަރުމެން ދެމީހުންނަށް އެކުގައި ފިލްމް ކުޅެން ފުރުޞަތު ދީފިނަމަ އެއީ އަހަރެމެން ވަރަށް އުފާވާނެ ކަމެއް" ސާރާ ވަނީ ބުނެފައެވެ.

ސައިފްގެ އެންމެ ފަހުން ރިލީޒް ކުރި ފިލްމު "ޖަވާނެ ޖާނެމަން" ގައި ސައިފްގެ އެކްޓިންއާއި ގުޅޭ ގޮތުން ސުވާލު ކުރުމުން ސާރާ ބުނެފައިވަނީ އެ ފިލްމު އޭނާ ބެލި ކަމަށާއި ފިލްމުގައި ސައިފްގެ އެކްޓިން ވަރަށް މަޖާ އަދި ވަރަށް "ކޫލް" ކަމަށެވެ. ފިލްމު ވަރަށް ކަމުދާކަމަށް ބުނެ ސައިފްއަށް މެސެޖްވެސް ކުރިކަމަށް ސާރާ ވަނީ ބުނެފައެވެ.

މި ލޮކްޑައުންގައި ސާރާ ދަނީ ގޭގައި ހުރެ ކެއްކުމާއި އެހެނިހެން ކަންކަމުގައި ބުރަކޮށް ވަގުތު ހޭދަކުރަމުންނެވެ.