ޒްލަޓާން އިބްރަހިމޮވިޗް އެނބުރި އިޓަލީ އަށް

އިޓާލިއަން ލީގު އަލުން ފެށުމަށް ތައްޔާރުވަމުންދާތީ އޭސީ މިލާނަށް އަށް ކުޅެމުން އަންނަ ސްވިޑަންގެ ފޯވާޑް ޒްލަޓާން އިބްރަހިމޮވިޗް އެނބުރި އިޓަލީ އަށް ހިނގައްޖެ އެވެ.

ހޯމަ ދުވަހެއްގެ ވަގުތެއްގައި އިބްރަހިމޮވިޗް އެނބުރީ އިޓަލީ އަށް ދިޔައިރު، އޭނާ 14 ދުވަސް ވަންދެން ކަރަންޓީނު ކުރާނެ އެވެ. ކަރަންޓީނުގެ މުއްދަތު ހަމަކުރުމަށް ފަހު ޓީމުގެ ފަރިތަކުރުންތަކާއި ގުޅުމުގެ ކުރިން އިބްރަހިމޮވިޗް ވެސް ކޮރޯނާވައިރަސް (ކޮވިޑް-19) އަށް ޓެސްޓު ކުރާނެ އެވެ.

އިޓާލިއަން ލީގު މެދުކަނޑާލުމާއެކު އިބްރަހިމޮވިޗް އޭނާގެ އުފަން ގައުމު ކަމަށްވާ ސްވިޑަން އަށް ދިޔައިރު، އޭނާ ވަނީ ސްވިޑަންގައި ހުރި މުއްދަތުގެ ތެރޭގައި ފިޓްނަސް ހިފެހެއްޓުމުގެ ގޮތުން އެ ގައުމުގެ ކްލަބަކާއެކު ބައެއް ފަރިތަކުރުންތަކުގައި ބައިވެރިވެފައެވެ.

އިޓާލިއަން ލީގު އަލުން ފެށުމަށް ތައްޔާރުވަމުން އަންނައިރު، މިމަހުގެ ހަތަރުވަނަ ދުވަހުން ފަށައިގެން ކުޅުންތެރިން އެކަނި ތަމްރީނުތައް ހެދުމުގެ ހުއްދަ އިޓަލީގެ ސަރުކާރުން ވަނީ ދީފައެވެ. އަދި މިމަހުގެ 18 ވަނަ ދުވަހުން ފެށިގެން ކުޅުންތެރިން އެކުގައި ތަމްރީނުތައް ހެދުމުގެ ހުއްދަ ދޭން މިހާރު ވަނީ ނިންމާފައެވެ.

އޭސީ މިލާނުގެ ކުޅުންތެރިން އެކަނި ތަމްރީނުތަކަށް ނުކުމެފައިވާއިރު، އޭސީ މިލާނުގެ ހުރިހާ ކުޅުންތެރިންނާއި މުވައްޒަފުން ވަނީ ކޮވިޑް-19 އަށް ޓެސްޓު ކޮށްފައެވެ. އަދި އެންމެން ވަނީ ވައިރަހަށް ނެގެޓިވްވެފައެވެ.

ކޮވިޑް-19 އާ ގުޅިގެން މާޗު މަހުގެ ނުވަވަނަ ދުވަހު އިޓާލިއަން ލީގުގެ ކުޅުން މެދުކަނޑާލިއިރު، ރިޕޯޓުތައް ބުނާ ގޮތުން ޖޫން މަހުގެ ދެވަނަ ދުވަހު ލީގުގެ ކުޅުން އަލުން ފަށަން މިހާރު އަންނަނީ މަސައްކަތް ކުރަމުންނެވެ.