ހއ. ތުރާކުނު އާއްމު ހާލަތަށް ގެނެވުނު ނަމަވެސް، އެރަށު ރައްޔިތުންގެ ރައްކާތެރިކަމަށްޓަކައި އެޅިފައިވާ ފިޔަވަޅުތައް ހަރުދަނާ ކުރަމުންދާ ކަމަށް ތުރާކުނު ކައުންސިލްގެ ރައީސް އަލީ އަބްދުލް ލަތީފް ވިދާޅުވެއްޖެ އެވެ.

ކޮވިޑް-19 އާއި ގުޅިގެން ރާއްޖެޓީވީން ގެނެސްދެމުންދާ ޚާއްސަ ކަވަރޭޖްއަށް ދެއްވި އިންޓަރވިއުއެއްގައި އަލީ ވިދާޅުވީ ވައިރަސްއާއި ގުޅިގެން އެރަށުގައި ގިނަ ފިޔަވަޅުތަކެއް އަޅަމުން އަންނަ ކަމަށެވެ.

ތުރާކުނު މޮނީޓަރިންގެ ހާލަތަށް ގެނެވުނީ "ކާވިޔާ" ނަމަކަށް ކިޔާ ބޯޓަކުން ދަތުރުކުރި ބަޔަކު ކޮވިޑް-19 އަށް ޕޮޒިޓިވް ވުމާއި ގުޅިގެންނެވެ. އެ ބޯޓުގައި އެރަށުގެ 8 މީހަކު ދަތުރުކޮށްފައި ވެއެވެ.

އެ އެންމެންގެ ނަތީޖާ ނެގެޓިވްވި ނަމަވެސް، އެތެރޭގެ ލަފާދޭ ކޮމިޓީ ގެ މަޝްވަރާގެ މަތިން، ފިޔަވަޅުތަކެއް އަޅަމުންގެންދާ ކަމަށް އަލީ ވިދާޅުވި އެވެ. ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ތަކުރާރުކޮށް ދެމުންގެންދާ އިރުޝާދަކީ ގައިދުރުކަން ބަހައްޓާ، ޒަރޫރީ ބޭނުމެއްގައި ނޫނީީ ގެއިން ބޭރަށް ނުނުކުތުމަށް ކަމަށްވާއިރު، އެ ކަންކަމަށް އިތުރު ސަމާލުކަމެއް ދީގެން ފިޔަވަޅު އަޅަމުންދާކަމަށެވެ.

އެގޮތުން، އެރަށު ވިޔަފާރިވެރިންނާއި މަޝްވަރާކޮށް، ފިހާރަތައް ހުޅުވާނެ ވަކި ގަޑިތަކެއް ކަނޑައަޅާފައިވާ ކަމަށެވެ. އަދި ތަރުކާރީގެ ބާވަތްތައް ރަށަށް ލިބުމާއި އެކު ސޯޝަލް ސަޕޯޓު ޑެސްކުގެ ފަރާތުން ޑެލިވަރީ ކުރަމުންދާ ކަމަށެވެ. އަދި ޒަރޫރީ ބޭނުމަށް ބޭރަށް ނުކުންނަން ޖެހިއްޖެ ހާލަތެއްގައި ސަޕޯޓު ޑެސްކުގެ ހުއްދަ ހޯދަންޖެހޭކަމަށެވެ.

އެރަށުގައި ދިރިއުޅޭ ބިދޭސީންގެ ހާލަތާއި ގުޅިގެން އަލިއަޅުއްވާލައްވާ އަލި ވިދާޅުވީ ތުރާކުނުގައި ގަވާއިދާ ޚިލާފަށް އެއްވެސް ބިދޭސީ އެއް ނޫޅޭ ކަމަށެވެ.

އަލީ ވިދާޅުވީ އެ ރަށުގައި އުޅޭ ދިވެހިންނެކޭ އެއްގޮތަށް އެފަރާތްތަކަށްވެސް އެހީތެރިކަން ފޯރުކޮށްދެމުންދަނީ އެއްވެސް ތަފާތު ކުރުމެއް ނެތިކަމަށެވެ.