ކޮރޯނާވައިރަސް (ކޮވިޑް-19) ގެ ސަބަބުން ފަސްކޮށްފައިވާ ފްރެންޗު އޯޕަން ޓެނިސް މުބާރާތުގެ ޓިކެޓުތައް ރިފަންޑް ކޮށްދޭން ނިންމައިފި އެވެ.
ފްރާންސްގެ ވެރިރަށް ޕެރިހުގައި ބޭއްވުމަށް ހަމަޖެހިފައިވާ މި މުބާރާތް ކުރިން ތާވަލުކޮށްފައި އޮތީ މެއި މަހުގެ 24 އިން ޖޫން މަހުގެ 7 ވަނަ ދުވަހުގެ ނިޔަލަށެވެ. އެކަމަކު މިހާރު މި މުބާރާތް ވަނީ ސެޕްޓެމްބަރު މަހުގެ 20 އިން އޮކްޓޯބަރު މަހުގެ 4 އަށް ފަސްކޮށްފައެވެ.
ދާދި ފަހުން ފްރާންސް ސަރުކާރުން ވަނީ ސެޕްޓެމްބަރު މަހުގެ ކުރިން އެއްވެސް ކުޅިވަރު ހަރަކާތެއް އެގައުމުގައި ނުބޭއްވޭނެކަން އިއުލާން ކޮށްފަ އެވެ. މިއާއެކު ފްރެންޗު ޓެނިސް ފެޑެރޭޝަނުން ވަނީ ސެޕްޓެމްބަރުގެ ތެރޭގައި ފްރެންޗު އޯޕަން ބޭއްވުމާ މެދު ގޮތެއް ކަނޑައެޅުން މަޑުޖައްސާލުމަށް ފަހު، މިހާތަނަށް ޓިކެޓު ނެގި ފަރާތްތަކަށް ރިފަންޑު ދޭން ނިންމާފައެވެ.
ކޮވިޑް-19 އާ ގުޅިގެން ފްރެންޗު އޯޕަން ފަސްކުރިއިރު، މި މުބާރާތަކީ އަހަރުގެ ދެވަނަ ގްރޭންޑް ސްލޭމް މުބާރާތެވެ. ކޮންމެ އަހަރަކުވެސް އެންމެ ފުރަތަމަ ބާއްވާ ގްރޭންޑް ސްލޭމް މުބާރާތަކީ އޮސްޓްރޭލިއަން އޯޕަން ޓެނިސް މުބާރާތެވެ. މިއަހަރުގެ އޮސްޓްރޭލިއަން އޯޕަން ވަނީ ކާމިޔާބުކަމާއެކު ނިންމާލާފައެވެ.
މީގެ ކުރިން މި އަހަރުގެ ވިމްބަލްޑަން ޓެނިސް މުބާރާތް ވަނީ ކެންސަލްކުރަން ނިންމާފައެވެ. މިއަހަރުގެ ވިމްބަލްޑަން ކެންސަލް ކުރިއިރު، މިއީ ދެވަނަ ބޮޑު ހަނގުރާމަ އަށް ފަހު މި މުބާރާތް ނުބާއްވާ ފުރަތަމަ އަހަރެވެ. އޭގެ ކުރިން ވެސް މި މުބާރާތް ނުބޭއްވި ދިޔައީ ފުރަތަމަ ހަނގުރާމައިގެ ދުވަސްވަރެވެ.
