މި ސީޒަން ނިމެންދެން ޔުނައިޓެޑުގައި މަޑުކުރަން ބޭނުން: އިގާލޯ

މި ސީޒަން ނިމެންދެން މެންޗެސްޓާ ޔުނައިޓެޑްގައި މަޑުކުރަން ބޭނުންވާ ކަމަށް ޝަންހާއި ގްރީންލެންޑް ޝެންހުއާގެ ލޯނު އެއްބަސްވުމުގައި ހުރި ނައިޖީރިއާގެ ފޯވާޑް އޮޑިއޯން އިގާލޯ ބުނެފި އެވެ.

ޗައިނާގެ ޝަންހާއި އިން ޔުނައިޓެޑަށް އިގާލޯ ބަދަލުވީ ޖެނުއަރީ މަހު ލޯނު އެއްބަސްވުމެއް ދަށުންނެވެ. ޔުނައިޓެޑާއެކު އިގާލޯ ހަދާފައިވާ އެއްބަސްވުމުގެ މުއްދަތު މިމަހުގެ 31 ގައި ހަމަވާއިރު، އިނގިރޭސި ޕްރިމިއާ ލީގު ޖޫން މަހުގެ ތެރޭގަ އެވެ.

ކޮވިޑް-19 އާ ގުޅިގެން ޗައިނީސް ސުޕަ ލީގުގެ ކުޅުން ހުއްޓާލާފައިވާއިރު، މަހެއްހާ ދުވަސް ތެރޭ ޗައިނީސް ސުޕަ ލީގު ފަށަން މަސައްކަތްކުރަމުން އަންނަ ކަމަށް ރިޕޯޓުތައް ބުނެއެވެ. އެއާއެކު ޔުނައިޓެޑުގެ އެއްބަސްވުން ހަމަވުމުން ޝަންހާއި އިން އިގާލޯ އަލުން އަނބުރާ ގެންދަން ބޭނުންވާ ކަމަށް ރިޕޯޓުތައް ބުނެ އެވެ.

ދާދި ފަހުން އިގާލޯ ބުނީ މިވަގުތު ޔުނައިޓޭދުގައި ރަނގަޅު ކުޅުމެއް ދެއްކެމުން އަންނަ ކަމަށާއި، މި ސީޒަން ނިމެންދެން ފުރުސަތު އޮތްނަމަ، ޔުނައިޓެޑުގައި މަޑުކުރަން ބޭނުންވާ ކަމަށެވެ.

ރިޕޯޓުތައް ބުނާ ގޮތުން ޔުނައިޓެޑުން މިހާރު އަންނަނީ އިގާލޯގެ އެއްބަސްވުން ދާއިމީ ކުރުމަށް މަސައްކަތް ކުރަމުންނެވެ. އެކަމަކު ޝަންހާއި އިން އެކަމަށް އެއްބަސްވާނީ އިގާލޯ ގަތުމަށް 20 މިލިއަން ޕައުންޑު ދެއްކުމުން ކަމަށްވެސް ރިޕޯޓުތައް ބުނެ އެވެ.

ޔުނައިޓެޑަށް މިހާތަނަށް ކުޅުނު 8 މެޗުގައި 4 ލަނޑު ކާމިޔާބުކޮށްފައިވާ އިގާލޯ، ޝަންހާއި އާއެކު ހަދާފައިވާ އެއްބަސްވުން އާކުރަން އެ ކްލަބުންވެސް މިހާރު އަންނަނީ މަސައްކަތް ކުރަމުންނެވެ. ޝަންހާއި އާއެކު އިގާލޯ ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، އެ ކްލަބުން އަންނަނީ 2024 ގެ ނިޔަލަށް އިގާލޯގެ އެއްބަސްވުން އާކުރަން މަސައްކަތް ކުރަމުންނެވެ.