ކޮވިޑްގެ ހާލަތުން އަރައިގަނެ އާންމު ދިރިއުޅުމަށް ބަދަލުވާއިރު، ނިއު ނޯމަލްގައި އަމަލުކުރާނެ ގޮތާއި ގުޅިގެން މަޝްވަރާތައް ކުރެވެމުންދާ ކަމަށް އެޑިއުކޭޝަން މިނިސްޓަރ އައިޝާތު އަލީ ވިދާާޅުވެއްޖެ އެވެ.
ހޯމަ ދުވަހުގެ ރޭ ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި ވާހަކަދައްކަވަމުން މިނިސްޓަރ ވިދާޅުވީ ނިއު ނޯމަލްގައި އަމަލުކުރާނެ ގޮތުގެ މަޝްވަރާތައް މިހާރު ކުރެވެމުން އަންނަ ކަމަށެވެ. އަދި އެ ހާލަތުގައި ސުކޫލުތަކުގައި ކިޔަވައިދޭން ފަށަން ތައްޔާރު ވަމުން އަންނަ ކަމަށެވެ.
މިނިސްޓަރ ވިދާޅުވީ އިޖުތިމާއީ ގައިދުރުކުން ބަހައްޓައިގެން ސްކޫލްތަކުގައި ކިޔަވައިދޭން ފަށާއިރު ބައެއް ސުކޫލުތަކުގައި ހަތަރު ދަންފަޅިއަަށް ބަހާލައިގެން ކިޔަވައިދިނުމުގެ މަޝްވަރާ ކުރެވެމުންދާ ކަމަށެވެ. މިއަހަރު ގިނަ ސްކޫލްތަކުގެ ކިޔެވުން ވަނީ އެއް ދަންފަޅިއަށް ބަދަލުކޮށްފަ އެވެ.
ހަތަރު ދަންފަޅިއަށް ކިޔެވުން ބަދަލުކުރެވުމާއި އެކު ސުކޫލުގައި ދަރިވަރު ހޭދަ ކުރާ ވަގުތު ވަރަށް ބޮޑުތަނުން ކުޑަވެގެންދާނެ ކަން ފާހަގަކުރައްވާ މިނިސްޓަރ ވިދާޅުވީ ދަރިވަރުންނާއި ޓީޗަރުންނާއި ބައްދަލުވާ ވަގުތުވެސް މަދުވާނެ ކަމަށެވެ. އަދި ފިލާވަޅުތައް ވެސް ނެގުމަށް ހަމަޖެހިފައިވަނީ 'ޑިސްޓެންސް މޯޑުން' ކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ ނިއު ނޯމަލްގައި އަމަލު ކުރާނެ އުސޫލާއި ގުޅިގެން މަޝްވަރާތައް ކުރެވެމުންދާކަމަށާއި އެހެންނަމަވެސް، އަދި އެ އުސޫލު މުޅިން ފައިނަލް ނުވާ ކަމަށެވެ.
ކޮވިޑް-19 އިން ރައްކާތެރިވުމަށް އެޅި ފިޔަވަޅުތަކުގެ ތެރެއިން، މަރޗް މަހުގެ 11 ވަނަ ދުވަހުން ފެށިގެން ވަނީ ބަންދުކުރެވިފަ އެވެ. އަދި މިއާއެކު ކިޔަވަމުންދިޔަ އެތައް ކުދިންނެއްގެ ކިޔެވުން ވަނީ ހުއްޓިފަ އެވެ. އަދި ސަރުކާރުން ފެށި ޓެލެކްލާސްތައް ވެސް، މާލެ ލޮކްޑައުންވުމާއެކު ވަނީ ހުއްޓާލާފަ އެވެ.
