އައްޑޫގައި މާސްކާއި ސެނެޓައިޒާ ނެތް ކަމަށް ދެކެވޭ ވާހަކަ އަކީ ދޮގެއް
9 މެއި 2020 | ހޮނިހިރު 21:45ޕޮޒިޓިވް ވީ ރިސޯޓުން އައްޑޫ ސީޓީއަށް ދިޔަ މީހެއް
އެންއީއޯސީގެ ތަރުޖަމާނު މަބްރޫކް އަޒީޒް ނޫސްވެރިންނަށް މައުލޫމާތު ދެއްވަނީ
އައްޑޫ ސީޓީން ކޮވިޑް-19 ޖެހުނު މީހަކު ފެނިފައިވާއިރު، އެ ސީޓީގެ އެންމެ ބޮޑު ހޮސްޕިޓަލް އައްޑޫ އިކުއިޓޯރިއަލް ހޮސްޕިޓަލުގައި މާސްކާއި، ސެނެޓައިޒާ ނެތް ކަމަށް ދެކެވޭ ވާހަކަތައް ނެޝަނަލް އިމަރޖެންސީ އޮޕަރޭޝަން ސެންޓަރު (އެންއީއޯސީ) އިން ދޮގުކޮށްފިއެވެ.
ހޮނިހިރު ދުވަހު އައްޑޫ ސީޓީން ކޮވިޑް-19 އަށް މީހަކު ވަނީ ޕޮޒިޓިވްވެފައެވެ. މިކަން މިހެން ހިނގިއިރު ބައެއް މީޑިއާތަކުން ރިޕޯޓްކޮށްފައިވާ ގޮތުން އައްޑޫ ހޮސްޕިޓަލުގައި އެކަށީގެންވާ ވަރަށް މާސްކު އަދި ސެނެޓައިޒާއެއް ނެތެވެ. އެކަމުގެ ކަންބޮޑުވުން ހޮސްޕިޓަލުގެ ނަރުހުން މެނޭޖްމެންޓާއި ހިއްސާކޮށްފައިވާ ކަަމަށްވެސް ވަނީ ރިޕޯޓްކޮށްފައެވެ.
މިކަމާ ގުޅޭ ގޮތުން ހޮނިހިރު ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އެ ސެންޓަރުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ނޫސްކޮންފަރެންސް ފެށުމުގެ ކުރިން އައްޑޫ ހޮސްޕިޓަލުގައި ސިއްހީ ގޮތުން ބޭނުންވާ އާލާތަތްތަކުގެ ސްޓޮކް ބައްލަވާފައިވާ ކަމަށެވެ. މަބްރޫކް ވަނީ އައްޑޫގައި މިހާރު ހުރި ތަކެތީގެ ތަފްސީލު ނޫސްވެރިންނަށް ދެއްވާފައެވެ.
އައްޑޫ ހޮސްޕިޓަލުގެ މެނޭޖަރު ވިދާޅުވެފައިވާ ގޮތުން، ބަލި މީހާ ބެލި އެއްވެސް ފަރާތަކުން (ޕާސަނަލް ޕްރޮޓެކްޝަން އިކުއިޕްމެންޓް (ޕީޕީއީ) ބޭނުންކޮށްފައި ނުވާ ކަމަށެވެ. މިކަމާ ގުޅޭ ގޮތުން ނޫސްވެރިއަކު ކުރި ސުވާލަކާ ގުޅިގެން މަބްރޫކް ވިދާޅުވީ، އެސްއޯޕީއާ ހިލާފަށް އެކަން ކޮށްފައިވާނަމަ އެ މައްސަލަ ބަލާނެ ކަމަށެވެ.
އައްޑޫ ސިޓީން މީހަކު ޕޮޒިޓީވްވުމާ އެކު އެ ސީޓީވަނީ 14 ދުވަހަށް ލޮކްޑައުން ކޮށްފައެވެ. އެ މިހާއަކީ މާޗް މަހުގެ 10 ވަނަ ދުވަހު ރިސޯޓަކުން އައްޑޫ އަށް ދިޔަ މީހެއް ކަމަށް މައުލޫމާތު ލިބިފައިވެއެވެ. ޕޮޒިޓިވްވި މީހާއާ 26 މީހަކު ވަނީ ކޮންޓެކްޓް ވެފައެވެ. މަބްރޫކް ވިދާޅުވީ، އައްޑޫ ސީޓީ ލޮކްޑައުން ކޮށްފައިވަނީ އެ މީހާގެ ކޮންޓެކްޓް ޓްރޭސިން ހެދުމުގެ މަަސައްކަތް ކުރުމުގެ ގޮތުން ކަމަށެވެ.
