ރާއްޖޭގައި ހުރި ހިރިގަލު މިސްކިތްތަކަށް ޚާއްސަކޮށްގެން ވެބްސައިޓެއް އާންމުކޮށްފި
12 މެއި 2020 | އަންގާރަ 09:15މިވެބްސައިޓް ތައްޔާރު ކުރީ މައުރޫފް ޖަމީލް
މާލޭގެ ހުކުރު މިސްކިތް
ދިވެހިރާއްޖޭގައި ހުރި ހިރިގަލު މިސްކިތްތަކަށް ޚާއްސަކޮށްގެން ވެބްސައިޓެއް ގާއިމުކޮށް އާންމުކޮށްފިއެވެ.
ހޯމަ ދުވަހު ހެނދުނު ބޭއްވި ވަރޗުއަލް ރަސްމިއްޔާތެއްގައި މި ވެބްސައިޓް އާންމުކޮށްދެއްވީ މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން އާއި ވިލާތުގެ އިއްތިޙާދުން ސްރީލަންކާއާއި ރާއްޖެއަށް ކަނޑައަޅުއްވާފައި ހުންނަވާ ސަފީރު، މަހާސިރި ޑެނިސް ޗައިބީއެވެ.
މި ވެބްސައިޓަކީ ވިލާތުގެ އިއްތިޙާދުގެ މާލީ އެހީއާއި، ސަޤާފީ ތަރިކަ ރައްކާތެރިކުރާ ޤައުމީ މަރުކަޒާއި މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖްގެ އެއްބާރުލުމާ އެކު، ދިވެހި އާކިޓެކްޓް އަދި ހިރިގަލު މިސްކިތްތަކާއި ބެހޭ ތަޖުރިބާކާރެއް ކަމުގައިވާ މައުރޫފް ޖަމީލް ތައްޔާރުކުރައްވާފައިވާ ވެބްސައިޓެކެވެ. ވެބްސައިޓް ޑިވެލޮޕްކޮށް ފަރުމާކޮށްފައިވަނީ މުއައްވަޒް ޔޫސުފެވެ.
ވެބްސައިޓް އާންމުކުރުމަށް ބޭއްވި ރަސްމިއްޔާތުގައި މިނިސްޓަރު ޔުމްނާ ވިދާޅުވީ، ރާއްޖޭގެ ހިރިގަލު މިސްކިތްތަކުން ރަމްޒުކޮށްދެނީ ދިވެހިންގެ އިސްލާމީ ތާރީޚާއާއި، މުއްސަނދި ތަރިކައާއި، ހުނަރުން ފުރިގެންވާ ފަންނުވެރިކަން ކަމަށެވެ. އަދި އެ މިސްކިތްތައް ރޭވުމުގައި ބޭނުންކޮށްފައިވާ އުކުޅުތަކުގެ މޮޅުކަމާއި މުހިއްމުކަން މިނިސްޓަރ ފާހަގަކުރެއްވިއެވެ.
މިފަދަ ވެބްސައިޓެއް ގާއިމްކުރެވި އާންމުންނަށް އޭގެ ބޭނުން ހިފޭނެ މަގު ތަނަވަސްވެގެން ދިއުމަކީ ދުނިޔޭގެ ތަރިކައިގެ ލިސްޓުގައި ރާއްޖޭގެ ހިރިގަލު މިސްކިތްތަކެއް ހިމެނުމަށް ކުރަމުންދާ މަސައްކަތަށް ލިބިގެންދިޔަ ބާރެއްކަން ބަޔާންކުރައްވައި، މި މަސައްކަތުގައި ވިލާތުގެ އިއްތިޙާދުން ވެފައިވާ އެހީއަށްޓަކައި އެ އިއްތިޙާދަށް މިނިސްޓަރު ޝުކުރު ދެންނެވިއެވެ.
މިނިސްޓަރު ޔުމްނާ ވިދާޅުވީ، ދުނިޔެއަށް މިހާރު ކުރިމަތިވެފައިމިވާ ފަދަ ދަނޑިވަޅުތަކުގައި ސަގާފަތާއި ތަރިކަ މުހިންމު ވަނީ އެއިން އެއްބައިވަންތަކަން ގެނުވައި، އެއްބަޔަކު އަނެއް ބަޔަކަށް އަޅައިލާ އިހުތިރާމު ކުރަން ދަސްކޮށްދީ، އުއްމީދު އާކޮށްދޭތީ ކަމަށެވެ. އަދި ޒަމާނާއި އެއްގޮތަށް، ތާރީޚާއި ތަރިކައިގެ މަޢުލޫމާތު ދުނިޔޭގެ ކޮންމެ ތަނެއްގައި ތިބެގެންވެސް އޮންލައިން ވެބްސައިޓް ލިބޭނެ މަގު ފަހިކުރުމުގެ މުހިއްމުކަން އިތުރަށް ހާމަވެގެން ގޮސްފައިވާކަމަށް މިނިސްޓަރު ވިދާޅުވިއެވެ.
މި ރަސްމިއްޔާތުގައި ސަފީރު ޗައިބީ ވިދާޅުވީ، ރާއްޖޭގައި ހުރި ހިރިގަލު މިސްކިތްތަކަކީ މިވަގުތު ދުނިޔޭގައި ހުރި މިފަދަ ހަމައެކަނި މިސްކިތްތައްކަމުން، އެ މިސްކިތްތަކަކީ ދިވެހިންގެ މުހިއްމު ތަރިކައެއް ކަމަށާއި، އަދި އެ މިސްކިތްތަކާއި ގުޅޭ މައުލޫމާތު މިފަދަ ވެބްސައިޓެއް މެދުވެރިކޮށް ލިބޭނެ މަގު ތަނަވަސްކޮށްދެވުން މިއީ ކުރެވުނު މުހިއްމު މަސައްކަތެއް ކަމަށެވެ.
ވެބްސައިޓް ގާއިމްކުރުމުގައި އިސްކޮށް މަސައްކަތްކުރެއްވި މައުރޫފް ޖަމީލް މި ރަސްމިއްޔާތުގައި ވިދާޅުވީ، މި ވެބްސައިޓް މެދުވެރިކޮށް މިހާރު ރާއްޖޭގައި ހުރި ހުރިހާ ހިރިގަލު މިސްކިތްތަކާއި ގުޅޭ މައުލުމާތު ލިބޭނެ ކަމަށާއި، އަދި ކުރިއަށް އޮތްތަނުގައި މި ވެބްސައިޓް އިތުރަށް ތަރައްގީ ކުރާނެ ކަމަށެވެ.
ކޮރަލް ސްޓޯން މޮސްކްސް އޮފް ދި މޯލްޑިވްސް ވެބްސައިޓް ފަރުމާކޮށްފައިވަނީ ދިވެހި ބަހާއި އިނގިރޭސި ބަހުންވެސް މައުލޫމާތު ހިމަނައިގެންނެވެ.
މި ވެބްސައިޓްގައި ރާއްޖޭގައި ހުރި ހިރިގަލު މިސްކިތްތަކާއި، އެ މިސްކިތްތައް ހުރި ތަންތަނާއި، މިސްކިތްތަކުގެ ފަރުމާ އާއި، އެ މިސްކިތްތަކުގެ ތާރީޚުވެސް ހިމަނާފައިވެއެވެ. މީގެ އިތުރުން ފަންނީ ގޮތުން ރާއްޖޭގެ ހިރިގަލު މިސްކިތްތަކުގައި ފާހަގަކުރެވޭ ކަންކަމުގެ ތަފްޞީލުތައްވެސް މި ވެބްސައިޓްގައި ވަނީ ހިމަނާފައެވެ. އަދި ކުރިއަށް އޮތް ތަނުގައި މިސްކިތްތަކުގެ ހާލަތަށް އަންނަމުންދާ ބަދަލުތައްވެސް މި ވެބްސައިޓް މެދުވެރިކޮށް ބެލޭނެ އިންތިޒާމު ހަމަޖެހިގެން ދާނެއެވެ.
ހޯމަ ދުވަހު އާންމުކުރި ވެބްސައިޓްގެ ވެބްއެޑްރެހަކީ www.coralstonemosques.com އެވެ.
