އައްޑޫ ސިޓީ 14 ދުވަހަށް ލޮކްޑައުން ކޮށްފި
9 މެއި 2020 | ހޮނިހިރު 09:49ޕޮޒިޓިވްވީ ޒުވާނަކީ ހިތުގެ ބަލި ހުންނަ މީހެއް
މީގެ ކުރިން އައްޑޫ ސިޓީގެ މަގުތައް ޑިސްއިންފެންޓް ކުރުމުގެ މަސައްކަތް ކޮށްފައިވޭ
އައްޑޫ ސިޓީން ކޮވިޑް-19 ގެ ފުރަތަމަ ކޭސް ފެނުމާ ގުޅިގެން، 14 ދުވަހަށް ލޮކްޑައުން ކޮށްފިއެވެ.
ކޮވިޑް-19ގެ ކޭސްއެއް އައްޑޫން ފެނުމާ ގުޅިގެން ހޮނިހިރު ދުވަހު އައްޑޫ ސިޓީ ކައުންސިލުން އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި އެ ސިޓީގެ މޭޔަރު އަބްދުﷲ ޞާދިޤު ވިދާޅުވީ 14 ދުވަހަށް އެ ސިޓީ ލޮކްޑައުން ކުރަން ނިންމާފައިވާ ކަމަށެވެ.
ޞާދިޤު ވިދާޅުވީ، އައްޑޫ ލޮކްޑައުން ކުރަން ނިންމީ، ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އެގޮތަށް އެންގުމުން ކަމަށެވެ.
ޕޮޒިޓިވްވި ކޭސްއަށް އަލިއަޅުއްވާލައްވާ ޞާދިޤު ވިދާޅުވީ ކޮވިޑް-19އަށް ޕޮޒިޓިވްވީ ޒުވާނެއް ކަމަށާއި، އޭނާއަކީ ހިތުގެ ބަލި ހުންނަ މީހެއް ކަމަށެވެ. އަދި ފަރުވާއަށް މާލެ ގެންގޮސް ޓެސްޓު ކުރުމުން ޕޮޒިޓިވްވެފައިވާ ކަމަށް ޞާދިޤު ވިދާޅުވިއެވެ.
އައްޑޫ ސިޓީ ލޮކްޑައުން ކުރުމާ ގުޅިގެން ހޮނިހިރު ދުވަހުން ފެށިގެން ފެށިގެން 14 ދުވަސް ވަންދެން ޢާންމުންނަށް ގެއިން ބޭރަށް ނިކުތުން މަނާވާނެއެވެ.
އައްޑޫ ސިޓީ ލޮކްޑައުން ކޮށްފައިމިވަނީ ކޮވިޑް-19ށް ރައްކާތެރިވުމުގެ ގޮތުން އެސިޓީގައި ގިނަ ފިޔަވަޅުތަކެއް އަޅާފައިވަނިކޮށްށެވެ. އެގޮތުން ހޮޓާ، ރެސްޓައުރެންޓްތައް ބަންދުކޮށް، އެކަނި ޑެލިވަރީ ޚިދުމަތް ދޭ ގޮތަށް ހަމަޖެއްސިއެވެ. އަދި މަގުތައް ޑިސްއިންފެންޓް ކުރުމުގެ މަސައްކަތް ކޮށްފައިވާއިރު، އާންމުން އެއްވެ އުޅުން މަނާކޮށް ފިނި މައިޒާންތައް ބަންދުކުރިއެވެ.
