ކޮވިޑް-19 އާ ގުޅިގެން އަންގާރަ ދުވަހުގެ ދަންވަރު 2:30 އާ ހަމައަށް ރާއްޖޭގެ އެކި ހިސާބުތަކުން 307 ގެ އެއް މޮނިޓަރިން ޙާލަތަށް ގެނެސްފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭއިން) ހާމަކޮށްފި އެވެ.

އެޗްޕީއޭއިން އެންމެ ފަހުން ޢާންމުކޮށްފައިވާ ލިސްޓުގައި މާލެ އާއި ހުޅުމާލެ އަދި ވިލިމާލޭގެ ގިނަ ޢަދަދެއްގެ ގެއެއް މޮނިޓަރިންގ ޙާލަތަށް ވަނީ ގެނެސްފަ އެވެ. އަދި ރާއްޖޭގެ އެކި ރަށްރަށުން ވެސް ގެތައް މޮނިޓަރިންގ އަށް ލާފައިވާއިރު އޭގެތެރޭގައި ޕޮޒިޓިވްވި ކޭސްތައް ފެނުނު ރަށްރަށާ،އި އެނޫން ރަށްރަށް ވެސް ހިމެނެ އެވެ.

މެއި މަހުގެ 11 ވަނަ ދުވަހު 13 ގެޔެއް މޮނިޓަރިންގ ޙާލަތަށް ވަނީ ގެނެސްފަ އެވެ. މޮނިޓަރިންގ ގެ ޙާލަތުގައި މީހުން ދިރިއުޅޭ ގެތަކުގެ އިތުރުން ގެސްޓް ހައުސްތައް ވެސް ހިމެނެއެވެ.

މިވަގުތު ކަރަންޓީނުގެ ޙާލަތުގައި ގޯޑައުން އާއި ފިހާރަ އަދި ކްލިނިކެއް ހުރިއިރު އޭގެތެރޭގައި ހިމެނެނީ 6 ތަނެކެވެ. ނަމަވެސް ކްލިނިކެއް މިވަގުތު ކަރަންޓީނު ހާލަތުގައި ނެތެވެ.

މޮނިޓަރިން ނުވަތަ ކަރަންޓީނުގެ ޙާލަތުގައި މުޅި ރާއްޖެއިން މިވަގުތު ވަނީ ހަ ރަށެކެވެ. އޭގެ ތެރޭގައި ހިމެނެނީ މާލެ ސިޓީ، ކ. ތުލުސްދޫ ، ށ އަތޮޅުން ނަރުދޫ އަދި މިލަންދޫ އެވެ. މީގެ އިތުރުން ހއ ތަކަންދޫ އަދި ނ އަތޮޅުން މަނަދޫ އެވެ.

މާލެ ސިޓީން ކޮވިޑް-19 ފެނުމާއެކު މާލެ ސިޓީ ވަނީ ލޮކްޑައުން ކޮށްފަ އެވެ. ކ ތުލުސްދޫ މޮނިޓަރިން ގެ ޙާލަތަށް ގެނެސްފައި ވަނީ އެރަށުގައި މަސައްކަތް ކުރަމުންދިޔަ ބިދޭސީންތަކެއް ކޮވިޑް-19ށް ޕޮޒިޓިވްވުމާއި ގުޅިގެންނެވެ. ށ ނަރުދޫ އަދި މިލަންދޫ މޮނިޓަރިންގ ގެ ޙާލަތުގައި އޮތީ އެރަށްރަށުން ކޮވިޑް-19 އަށް މީހުން ޕޮޒިޓިވްވުމާއި ގުޅިގެންނެވެ. ހއ ތަކަންދޫވެސް މޮނިޓަރިންގ ގެ ހާލަތުގައި އޮތީ އެރަށުން ކޮވިޑް-19 އަށް މީހުން ޕޮޒިޓިވް ވުމުންނެވެ. އެހެންނަމަވެސް ނ މަނަދޫ މޮނިޓަރިންގ ޙާލަތަށް ގެނެސްފައިވަނީ ވެސް އެރަށުން މީހަކު ވައިރަސްއަށް ޕޮޒިޓިވް ވުމުންނެވެ. ނަމަވެސް އެމީހާ ޕޮޒިޓިވްވިކަން އެނގުނީ މާލެއަށް އައިފަހުންނެވެ.

ރާއްޖޭގައި މިހާތަނަށް ކޮވިޑް-19 އަށް 897 މީހުން ވަނީ ޕޮޒިޓިވްވެފަ އެވެ. މީގެތެރޭގައި 302 ދިވެހިން ހިމެނެ އެވެ.