ކައުންސިލްތަކުގެ މުއްދަތު އިތުރުކުރަން ހުށަހަޅާފައިވާ ހާއްސަ ބިލަށް ހިޔާލު ހުށަހެޅުމަށް ހުޅުވާލައިފި

ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ހުށަހަޅުއްވާ "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" ބިލާ ގުޅިގެން އާންމުންގެ ހިޔާލު ހުށަހެޅުމަށް ފުރުސަތު ހުޅުވާލައިފި އެވެ.

ރައްޔިތުންގެ މަޖިލީހުގެ އިދާރާއިން ހޯމަ ދުވަހު ކޮށްފައިވާ އިއުލާނެއްގައި ވަނީ، މަޖިލީހުގެ ލާމަރުކަޒީ ކޮމެޓީން މިހާރު ދިރާސާކުރަމުންދާ "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" އަށް އާންމުންގެ ހިޔާލު ހުށަހެޅުމުގެ ފުރުސަތު ހޯމަ ދުވަހުން ފެށިގެން ހުޅުވާލާފައިވާ ކަމަށެވެ.

އެއިއުލާންގައި ބުނެފައިވާ ގޮތުން، އެއްވެސް ހިޔާލެއް ނުވަތަ ކޮމެންޓެއް ކުރައްވަން ބޭނުންވާ ފަރާތްތަކުން މިމަހުގެ 18 ވަނަ ދުވަހުގެ 14:00ގެ ކުރިން ކޮމެޓީގެ އީމެއިލް އެޑްރެސް (committee@majlis.gov.mv) އަށް ލިޔުމުން ފޮނުއްވުން އެދޭ ކަމަށެވެ.

މިބިލަކީ މިހާރު ހިނގަމުންދާ ކައުންސިލްތަކުގެ ދައުރު އަންނަ ޖޫން މަހުގެ 3 ވަނަ ދުވަހު ހަމަވާތީ، ކައުންސިލްތަކުގެ އިންތިހާބު ބޭއްވި އާ ކައުންސިލަތައް އެކުލަވާލެވެންދެން މިހާރު ހިނގަމުންދާ ކައުންސިލްތައް ދެމިއޮންނާނެ ގޮތަށް ފަރުމާ ކޮށްފައިވާ ބިލެކެވެ.

މިބިލާ ގުޅިގެން ރައްޔިތުންގެ މަޖިލީހުގެ ގިނަ މެމްބަރުންގެ މެދުގައި ވަނީ ހިޔާލު ތަފާތުވެފަ އެވެ. އަދި އެޓަރނީ ޖެނެރަލް އިބްރާހީމް ރިފްއަތު ވެސް ވިދާޅުވެފައިވަނީ މިހާރު ހިނގަމުންދާ ކައުންސިލްތަކުގެ ދައުރު އިތުރު ކުރެވޭނީ، ގާނޫނުއަސާސީގެ 5 ވަނަ އިސްލާހު ގެނައުމުގެ ގާނޫނަށް، ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ އިސްލާހު ގެނައުމުގެ ބިލް ފާސްކޮށްގެން ކަމަށެވެ. އާންމު ގާނޫނަކުން ކައުންސިލްތަކުގެ ދައުރު އިތުރު ނުކުރެއްވޭނެ ކަމަށް އެޓަރނީ ޖެނެރަލް ވިދާލުވެފައި ވެއެވެ.

ކޮވިޑް-19 ޕެންޑަމިކް އާގުޅިގެން މިދިއަ އޭޕްރީލް މަހުގެ 4 ވަނަ ދުވަހު ބާއްވަން އޮތް ކައުންސިލްތަކުގެ އިންތިހާބު މިހާރު މިވަނީ ވަކި ތާރީހެއް ނެތްގޮތަށް ފަސްކޮށްފަ އެވެ. ނަމަވެސް ލޯކަލް ކައުންސިލްތަކުގެ އިންތިޚާބާ ގުޅޭ ޚާއްޞަ ގާނޫނު ރައީސުލްޖުމްހޫރިއްޔާ އިބްރާހިމް މުހައްމަދު ޞަލިހު އާދިއްތަ ދުވަހު ވަނީ ތަސްދީގު ކުރައްވާފަ އެވެ. އެ ގާނޫނު ބުނާގޮތުން ކުރިއަށް އެއް އަހަރުގެ ތެރޭގައި ކައުންސިލްތަކުގެ އިންތިހާބު ބާއްވާ ނިންމަން ޖެހެއެވެ.