ރާއްޖޭގައި މަަސައްކަތްކުރާ ބަންގްލަދޭޝްގެ އިތުރު 374 މީހަކު މި މަހުގެ 15 ވަނަ ދުވަހު ފޮނުވާލާ ގޮތަށް ހަމަޖެހިއްޖެ އެވެ.

ރާއްޖެ.އެމްވީ އަށް މައުލޫމާތު ލިބިފައިވާ ގޮތުގައި މި މީހުން ފޮނުވަން ހަމަޖެހިފައިވަނީ އެ ގައުމުގެ ބިމަން އެއާލައިންގަ އެވެ. އެކަމާއި ގުޅޭ ގޮތުން ސަރުކާރުގެ އިސް އޮފިޝަލަކު ވިދާޅުވީި، ލޭބަރ ރިލޭޝަން އޮތޯރިޓީއާ ފޮރިން މިނިސްޓްރީއާ ގުޅިގެން ބަންގްލަދޭޝްގެ މީހުންތަކެއް ފޮނުވުމުގެ މަސައްކަތް ކުރަމުންދާ ކަމަށެވެ. ނަމަވެސް އިތުރު ތަފްސީލެއް އޭނާ ހާމައެއް ނުކުރައްވަ އެވެ.

ކޮވިޑް-19 ރާއްޖޭގައި ފެތުރެމުން އަންނައިރު މާލޭގައި ތޮއްޖެހިގެން ބިދޭސީން ދިރިއުޅޭ ތަންތަނުން ގިނަ އަދަދެއްގެ ބަންގްލަދޭޝް މީހުން ވަނީ ބައްޔަށް ޕޮޒިޓިވްވެފަ އެވެ. ފުލުހުން ދަނީ ތޮއްޖެހިގެން ބިދޭސީން ދިރިއުޅޭ ތަންތަން މޮނިޓަރ ކުރަމުންނެވެ.

އޭގެ އިތުރުން ތޮއްޖެހިން ދިރިއުޅޭ ބިދޭސީން އެހެންތަނަކަށް ބަދަލު ކުރުމުގެ މަސައްކަތް ސަރުކާރުން ވަނީ ފަށާފަ އެވެ. އެގޮތުން ބައެއް ބިދޭސީންތައް ވަނީ މިހާރު ގުޅީފަޅަށް ބަދަލުކޮށްފަ އެވެ. ކުރިޔަށް އޮތް ދުވަސްތަކުގައި އިތުރު ބިދޭސީންތަކެއް އެހެން ދިމަދިމާލަށް ބަދަލު ކުރުމުގެ މަސައްކަތް ދަނީ ކުރަމުންނެވެ.

މި މަހުގެ ހަތަރު ވަނަ ދުވަހު ގައުމާ މުހާތަބުކުރައްވާ ދެއްވި ހިތޯބުގައި ރައީސް އިބްރާހިމް މުހައްމަދު ސޯލިހު ވިދާޅުވީ، ބަންގްލަދޭޝްގެ 1500 މީހަކު ފޮނުވާލުމަށް ހަމަޖެހިފައިވާ ކަމަށެވެ. ރައީސް ސޯލިހުގެ ހިތޯބުގައި އެމަނިކުފާނު ވިދާޅުވެފައިވަނީ ބަލި ފެތުރުން ކޮންޓްރޯލް ކުރުމުގައި، ކުރިމަތިވާ އެންމެ ބޮޑު ދައްޗަކީ ބިދޭސީން ކަމަށެވެ.