ކުދި އުޅަނދު ފަހަަރަށް މަސްވެރިކަމަށް ނިކުތުމުގެ ހުއްދަ ދޭން އއ. ފެރިދޫ ކައުންސިލުން ނިންމައިފި
10 މެއި 2020 | އާދީއްތަ 08:3906 މޭލު ބޭރަށް ދިއުން މަނާވާނެ
އއ.ފެރިދޫ ކައުންސިލުން ނިންމީ، މިގޮތަށް ގިނަ ބަޔަކު އެދެމުންދާތީ
ޢާންމު ޞިއްޙަތުގެ ކުއްލި ނުރައްކަލުގެ ޙާލަތުން އަރައިގަނެވެންދެން 9 މީޓަރުން ދަށުގެ އުޅަނދު ފަހަަރަށް މަސްވެރިކަމަށް ނިކުތުމުގެ ހުއްދަ ދޭން އއ. ފެރިދޫ ކައުންސިލުން ނިންމައިފިއެވެ.
ފެރިދޫ ކައުންސިލުން ބުނީ ޢާއިލާގެ ކެއުމަށް ބޭނުންވާ މަސްބޭނުމަށް ކައިރީ ޞަރަޙައްދުތަކަށް ދަތުރުކުރުމަށް، ކަނޑުގައި ދުއްވާ އުޅަނދުފަހަރު ދުއްވުމާބެހޭ ޤާނޫނުގައި ބަޔާންކޮށްފައިވާ ގޮތައް ރަޖިސްޓްރީނުކޮށް އަދި ސަލާމަތީ ސަރޓިފިކެޓް ނެތް އުޅަނދުފަހަރާއި، ރަޖިސްޓްރީ ނުކުރާ ޑިންގީ ފަދަ އުޅަނދު ފަހަރުން ދަތުރުކުރުމުގެ ހުއްދައަށް އެދެމުންދާ ކަމަށެވެ.
ކައުންސިލުން ބުނީ ކޮވިޑް-19 އާ ގުޅިގެން އިޢުލާނު ކޮށްފައިވާ ޢާންމު ޞިއްޙަތުގެ ކުއްލި ނުރައްކަލުގެ ޙާލަތުން އަރައިގަނެވެންދެން ރަށްކައިރީ ޞަރަޙައްދުތަކަށް މަސްވެރިކަން ކުރުމަށް ދަތުރުކުރުމުގެ ހުއްދަ މިއުޅަނދުތަކައް ދޭން ކައުންސިލުން ނިންމާފައިވާ ކަމަށެވެ. އެގޮތުން، މިކަމަށް އެދޭ އުޅަނދު ފަހަރުގެ ވެރިން ކައުންސިލުން ދޫކުރާ ފޯމުތައް ފުރިހަމަ ކުރުމަށްފަހު ހުށަހެޅުމުން އެކަން ހަމަޖައްސައިދޭނެކަމަށެވެ. އުޅަނދު ފަހަރު ރަޖިސްޓްރީ ކުރުމަށް ބޭނުންވާ އޮޑީ ނަންބަރު ފޯމާއި، ކަނޑުގައި ދުއްވާ އުޅަނދު ރަޖިސްޓްރީ ކުރުމަށް އެދޭ ފޯމާއި، އުޅަނދު ރަޖިސްޓްރީ ކުރުމަށް އެދޭ ފަރާތުގެ އައި.ޑީ ކާޑުގެ ފޮޓޯކޮޕީއެއް ހުށަހަޅަން ޖެހޭ ކަމަށެވެ.
ކައުންސިލުން ބުނީ 9 މީޓަރަށްވުރެ ކުދި ދޯންޏާއި، ޑިންގީ އަދި ބޮއްކުރާގެ ގޮތުގައި ބޭނުންކުރާ އުޅަނދު ފަހަރަށް މަސްވެރިކަން ކުރުމަށް ރަށުގެ ފަރުން ފެށިގެން 6 މޭލަށްވުރެ ބޭރަށް ނުދާނެ ކަމަށް އުޅަނދުގެ ވެރި ފަރާތުން އެއްބަސްވުމާއެކު އުޅަނދު އޮޕަރޭޓް ކުރުމުގައި ސަލާމަތީ ގޮތުން ހުންނަން ލާޒިމުކުރާ ކަންކަން އެންމެ މަދުވެގެން (މަސްވެރިކަމުގައި އުޅަނދުން ދަތުރުކުރާ ކޮންމެ މީހަކަށް ލައިފް ޖެކެޓެއް، ދިއްލޭގޮތަށް އޮތް ޓޯޗް ބައްތިއެއް، ގުޅޭނެ ފަދަ ގޮތަކަށް އޮތް ކޮމިއުނިކޭޝަން އާލާތެއް ނުވަތަ ވީ.އެޗް.އެފް ސެޓެއް، ހަންޖަހަން ބޭނުންކުރާ އޮރެންޖު ދިދައެއް، އިންޖީނު މަރާމާތު ކުރެވޭނެ ފަދަ ޓޫލްސްތައް އަދި ދަތުރަށް ބޭނުންވާނެ ވަރަށް ތެލާއި ފެން) އުޅަނދުގައި ދަތުރުކުރާއިރު ހުންނާނެ ކަމުގެ ޔަޤީންކަން ކައުންސިލަށް ލިޔުމުން ހުށަހަޅަންޖެހޭ ކަމަށެވެ.
ކައުންސިލުން ބުނީ މިގޮތުން ދެވޭ ހުއްދައިގެ ދަށުން، 06 މޭލު ބޭރަށް ދިއުމާއި، އެހެން ރަށްރަށަށް ދިއުމާއި، މިޙާލަތުން އަރައިގަނެވެންދެން ކުޑަކުދިން ގޮވައިގެން މަސްވެރިކަން ކުރުމަށް ދިއުމަކީ މަނާކަމެއް ކަމަށެވެ.
