ޔޫރަޕުގެ މާރކެޓުތަކުގައި ދިވެހި މަހުގެ ޑިމާންޑް ބޮޑުވަނީ

ކޮވިޑް-19އާ ގުޅިގެން ފުރަބަންދުކޮށްފައިވާ ޔޫރަޕުގެ ވިޔަފާރީގެ މާރކެޓުތައް އަލުން ހުޅުވަމުންދާއިރު ދިވެހި މަހަށް ޔޫރަޕުގެ ޤައުމުތަކުގައި އޮތް ޑިމާންޑު ބޮޑުވާން ފަށައިފިއެވެ.

މޯލްޑިވްސް ސީފުޑް ޕްރޮސެސަރސް އެންޑް އެކްސްޕޯޓާސް އެސޯސިއޭޝަން (އެމްއެސްޕީއީއޭ) އިން ނެރުނު ބަޔާނެއްގައި ބުނެފައިވަނީ ޔޫރަޕުގެ މާރކެޓުގައި މަހުގެ އަގު ރަނގަޅުވަމުން ދިޔުމާއެކު ކުރިން 25 ރުފިޔާއަށް ގަންނަމުން އައި ބޮޑު ކަންނެލި ކިލޯއެއް، މަސް ކުންފުނިތަކުން މިހާރު ގަންނަމުން ދަނީ 60 ރުފިޔާއަށް ކަމަށެވެ.

އެމްއެސްޕީއީއޭ އިން ބުނީ ކޮންމެ އަހަރެއްގެ ވެސް ރަމަޟާން މަހަކީ ރާއްޖޭގެ މަސްވެރިން، މަހަށް ފުރުން މަދު ދުވަސް ވަރަކަށް ވުމާއެކު ޔޫރަޕަށް އެކްސްޕޯޓް ކުރަން ބޭނުންވާ މިންވަރަށް މަސް ނުލިބޭ މައްސަލަ ކުރިމަތުވަމުން އަންނަ ކަމަށެވެ. އެއީ ދިވެހި މަހަށް ޔޫރަޕުގައި އޮތް މާރކެޓް ގެއްލި ސަޕްލަޔަރުން އެހެން ޤައުމުތަކުގެ މަސް އެކްސްޕޯޓް ކުރާ ފަރާތްތަކުގެ އަތުން މަސް ގަންނަން ޖެހި، މިފަދަ ދަތި ދަނޑިވަޅެއްގައި ވެސް ރާއްޖެއަށް ލިބިފައިވާ އޮތް މުހިންމު ފުރުޞަތު ގެއްލިގެން ހިނގައިދާނެ ކަމެއް ގެ ގޮތުގައި އެމްއެސްޕީއީއޭ އިން ސިފަކޮށްްފައި ވެއެވެ.

ކަޅުބިލަމަހުގެ މަސްވެރިކަން ކުރާ މަސްވެރިން ވެސް ހިތްވަރާއެކު މަހަށް ނުކުންނަމުން އަންނައިރު ބޮޑު ކަންނެލީގެ މަސްވެރިކަން ކުރާ ފަރާތްތަކުން ވެސް މި ޙާލަތުން އަރައިގަތުމަށް އާ ހިތްވަރަކާއެކު މަސައްކަތް ކުރަން ޖެހޭ ކަމަށް އެ ޖަމްޢިއްޔާ އިން ބުންޏެވެ.