މިހާތަނަށް 2370 މީހަކު ކަރަންޓީން މުއްދަތު ނިންމުމަށްފަހު ދޫކޮށްފައިވޭ
ހޮނިހިރު ދުވަހު 130 މީހަކު ކަރަންޓީން ފެސިލިޓީތަކުން ދޫކޮށްފައިވޭ
މީގެކުރިން ކަރަންޓީން ފެސިލިޓީތަކުން ދޫކުރި ފަރާތްތައް މާލެ އައުމުން ފުލުހުން އަދި ސިފައިން އެހީތެރި ވެދެނީ
މިހާތަނަށް 2370 (ދެހާސް ތިންސަތޭކަ ހަތްދިހަ) މީހަކު ކަރަންޓީންގެ މުއްދަތު ނިންމުމަށްފަހު ދޫކޮށްފައިވާކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ.
ހޮނިހިރު ދުވަހުގެ ރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި އެންމެ ފަހުގެ ތަފާސްހިސާބު ހިއްސާކުރައްވަމުން މަބްރޫކް ވިދާޅުވީ، މި ވަގުތު ކަރަންޓީން ފެސިލިޓީގައި ތިބި 130 މީހަކު އެޗްޕީއޭއިން ކަނޑައަޅާފައިވާ މިންގަނޑުތަކާއި އެއްގޮތަށް ދޫކޮށްފައިވާކަމަށެވެ. އެގޮތުން، އެ މީހުންނަކީ 14 ދުވަހުގެ ކަރަންޓީން މުއްދަތެއް ހަމަކޮށް ނަތީޖާ ނެގެޓިވްވެފައިވާ މީހުންކަމަށާއި ހަމަ އެ އުސޫލުން މިހާތަނަށް ޖުމްލަ 2370 (ދެހާސް ތިންސަތޭކަ ހަތްދިހަ) މީހުން ދޫކޮށްފައިވާކަމަށެވެ.
މަބްރޫކް ވިދާޅުވީ، މީގެއިތުރުން 41 މީހެއްގެ ސާމްޕަލް ނެގާފައިވާކަމަށާއި ކަރަންޓީން ނިމުމަށްފަހު ނަތީޖާ ނެގެޓިވް ކަމުގައި ވާނަމަ އެމީހުންވެސް ދޫކޮށްލާނެކަމަށެވެ.
އެޗްޕީއޭއިން އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކާގޮތުން މިހާރު ކަރަންޓީން ފެސިލިޓީތަކުގައި ޖުމްލަ 1521 މީހުން އެބަތިއްބެވެ. މީގެތެރޭގައި، ސަރުކާރުން ރާއްޖެއިން ބޭރުގައި ތިބި ދިވެހިން ގެނައުމަށް ކުރި މަސައްކަތުން ގެނެސްފައިވާ ފަރާތްތަކާއި މިހާތަނަށް ޕޮޒިޓިވްވެފައިވާ މީހުންނާއި ޑައިރެކްޓް ކޮންޓެކްޓްވެފައިވާ މީހުންގެ އިތުރުން ކުރު މުއްދަތަކަށް މާލެ އައުމަށް ފަހު، ލޮކްޑައުން އާއި ގުޅިގެން ރަށަށް ދިއުމަށް ކަރަންޓީން މުއްދަތު ހޭދަކުރަމުންދާ މީހުން ހިމެނެއެވެ.
އެޗްޕީއޭއިން އަމަލުކުރަމުންދާ އުސޫލުގައި ވާގޮތުން، ކަރަންޓީނަށް ގެންދެވޭ ފަރާތްތައް ދޫކުރެވޭނީ 14 ދުވަހުގެ މުއްދަތެއް ހޭދަކުރުމަށް ފަހު ބަލި ހުރިތޯ ދެނެގަތުމަށް ހަދާ ޓެސްޓުގެ ނަތީޖާ ނެގެޓިވް ވުމުންނެވެ. ކަރަންޓީނަށް ދިއުމާއި ސާމްޕަލްތައް ނަގަން ދެކޮޅު ހެދުމަކީ ޢާންމު ޞިއްޙަތު ރައްކާތެރި ކުރުމުގެ ޤާނޫނުގެ ދަށުން ކުށެކެވެ.
