ކަންކަން ހައްލުކުރުމަށް އަމާޒު ހިފައިފިނަމަ މި ކާރިސާއަކީ ކަންކަން ހައްލުކުރުމަށް ލިބޭ ފުރުސަތެއް ޓުއަރިޒަމް މިނިސްޓަރ އަލީ ވަހީދު ވިދާޅުވެއްޖެ އެވެ.

ކޮވިޑް-19 އާ ގުޅިގެން ރާއްޖެޓީވީން ގެނެސްދިން ޚާއްސަ ކަވަރޭޖަށް މައުލޫމާތު ދެއްވަމުން މިނިސްޓަރ ވިދާޅުވީ, މި ސަރުކާރު އައީ ރާއްޖޭގައި ހުރި މައްސަލަތައް ހައްލުކުރަން ކަމަށާއި އިދިކޮޅު ފަރާތްތަކާއި ހަނގުރާމަކުރުމަށް ނޫން ކަމަށެވެ.

މި ދަނޑިވަޅުގައި ހައްލުކުރަން ޖެހިފައިވާ ގިނަ މައްސަލަތަކަކީ، އެހެން ސަރުކާރުތަކުގެ އިހުމާލުން ވާރުތަވެފައިވާ މައްސަލަތަކެއް ކަމަށް އިޝާރާތްކުރައްވާ އަލީ ވަހީދު ވިދާޅުވީ، މި ހާލަތާއި ގުޅިގެން ދިގުލައިގެން ގޮސްފައިވާ އެތައް މައްސަލައެއް ހައްލުކުރަން ޖެހިފައިވާ މައްސަލަތަކެއް ކަމަށެވެ. އަދި މި ހުރިހާ ކަމެއް ކުރަން ޖެހުނީ މިއަދު އޮތް ސަރުކާރަށް ކަމަށް ވިދާޅުވި އެވެ.

އަލީ ވަހީދު ދެއްކެވި ވާހަކަފުޅުގައި އޭނާވަނީ މިސާލެއްގެ ގޮތުގައި ބިދޭސީންގެ މައްސަލަ ފާހަގަކުރައްވާފަ އެވެ. އެގޮތުން، ބިދޭސީންގެ މައްސަލައަކީ އިއްޔެއަކު މިއަދަކު އައިސްފައިހުރި މައްސަލަތަކެއް ނޫން ކަމަށް ވިދާޅުވި އެވެ. އަދި އެއީ ޒަމާންތަކެއް ވަންދެން އެތައް ބަޔެއްގެ އިހުމާލުން މިއަދާ ހަމައަށް ހައްލުނުވެ ހުރި މައްސަލައެއްކަން ފާހަގަކުރެއްވި އެވެ.

މިކަން ހައްލުކުރަން ސަރުކާރުން ގެންގުޅޭ ވިސްނުން ހިއްސާކުރައްވަމުން އަލީ ވަހީދު ވިދާޅުވީ، ރައީސް މިކަމުގައި އިސްނަންގަވައިގެން އެކުރައްވާ މަސައްކަތުން ސަރުކާރުގެ މިސްރާބު ހުރި ދިމާ ވަރަށް ސާފު ކަމަށެވެ. އަދި ސަރުކާރުން އަމާޒުހިފައިފައި ވަނީ މި މައްސަލައަށް ދާއިމީ ހައްލެއް ގެނައުން ކަމަށް ވިދާޅުވި އެވެ.

ބިދޭސީންގެ މައްސަލަ ދިގުލައިގެން ގޮސް ހައްލުނުވެ އޮތުމާއި ގުޅިގެން އިތުރު މައްސަލަތަކެއް ދިމާވާކަން މިނިސްޓަރ އަލީ ވަހީދު ފާހަގަކުރެއްވި އެވެ.

މިހާރު ދިމާވެފައިވާ ހާލަތުން އަރައިގަތުމަށް ކުރަންޖެހޭ ބައެއް ކަންކަމަށް އަލިއަޅުވާލާ މިނިސްޓަރ އަލީ ވަހީދު ވިދާޅުވީ، ރާއްޖޭގައި އުފެދިފައި އޮތް އިގްތިސާދު އޮންނާންވާނީ ރާއްޖޭގައި ކަމަށާއި ރާއްޖޭގެ ފައިސާ އެނބުރެން ޖެހޭނީ ރާއްޖޭގައި ކަމަށެވެ.

މިކަން ހައްލުކުރަން ގެންގުޅޭ ވިސްނުން ހިއްސާކުރައްވަމުން އަލީ ވަހީދު ވިދާޅުވީ، ދިވެހިންގެ މައްޗަށް އިގްތިސާދު ބައްޓަންވާންޖެހޭ ކަމަށެވެ. އަދި ދިވެހިންގެ މައްޗަށް އިގްތިސާދު ބައްޓަންކުރަން، ވަޒީފާގެ ބާޒާރުގައި ދިވެހިން މެޖޯރިޓީ އިތުރުކުރަން މަސައްކަތްތަކެއް ކުރަންޖެހޭ ކަމަށް ވިދާޅުވިއެވެ.

އިގްތިސާދު އަލުން ފަށައިގަންނައިރު، މިހާރު ހުރި ބައެއް ވަޒީފާތަކަށް ދިވެހިން ނިކުތުމަށް އަލީ ވަހީދު ގޮވާލެއްވި އެވެ. މިހާރުވެސް އުސޫލެއް ކަނޑައެޅިފައިވާއިރު، ހަމައެކަނި އުސޫލަކުން އެކަން ނުވާނެ ކަމަށް ވިދާޅުވި އެވެ. އަލީ ވަހީދު އެ އިޝާރާތްކުރެއްވީ ޓޫރިސްޓު ރިސޯޓުތަކުގައި ގެންގުޅެންޖެހޭ ރޭޝިއޯއަށެވެ.

ރޭޝިއޯގައިވާ ގޮތުންނަމަ، ރިސޯޓެއްގައި މަސައްކަތްކުރާ ސްޓާފުންގެ ތެރެއިން އަގުލަބިއްޔަތެއް އޮންނަންވާނީ ދިވެހި މުވައްޒަފުންގެ އެވެ. ނަމަވެސް، ރާއްޖޭގެ މަދު ރިސޯޓެއްގައި މެނުވީ މި ރޭޝިއޯއަށް މުވައްޒަފުން ނުތިބޭކަން މިދިޔަ އަހަރު ހެދި ފަތުރުވެރިކަމުގެ ހިދުމަތްދޭ ތަންތަނުގެ ދިރާސާއިން ވަނީ ހާމަވެފަ އެވެ.