ވެންޓިލޭޓަރު ގެންނަން އެސްޓީއޯއިން ހުށައެޅީ މާ ކުޑަ އަގެއް!
ރާއްޖެއަށް 145 ވެންޓިލޭޓަރެއް ގެނައުމަށް ދިވެހި ދެ ކުންފުންޏަކާއި، ދުބާއީގެ ކުންފުންޏަކާ ވަނީ ހަވާލުކުރެވިފައި
އެސްޓީއޯގެ ހެޑް އޮފީސް ހުންނަ އިމާރާތް
ރާއްޖެއަށް 145 ވެންޓިލޭޓަރު ގެންނަން އަގު ހުށައެޅި ކުންފުނިތަކުގެ ތެރެއިން، އެންމެ ކުޑައަގެއް ހުށައެޅީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ކަން ހާމަވެއްޖެ އެވެ.
ރާއްޖެއެމްވީ އަށް މަޢުލޫމާތު ލިބިފައިވާ ގޮތުގައި، ވެންޓިލޭޓަރުތައް ގެންނަން ހުޅުވާލުމުން އެސްޓީއޯއިން ވަނީ ތަފާތު ތިން އޮޕްޝަނަކާއެކު ހެލްތު މިނިސްޓްރީ އަށް ކޯޓޭޝަން ހުށައަޅާފަ އެވެ.
އެންމެ އަގުހެޔޮ އޮޕްޝަނަކަށް އެސްޓީއޯއިން ހުށައެޅީ ސްވިޑްންގެ ބްރީސް މަރުކާގެ 15 ވެންޓިލޭޓަރު ޔުނިޓް، ޔުނިޓެއް 206،000ރ. ރޭޓުން ޖުމްލަ 3.09 މިލިއަން ރުފިޔާ އަށެވެ. މިތަކެތި ޑެލިވަރީ ކޮށްދޭނެ ކަމަށް އެ ކުންފުނިން ހުށައެޅި މުއްދަތަކީ 30 ދުވަހާއި 45 ދުވަހާއި ދެމެދުގެ މުއްދަތެކެވެ.
ދެވަނަ އޮޕްޝަނަކަށް އެސްޓީއޯއިން ހުށައެޅީ، ޖަރުމަނުގެ އެކްސެންޓް މަރުކާގެ 15 ވެންޓިލޭޓަރު ޔުނިޓް، ޔުނިޓެއް 426،000ރ. ރޭޓުން ޖުމުލަ 6.4 މިލިއަން ރުފިޔާ އަށެވެ. މި އަގުގައި ހުށައެޅުނީ 15 ދުވަހާއި 20 ދުވަހާއި ދޭތެރޭގެ މުއްދަތެއްގެ ތެރޭގައި ގެނެސްދިނުމަށެވެ.
އެންމެ އަގުބޮޑުކޮށް ހުށައަޅާފައިވަނީ، 60 ދުވަހާއި 70 ދުވަހުގެ މުއްދަތެއްގެ ތެރޭގައި، ޔުނިޓެއް 878،475ރ. ގެ ރޭޓުން އެމެރިކާގެ ޖެނެރަލް އިލެކްޓްރިކް ކުންފުނީގެ ކެއަރސްކޭޕް މަރުކާގެ ވެންޓިލޭޓަރު ގެނެސްދިނުމަށެވެ.
ބިޑްކުރުމަކާ ނުލައި، ހެލްތު މިނިސްޓްރީން މި މަސައްކަތް ޙވާލުކޮށްފައިވަނީ "ސިންގަލް ސޯސް ޕްރޮކިއުމެންޓް" އުޞޫލުގެ ތެރެއިންނެވެ. މިއީ މި މަސައްކަތް އަވަސްކުރުމުގެ ގޮތުން ނިންމެވި ނިންމުމެއްކަމަށް މިނިސްޓަރ އަމީން ވަނީ ވިދާޅުވެފަ އެވެ.
އަމީން މިހެން ވިދާޅުވީ މައްޗަންގޮޅި ދެކުނު ދާއިރާގެ މެންބަރު އަޙްމަދު ޚައިތަމް ކުރެއްވި ސުވާލެއްޖެ ޖަވާބު ގައެވެ. މި މަސައްކަތް ޙަވާލުކުރެވުނު ތަފާތު ތިން ކުންފުންޏަކުން ކޯޓޭޝަން ނެގުމަށް ފަހުގައި ކަމަށް ވެސް މަޖިލީހަށް ފޮނުއްވެވި ޖަވާބުގައި ވެއެވެ.
މި ތިން ކުންފުންޏަކީ، އެސް.ޓީ.އޯ، މެޑްޓެކް މޯލްޑިވްސް ޕްރައިވެޓް ލިމިޓެޑް އަދި ނާޑް ޕްރައިވެޓް ލިމިޓެޑެވެ. އަދި މި ކުންފުނިތަކުން ކޯޓޭޝަން ނަގާފައިވަނީ 18 މަރޗު ގައެވެ. ތިން ކުންފުނީގެ ތެރެއިން ވެންޓިލޭޓަރު ގަންނަން ޙަވާލުކުރެވުނީ، މެޑްޓެކް އަދި ނާޑް ކުންފުންޏާ އެވެ.
މެޑްޓެކާ އެގްރީމަންޓް ހެދުނީ ޔުނިޓަކަށް 288،914ރ. ރޭޓުން، ބެލަވިސްޓާ ބްރޭންޑުގެ 50 ވެންޓިލޭޓަރު ގެނައުމަށެވެ. ހަތް ދުވަހާއި 14 ދުވަހުގެ މުއްދަތެއްގެ ތެރޭގައި ގެނެސްދޭނެކަމަށް ކޯޓޭޝަންގައި ހިމަނާފައިވާއިރު، މި މަސައްކަތް ޙވާލުކުރެވުނީ 14،445،700ރ. އަށެވެ. އާދިއްތަ ދުވަހާ ހަމައަށް މީގެ ތެރެއިން އައިސްފައިވަނީ އެންމެ 18 ވެންޓިލޭޓަރެވެ.
ނާޑް ކުންފުންޏާ އެގްރީމަންޓް ހެދުނީ 14 ދުވަހުގެ ތެރޭގައި، ޔުނިޓެއް 351،577ރ. ރޭޓުން 20 ވެންޓިލޭޓަރު ގެނައުމަށެވެ. މި މަސައްކަތް އެ ކުންފުންޏާ ޙަވާލުކުރެވުނީ 7،031،541ރ. އަށެވެ. މިހާތަނަށް އަދި މި ކުންފުނީގެ އެއްވެސް ވެންޓިލޭޓަރެއް ރާއްޖެއަކަށް ގެނެސްފައެއް ނުވެއެވެ.
އެސްޓީއޯގެ ސްޕޯކްސްޕަރސަން ޢަބްދުﷲ މުޙައްމަދު ވިދާޅުވީ، އެ ކުންފުންޏާ މި މަސައްކަތް ޙަވާލުނުކުރި ސަބަބެއް މިހާތަނަށް އަންގާފައިނުވާ ކަމަށެވެ. އަދި ދުނިޔެއަށް ދިމާވެފައިވާ ޙާލަތަށް ރިޢާޔަތްކޮށް، އެހެން ކުންފުނިތަކުން ހުށައެޅި ތާރީޚުތަކަކީ "ރިއަލިސްޓިކް" ޑެލިވަރީ މުއްދަތެއް ކަމަށް ޤަބޫލުނުކުރައްވާ ކަމަށް ވިދާޅުވި އެވެ.
އެސްޓީއޯއިން ހުށައަޅާފައިވާ އެންމެ ކުޑަ އަގުގައި އެ ކުންފުންޏާ މަސައްކަތް ޙަވާލުކުރެވުނުނަމަ، 20 ވެންޓިލޭޓަރު ގެންނަން ޚަރަދުވާނީ 4،120،000ރ. އެވެ. އަދި 50 ވެންޓިލޭޓަރު ގެންނަން ޚަރަދުވާނީ 10،300،000ރ. އެވެ. ނަމަވެސް، އެސްޓީއޯގެ ކޯޓޭޝަންގެ ތެރެއިން ރިޢާޔަތްކޮށްފައިވަނީ އެ ކުންފުނިން ހުށައެޅި އެންމެ އަގުބޮޑު އޮޕްޝަނަށެވެ.
ވެންޓިލޭޓަރުތައް ރާއްޖެއަށް ގެންނަން މިނިސްޓްރީ އޮފް ހެލްތުން ކުންފުނިތައް ހޮވުމުގައި ކޮރަޕްޝަން ހިމެނޭކަމަށް ބުނާ މައްސަލަ، އެންޓި ކޮރަޕްޝަން ކޮމިޝަން (އޭސީސީ) އިން ބަލަމުން އަންނަކަަމަށް ވެސް މަޢުލޫމާތު ވަނީ ލިބިފަ އެވެ. ވެންޓިލޭޓަރު ގެނައުމަށް ކުރާ މަސައްކަތަކީ ދައުލަތުގެ މާލިއްޔާއިން 56 މިލިއަން ރުފިޔާ ޚަރަދަކޮށްގެން ކުރާ މަސައްކަތެކެވެ.
