މާލެއިން އެނބުރި ރަށްރަށަށް ދާން ބޭނުންވާ 5000 މީހުން އެބަތިބި: ޓޫރިޒަމް މިނިސްޓަރ

ރަށްރަށުން މާލެ އައިސް ތިބި މީހުންގެ ތެރެއިން އެނބުރި ރަށަށް ދާން ބޭނުންވާ 5000 މީހުން އެބަތިބި ކަމަށް ޓޫރިޒަމް މިނިސްޓަރ އަލީ ވަޙީދު ވިދާޅުވެއްޖެއެވެ.

ހޯމަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ، ރަށްރަށުން މާލެ އައިސް ތިބި ފަރާތްތަކުގެ ތެރެއިން އެނބުރި ރަށަށް ދާން ބޭނުންވެ, ނަން ނޯޓު ކޮށްފައިވާ 5000 މީހުން އެބަތިބި ކަމަށެވެ. އޭގެ ތެރެއިން ކޮންމެހެން ފުރުޞަތު ދޭން ޖެހޭ މީހުން ޝޯޓް ލިސްޓް ކުރުމުގެ މަސައްކަތް ކަމާބެހޭ އިދާރާތަކާއި ގުޅިގެން ކުރައްވަމުން ގެންދަވާކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، މިހާރުވެސް ރިސޯޓުތަކުން މާލެއައިސް މާލޭގައި ތާށިވެފައި ތިބި ވަރަށް ގިނަ މީހުން އެބަތިބި ކަމަށެވެ. އަދި މިނިސްޓްރީން ރިސޯޓުތަކާއި ގެސްޓްހައުސްތަކާ ގުޅިގެން ކުރަމުންދާ މަސައްކަތްތަކުގެ ދަށުން މިހާރުވެސް މާލޭގައި ތާށިވެފައި ތިބި މީހުންނަށް ގެސްޓްހައުސްތަކުން 500 ކޮޓަރި ޚާއްޞަ ކުރުމުގެ އިންތިޒާމުތައް ރާވަމުންދާކަން މިނިސްޓަރ ފާހަގަ ކުރެއްވިއެވެ.

މިނިސްޓަރ ވިދާޅުވީ، ކަރަންޓީން ފެސިލިޓީތަކުގެ ގޮތުގައި ރަށްރަށުގައި ޤާއިމު ކުރެވިފައިވާ ފެސިލިޓީތައް ބޭނުންކުރުން ވަގުތީ ގޮތުން މެދުކަނޑާލާފައިވާ ކަމަށާއި، އިތުރު ގޮތެއް ނިންމަންދެން ކުރިއަށް އޮތް ދުވަސްތަކުގައި ބޭނުންކުރާނީ ހަމައެކަނި "ޓްރާންސިޓް" ކަރަންޓީން ފެސިލިޓީތައް ކަމަށެވެ.

އަދި މިހާރު ޓްރާންސިޓް ކަރަންޓީން ފެސިލިޓީތަކަށް ނަގާފަހުރި ރިސޯޓުތަކުގެ ޖާގަހުރި ވަރަކުން އެތަންތަނަށް ގެންގޮސް 14 ދުވަހުގެ ކަރަންޓީން މުއްދަތު ފުރިހަމަ ކުރުމަށްފަހު، ޓެސްޓު ހެދުމަށްފަހު މެނުވީ ރަށަށް ނުދެވޭނެކަން ސަރުކާރުން މީގެ ކުރިން ހާމަކޮށްފައިވެއެވެ.