މޯލްޑިވްސް ޕޯޓްސް ލިމިޑެޓް (އެމްޕީއެލް) އިން ވިޔަފާރި އުޞޫލުން ދޫކޮށްލައިވާ ޢިމާރާތްތަކާއި ބިންތައް ކުއްޔަށް ހިފާފައިވާ ފަރާތްތަކަށް ކޮވިޑް-19އާ ގުޅިގެން ބައެއް ލުއިތައް ދިނުމަށް ނިންމައިފިއެވެ.

އެމްޕީއެލުން ބުނީ ކޮވިޑް-19އާ ގުޅިގެން ރާއްޖޭގައި ޞިއްހީ ކުއްލި ނުރައްކަލުގެ ޙާލަތު އިޢުލާނު ކޮށްފައިވާތީއާއި އަދި މާލެ ޞަރަޙައްދު 15 އޭޕްރީލް 2020އިން ފެށިގެން ފުރަބަންދު ކޮށްފައިވާތީ، އެ ކުންފުނީގެ ބަލަހައްޓަމުންގެންދާ އިމާރާތްތަކާއި ބިންތައް ކުއްޔަށް ހިފާފައިވާ ފަރާތްތަކަށް ބައެއް ލުއިތައް ދިނުމަށް ހަމަޖެހިފައިވާ ކަމަށެވެ.

އެގޮތުން ސައި ހޮޓާ ރެސްޓޯރެންޓްތައް ބަންދު ކުރުމަށް އަންގާފައިވާތީ އެފަދަ އިމާރާތްތަކުގެ ކުލި އެދުވަހުން ފެށިގެން މަޢާފު ކޮށްފައިވާ ކަމަށާއި، ފިހާރަ ހިންގުމަށާއި މުދާ ގުދަން ކުރުމަށް ކުއްޔަށް ދީފައިވާ އިމާރާތްތަކާއި ބިންބިމުގެ މެއި އަދި ޖޫން މަހުގެ ކުރިން %30 މަޢާފު ކޮށްދީފައިވާ ކަމަށެވެ. އަދި އޭޕްރީލް، މެއި އަދި ޖޫން މަހުގެ ކުލި ޖޫރިމަނާއާ ނުލައި ބަލައިގަތުމުގެ މުއްދަތު 30 ޖޫންގެ ނިޔަލަށް އިތުރުކޮށްދީފައިވާ ކަމަށް އެމްޕީއެލުން ބުނެއެވެ.

އެމްޕީއެލުން ބުނީ ލޮރީ ޕާރކިންގ ފީ ގެ މެއި އަދި ޖޫން މަހުގެ ކުލިން %30 މަޢާފު ކޮށްދިނުމަށާއި އޭޕްރީލް، މެއި އަދި ޖޫން މަހުގެ ކުލި ޖޫރިމަނާއާ ނުލައި ބަލައިގަތުމުގެ މުއްދަތު 30 ޖޫންގެ ނިޔަލަށް އިތުރުކޮށްދީފައިވާ ކަމަށެވެ.

ފައްތިޔާ އަދި އެހެނިހެން ޚިދުމަތްތައް ދިނުމަށް ހަދާފައިވާ އެއްބަސްވުންތަކުގެ ދަށުން ދައްކާ ފީތަކުގެ އޭޕްރީލް، މެއި އަދި ޖޫން މަހުގެ ކުލި ޖޫރިމަނާއާ ނުލައި ބަލައިގަތުމުގެ މުއްދަތު ވެސް 30 ޖޫން މަހުގެ ނިޔަލަށް އިތުރުކޮށްދީފައިވާ ކަމަށްވެސް އެމްޕީއެލުން ބުނެއެވެ.