ގަވާއިދުތަކާ ޚިލާފަށް ދެ ފަހަރެއްގެ މަތިން އަމަލު ކުރެވުމުން، މެންޗެސްޓަރ ސިޓީގެ ޑިފެންޑަރު ކައިލް ވޯކާ ސަޕޯޓަރުންގެ ކިބައިން މާފަށް އެދިއްޖެ އެވެ.

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން އިނގިރޭސި ވިލާތުން ކަނޑައަޅާފައިވާ ގަވާއިދުތަކާ ދެ ފަހަރެއްގެ މަތިން ވޯކާ ވަނީ ޚިލާފުވެފައެވެ. އެގޮތުން އެންމެ ފުރަތަމަ މާރޗު މަހުގެ ތެރޭގައި ވޯކާ ވަނީ ގަވާއިދުތަކާ ޚިލާފަށް ޕާޓީއެއް ބާއްވާފައެވެ. އެކަމާ ގުޅިގެން ސިޓީން ވަނީ އޭނާއަށް ފިޔަވަޅު އަޅަންވެސް ނިންމާފައެވެ.

އަދި ދާދި ފަހުން ވޯކާ ވަނީ ލޮކްޑައުން ގަވާއިދުތަކާ ޚިލާފަށް އޭނާގެ އާއިލާ ގާތަށް ޒިޔާރަތް ކޮށްފައެވެ. އެކަމާ ގުޅިގެން ގިނަ ސަޕޯޓަރުން ވޯކާ އަށް ފާޑު ކީއިރު، ވޯކާ ވަނީ ސަޕޯޓަރުން އޭނާއަށް ފުރައްސާރަ ކުރި ކަމަށް ވެސް ބުނެފައެވެ.

އެކަމަކު ދާދި ފަހުން އުމުރުން 29 އަހަރުގެ ވޯކާ ވަނީ ކޮވިޑް-19 އާ ގުޅިގެން ކަނޑައަޅާފައިވާ ގަވާއިދުތަކާ ޚިލާފަށް އަމުލުކުރެވުމުން، ސަޕޯޓަރުންގެ ކިބައިން އެކަމަށް މާފަށް އެދިފައެވެ.

ވޯކާގެ މައްސަލަތަކެއް ފެންމަތިވީއިރު، މީގެ ކުރިން ޕްރިމިއަރ ލީގުގެ ބައެއް ކުޅުންތެރިންގެ ފަރާތުންވެސް ވަނީ ގަވާއިދުތަކާ ޚިލާފު އަމަލުތައް ފެނިފައެވެ.

ކޮވިޑް-19 އާ ގުޅިގެން އިނގިރޭސި ޕްރިމިއަރ ލީގު މެދުކަނޑާލާފައި ވާއިރު، ބައެއް ކްލަބުތަކުން މިހާރު ވަނީ ކުޅުންތެރިންނަށް އެކަނި ތަމްރީނުތައް ހެދުމުގެ ފުރުސަތު ދީފައެވެ.

މިދިޔަ މާރޗު މަހުގެ 8 ވަނަ ދުވަހު ޕްރިމިއަރ ލީގުގެ ކުޅުން މެދުކަނޑާލިއިރު، ޖޫން މަހު ޕްރިމިއަރ ލީގު އަލުން ފަށަން އަންނަނީ ތައްޔާރު ވަމުންނެވެ. އެގޮތުން ޕްރިމިއަރ ލީގުގެ މެޗުތައް ސަޕޯޓަރުން ނުވައްދާ ކުޅޭގޮތަށް ޖޫން މަހުގެ 8 ވަނަ ދުވަހު ފަށާ، ޖުލައި މަހުގެ 27 ވަނަ ދުވަހަށް ލީގު އެއްކޮށް ފުރިހަމަކުރަން އަންނަނީ މަސައްކަތް ކުރަމުންނެވެ.