މެސީގެ އިތުރު އެހީއެއް އާޖެންޓީނާ ހޮސްޕިޓަލްތަކަށް

ނޮވެލް ކޮރޯނާވައިރަސް (ކޮވިޑް-19) އާ ދެކޮޅަށް ހަނގުރުމާކުރުމަށް އެހީތެރިވުމުގެ ގޮތުން ބާސެލޯނާގެ ފޯވަރޑް ލިއޮނަލް މެސީ އާޖެންޓީނާގެ ހަ ހޮސްޕިޓަލަކަށް މާލީ އެހީތެރިކަން ފޯރުކޮށްދީފިއެވެ.

މެސީ ވަނީ އޭނާގެ އަމިއްލަ ގައުމު ކަމަށްވާ އާޖެންޓީނާގެ ހަ ހޮސްޕިޓަލަށް ފަސް ލައްކަ ޔޫރޯ ހަދިޔާ ކޮށްފައެވެ. މި ފައިސާ ބޭނުންކުރާނީ އެ ހޮސްޕިޓަލްތަކަށް ބޭނުންވާ ސާމާނުތައް ގަތުމަށް ކަމަށް ރިޕޯޓުތައް ބުނެއެވެ.

އާޖެންޓީނާގެ ހަ ހޮސްޕިޓަލަކަށް ފަސް ލައްކަ ޔޫރޯ މެސީ ހަދިޔާކުރިއިރު، މީގެ ކުރިން އޭނާ ވަނީ ދެ ހޮސްޕިޓަލަކަށް އެހީގެ ގޮތުގައި އެއް މިލިއަން ޔޫރޯ ހަދިޔާ ކޮށްފައެވެ.

އެފަހަރު މާލީ އެހީތެރިކަން ފޯރުކޮށްދިން އެއް ހޮސްޕިޓަލަކީ ބާސެލޯނާގެ ކްލިނިކް ޑި ބާސެލޯނާ އެވެ. ދެން އެހީތެރިކަން ފޯރުކޮށްދިނީ އާޖެންޓީނާގެ ހޮސްޕިޓަލަކަށެވެ.

މުޅި ދުނިޔެ އަށް ފެތުރިފައިވާ މި ބަލިމަޑުކަމާ ގުޅިގެން ގިނަ ފުޓްބޯޅަ ކުޅުންތެރިން އެހީތެރިކަން ފޯރުކޮށްދެމުން އަންނައިރު، މީގެ ކުރިން މެސީ ހިމެނޭހެން ބާސެލޯނާގެ ކުޅުންތެރިން ވަނީ މުސާރަވެސް ކުޑަކޮށްފައެވެ. އެގޮތުން ކޮވިޑް-19 ގެ ސަބަބުން މާލީ ގޮތުން ދިމާވާ ދަތިތައް ހައްލުކުރަން ބާސެލޯނާ ކުޅުންތެރިންގެ މުސާރައިގެ 70 އިންސައްތަ ވަނީ ކުޑަކޮށްފައެވެ.