ރާއްޖޭގެ ހުރިހާ ގެސްޓް ހައުސްތަކެއްގެ ހާލަތު ބަލަން ވަނީ ނިންމާފަ: ގޭމް

"ގެސްޓް ހައުސް އޮޕީނިއަން" ގެ ނަމުގައި ބާއްވަން ތައްޔާރުވަމުން އަންނަ ވަރޗުއަލް ޑިސްކަޝަންގައި ރާއްޖޭގެ ހުރިހާ ގެސްޓް ހައުސްތަކެއްގެ ޙާލަތު ބަލަން ނިންމާފައިވާ ގެސްޓް ހައުސް އެސޯސިއޭޝަނުން ބުނެފިއެވެ.

ރާއްޖެގެޓީވީގެ ކޮވިޑް-19ގެ ކަވަރޭޖަށް ދެއްވި އިންޓިވިއުއެއްގައި ގޭމްގެ ޕީއާރް އެންޑް މަރކެޓިންގ މުޙައްމަދު ޔާމީން ވިދާޅުވީ ރާއްޖޭގެ ހުރިހާ ގެސްޓް ހައުސްތަކަށް ޢަމާޒުކޮށްގެން މިފޯރަމް ބާއްވަން ނިންމީ މިދަނޑިވަޅުގައި އެފަރާތްތަކުގެ ކަންބޮޑުވުންތައް ސަރުކާރުގެ ކަމާބެހޭ އިދާރާތަކަށް ފޯރުކޮށްދިނުމަށް ކަމަށެވެ.

ޔާމީން ވިދާޅުވީ މިއީ ގެސްޓް ހައުސްތަކަށް އެންމެ ބޮޑަށް އެހީތެރިކަން ބޭނުންވާ ދަނޑިވަޅު ކަމަށާއި، މުހިންމު ނިންމުންތައް ނިންމުގައި ވިޔަފާރި ހިންގާ ފަރާތްތަކުގެ ޚިޔާލު ހޯދުމަކީ މުހިންމު ކަމެއްގެ ގޮތުގައި ދެކޭ ކަމަށެވެ.

މިހާރު ލިބޭ އެންމެ ބޮޑު ޝަކުވާއަކީ މާލީ ދަތިތަކުގެ ޝަކުވާކަން ފާހަގަކުރައްވައި ޔާމީން ވިދާޅުވީ، ފޯރަމްގެ ތެރެއިން ގެސްޓް ހައުސްތަކަށް ސަރުކާރަށް ކޮށްދެވޭނެ ކަންތައްތަކާއި، ދެވޭނެ ލުއި ހޯދުމަށް މަސައްކަތް ކުރާނެ ކަމަށެވެ.

މީގެ އިތުރުން ޔާމީން ވިދާޅުވީ ކޮވިޑް-19ގެ މިޙާލަތަށް ފަހު އަލުން ފަތުރުވެރިކަމުގެ ސިނާޢަތް ހުޅުވިގެން އަންނައިރު ބޮޑެތި ބަދަލުތަކެއް އަންނާނެ ކަމަށެވެ. އެހެންކަމުން ފަތުރުވެރިންނަށް ޚިދުމަތް ދޭނެ ގޮތަށް ބަދަލުތަކެއް އަންނާނެކަން ޔާމީން ފާހަގަކުރެެއްވިއެވެ. އަދި މިހާރު ޢަމަލުކުރާނެ އެސްއޯޕީއެއް ކަނޑައަޅާފައިވާ ކަމަށް ވިދާޅުވިއެވެ.

ޔާމީން ވިދާޅުވީ މި ޙާލަތުން އަރައިގަތުމަށް އިތުރަށް ގެސްޓް ހައުސްތައް ކުރިއެރުވުމަށް ކުރެވޭނެ މަސައްކަތްތަކާއި ބެހޭ ގޮތުން ޓޫރިޒަމް އިންޑަސްޓްރީން ހުރިހާ ޖަމްޢިއްޔާ ތަކާއެކު މަޝްވަރާ ބައްދަލުވުންތައް ބާއްވަމުން އަންނަ ކަމަށެވެ.

ޔާމީން ވިދާޅުވީ އެންމެ މުހިންމު ކަމެއްދޭނީ ގެސްޓް ހައުސްގެ ވިޔަފާރިތައް އިޝްތިހާރު ކުރުމަށް ކަމަށެވެ. އަދި ހުރިހާ ޕްލޭންތަކެއް ކާމިޔާބުވާނެ ކަމަށް އުންމީދު ކުރައްވާ ކަމަށެވެ. ޔާމީނު ވަނީ ޙާލަތު ބަދަލު ކުރުމަށް އެކި ފެންވަރުގައި ކުރަމުންދާ މަސައްކަތްތަކަށް ގެސްޓް ހައުސްގެ ވިޔަފާރިވެރިން އެއްބާރުލުމަށް އެދިފައިއެވެ.