ލޮކްޑައުންގެ ސަބަބުން ވައިރަސް ފެތުރޭ މިންވަރު މަޑުޖައްސާލެވިއްޖެ: ނެޝަނަލް ޓާސްކްފޯސް
11 މެއި 2020 | ހޯމަ 20:55މިހާރު އަޅާފައި ހުރި ފިޔަވަޅުތައް އުނދަގޫ ނަމަވެސް، ދެމެހެއްޓުން މުހިންމު: ރައީސް އޮފީސް
ހޯމަ ދުވަހު އޮތް ނެޝަނަލް ޓާސްކްފޯސް ބައްދަލުވުމުގައި ރައީސް ބައިވެރިވަޑައިގަންނަވަނީ
ގްރޭޓަރ މާލެ ސަރަހައްދު ފުރަބަންދުކުރުމާއި ގުޅިގެން، ވައިރަސް ފެތުރީ މިންވަރު މަޑުޖައްސާލެވިފައިވާކަމަށް ނެޝަނަލް ޓާސްކްފޯހުން ހާމަކޮށްފި އެވެ.
ކުރިއަށް އޮތް ދެ ހަފުތާއަށް ހެދިފައިވާ އަންދާޒާތަކާއި ގުޅޭގޮތުން ނެޝަނަލް ޓާސްކްފޯހުގެ ހޯމަ ދުވަހުގެ ބައްދަލުވުމުގައި ވަނީ މަޝްވަރާކޮށްފަ އެވެ. މިހާތަނަށް ހެދިފައިވާ ޕްރޮޖެކްޝަންތަކަށް ބަލާއިރު، ކުރިއަށް އޮތް ދެ ހަފުތާގެ ތެރޭގައި ސަރޖެއް (ބަލި ޖެހޭ މީހުންގެ އަދަދު ކުއްލިއަކަށް އިތުރުވުމެއް) އަންނާނެ ކަމަށް ވަނީ އަންދާޒާކޮށްފަ އެވެ.
އެގޮތުން މި ހިނގާ މެއި މަހުގެ 31 ވަނަ ދުވަހަށް މި ސަރޖްގެ ގުދު އެންމެ މައްޗަށް ދާއިރު، އަލަށް 1523 ކޭސްއެއް ފެންނާނެ ކަމަށް ވަނީ އަންދާޒާކޮށްފަ އެވެ. އަދި މި ސަރޖްގެ ގުދު ތިރިކުރުމަށް މިހާރު އަޅާފައިވާ ފިޔަވަޅުތައް ދަމަހައްޓަން ޓެކްނިކަލް އެޑްވައިޒަރީ ގްރޫޕް (ޓެގް) އިން ވަނީ ލަފާއަރުވާފަ އެވެ.
ޓާސްކްފޯހުގެ ބައްދަލުވުމާއި ގުޅިގެން މަޝްވަރާކުރެވުނު ބައެއް ކަންކަން ހިއްސާކުރައްވާ އާންމުކުރި ޓްވީޓެއްގައި ރައީސް އޮފީހުން ބުނެފައިވަނީ، އުނދަގޫ ނަމަވެސް މިހާރު އަޅާފައިވާ ފިޔަވަޅުތައް ދެމެހެއްޓުމަކީ މުހިންމުކަމެއް ކަމަށެވެ. މިހާރު އަޅާފައިވާ ފިޔަވަޅުތައް އިތުރަށް ހަރުކަށި ކުރުމުގެ މަޝްވަރާތައް ކުރިއަށް ނުދާކަމަށް، އެންއީއޯސީގެ ތަރުޖަމާނު މަބްރޫކް އަޒީޒް ވަނީ ވިދާޅުވެފަ އެވެ.
މިހާރު އަޅާފައިވާ ފިޔަވަޅުތައް އިތުރަށް ހަރުކަށި ކުރުމުގެ ވިސްނުމެއް ނުގެންގުޅުއްވި ނަމަވެސް، ބައެއް ކަހަލަ އިންތިޒާމްތައް ވަގުތީ ގޮތުން ހުއްޓާލުމުގެ ވިސްނުމެއް ގެންގުޅެ އެވެ. އެގޮތުން، މާލޭގައި ތާށިވެފައި ތިބި މީހުން ރަށްރަށަށް ފޮނުވާލުމުގައި އިތުރު ވިސްނުމަކަށް ދާން ޖެހިދާނެ ކަމަށް ސަރުކާރުން ވަނީ ހާމަކޮށްފަ އެވެ.
މިހާރު ގެންގުޅޭ އުސޫލަށް ބަލާއިރު، ރަށްރަށަށް އަނބުރާ ދާން ބޭނުންވާ ފަރާތްތަކުން ޖެހެނީ ޓްރާންސިޓް ކަރަންޓީނު ފެސިލިޓީއެއްގައި 14 ދުވަހުގެ މުއްދަތެއް ހަމަކުރާށެވެ. ކުރިން ރަށްތަކުގައި ކަރަންޓީނުކުރާ ގޮތަށް އޮތް އޮތުން ބަދަލުކުރީ، އަތޮޅުތެރޭގައި ބަލި ފެތުރިދާނެ ކަމުގެ ބިރު އޮތުމާއި އެކުގަ އެވެ.
