ކޮވިޑް-19 ގެ ޓެސްޓު ހެދުމަށް ބޭނުންވާ ޖީން އެކްސްޕާޓް މެޝިނަށް ލެއްވޭ 25،000 ކާޓްރިޖް މިމަހުގެ ފަހުކޮޅު ލިބޭވަރުވާނެ ކަމަށް ސަރުކާރުން ބުނެފިއެވެ.

ހޮނިހިރު ދުވަހުގެ ރޭ ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ޓާސްކްފޯސްގެ ތަރުޖަމާނު މަބްރޫކް ޢަޒީޒު ވިދާޅުވީ ހެލްތު މިނިސްޓްރީގެ ފަރާތުން ކުރަމުންދާ މަސައްކަތުގެ ތެރެއިން 25،000 ޖީން އެކްސްޕާޓް ކާޓްރިޖް ޑަބްލިއުއެޗްއޯގެ ފަރާތުން ހޯދުމަށް މަސައްކަތް ކުރަމުންދާ ކަމަށެވެ. އަދި ކާޓްރިޖްތައް މިމަހުގެ ފަހުކޮޅު ލިބޭވަރުވާނެ ކަމަށް ލަފާކުރެވޭ ކަަމަށްވެސް މަބްރޫކް ވިދާޅުވި އެވެ.

ރާއްޖޭގެ ހަ ސަރަހައްދުގައި ގާއިމުކޮށްފައިވާ ހޮސްޕިޓަލުތަކުގައި މިހާރު ވެސް ޖީން އެކްސްޕާޓް މެޝިން ހުރެއެވެ. އެ މެޝިންތަކަށް ލައްވާ ކާޓްރިޖް އުފެއްދުމުގެ ހުއްދަ ދާދިފަހުން ޑަބްލިއުއެޗްއޯ އިން ވަނީ ޖީން އެކްސްޕާޓް މެޝިން އުފައްދާ ކުންފުންޏަކަށް ދީފައެވެ.މި ކާޓްރިޖްތައް ލިބުމާއެެކު ރާއްޖޭގެ އެކި ސަރަހައްދުތަކުގައި ކޮވިޑް-19އަށް ޓެސްޓު ކުރުމުގެ އިންތިޒާމު ހަމަޖެހިގެންދާނެ އެވެ. މިހާރު މި ބައްޔަށް ޓެސްޓު ކުރުމުގެ ކަންކަން ކުރިއަށް ގެންދަނީ އައިޖީއެމްއެޗް އާއި ފުލުހުންގެ ލެބްގައެވެ.

މީގެއިތުރުން ކޮވިޑް-19ގެ ޓެސްޓުތައް ރާއްޖޭގެ އެކި ކަންކޮޅުތަކުގައި ހެދުމަށް ބޭނުންވާ މެޝިންތައް ހޯދުމަށް ވެސް މަސައްކަތް ކުރަމުންދާކަމަށްވެސް މަބްރޫކް ވިދާޅުވި އެވެ. އެގޮތުން، މި މަހުގެ 17 ވަނަ ދުވަހު ޕީސީއާރު ޓެސްޓް ހެދޭނެ އިތުރު މެޝިނެއް ރާއްޖެ ގެނެވޭކަން ފާހަގަ ކުރައްވާ މަބްރޫކް ވިދާޅުވީ އާ މެޝިނާއެކު ދުވާލެއްގެ މައްޗަށް 600 އާއި 650 އާ ދެމެދު ޢަދަދެއްގެ ޓެސްޓް ހެދޭނެ ކަމަށެވެ. އެހެންކަމުން މިހާރު ދުވާލެއްގެ މައްޗަށް ހެދޭ ޓެސްޓަށްވުރެ އިތުރު 200 ނުވަތަ 250 ޓެސްޓް ހެދޭނެއެވެ.

ރާއްޖެއިން މިހާތަނަށް 785 މީހަކު ކޮވިޑަށް ޕޮޒިޓިވް ވެފައިވާއިރު، މާލޭގެ އިތުރުން ބައެއް ރަށްތަކަށް ވެސް މި ބަލި މިހާރު އަންނަނީ ފެތުރެމުންނެވެ.