ޓެސްޓިންގ ކެޕޭސިޓީ އިތުރުކުރަން ޕްރައިވެޓް ހޮސްޕިޓަލުތަކުން މަސައްކަތްކުރަނީ

ކޮވިޑް-19 އާ ގުޅިގެން ބޭނުންވާ ޓެސްޓުތައް ހެދުމުގެ ކެޕޭސިޓީ އިތުރުކުރުމަށް އަމިއްލަ ހޮސްޕިޓަލުތަކުން މަސައްކަތް ކުރަމުން އަންނަކަމަށް ހާމަކޮށްފި އެވެ.

އެންއީއޯސީގައި ހޯމަ ދުވަހު އޮތް ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު މަބްރޫކް އަޒީޒް ވިދާޅުވީ، ޓެސްޓު ހައްދަން ބޭނުންވާ ޕީސީއާރް މެޝިންތައް ގެނައުމުގެ މަސައްކަތް ޕްރައިވެޓް ހޮސްޕިޓަލުތަކުން ކުރަމުން އަންނަ ކަމަށެވެ.

މިހާތަނަށް ހާމަކޮށްފައިވާ ބައެއް މައުލޫމާތުތަކަށް ބަލާއިރު، މި ހިނގާ މެއި މަސް ނިމުމުގެ ކުރިން މި ޓެސްޓު ހައްދަން ބޭނުންކުރާ މެޝިނަށް ބޭނުންކުރާ ޖީންއެކްސްޕާޓް މެޝިނަށް ލައްވާ ކާޓްރިޖް ލިބޭނެކަމަށް މަބްރޫކް ވަނީ ވިދާޅުވެފަ އެވެ. މި ވަގުތު ރާއްޖޭގައި ކޮވިޑް ސްޕެސިފިކް ޓެސްޓަކަށް ހެއްދެނީ މި ޓެސްޓު އެކަންޏެވެ.

ޓެސްޓިންގ ކެޕޭސިޓީގެ މައްސަލައަކީ މި ނުރައްކާތެރި ބަލިން ރާއްޖެ ސަލާމަތްވުމަށް ކުރާ މަސައްކަތަށް ދިމާވެފައިވާ އެންމެ ބޮޑު ގޮންޖެހުމެވެ. އަދި މުޖުމަތައުގެ ތެރޭގައި ވައިރަސް ފެތުރިފައިވާ މިންވަރު ދެނެގަތުމަށް ކުރާ މަސައްކަތަށް އެޅޭ އެންމެ ބޮޑު ހުރަހަކީ މިއީ ކަމަށް ޑޮކްޓަރުންގެ ޓީމުން ވަނީ ހާމަކޮށްފަ އެވެ.

އިތުރު ޓެސްޓިންގ މެޝިނެއް މެއި މަހުގެ 18 ވަނަ ދުވަހު އަންނާނެކަން އިއުލާންކޮށްފައިވާއިރު، މިއާއެކު ދުވާލެއްގެ މައްޗަށް ހެއްދޭ ޓެސްޓުތަކުގެ އަދަދު 600 އާއި 650 އާ ދޭތެރޭގެ އަދަދަކަށް އިތުރުކުރެވޭނެ ކަމުގެ ޔަގީންކަން ސަރުކާރުން ވަނީ އަރުވާފަ އެވެ. މި ވަގުތު ރާއްޖޭގައި ހެއްދެނީ ދުވާލެއްގެ މައްޗަށް 400 ޓެސްޓެކެވެ.