ރާއްޖެއިން ކޮވިޑް-19 އަށް ޕޮޒިޓިވްވީ މީހުންގެ އަދަދު 744ށް

ރާއްޖެއިން ކޮވިޑް-19 އަށް އިތުުރު 10 މީހަކު ޕޮޒިޓިވްވެއްޖެ އެވެ.

އަލަށް ރިޕޯޓްކުރެވުނު ކޭސްތަކުގެ ތެރޭގައި ހިމެނެނީ ބަންގްލަދޭޝްގެ 6 މީހަކާއި 4 ދިވެހިންނެވެ. މިއާއެކު ރާއްޖެއިން ފެނިފައިވާ ޖުމްލަ ކޭސްތަކުގެ އަދަދު މިވަނީ 744ށް އަރާފަ އެވެ. މީގެ ތެރެއިން 44 ކޭސް ރިޕޯޓްކުރެވިފައިވަނީ ހުކުރު ދުވަހު އެވެ.

ދެކުނު އޭޝިއާގެ ގައުމުތަކަށް ބަލާއިރު، އާބާދީގެ ނިސްބަތުން އެންމެ ގިނަ އަދަދެއްގެ ޕޮޒިޓިވް ކޭސް ފެނިފައިވަނީ ދިވެހިރާއްޖެއިންނެވެ. އާބާދީގެ ނިސްބަތުން މި ސަރަހައްދުގެ ގައުމުތަކުގެ ތެރެއިން އެންމެ ގިނަ އަދަދެއްގެ ޓެސްޓު ކޮށްފައިވަނީ ވެސް ދިވެހިރާއްޖެއިންނެވެ،

މި ވަގުތު ފެންނަ ކޭސްތަކުގެ އަދަދަށް ބަލާއިރު، ގިނަ އަދަދެއްގެ ކޭސްތަކަކީ ތޮއްޖެހިގެން ބިދޭސީން ދިރިއުޅޭ ތަންތަނުން ފެނިފައިވާ ކޭސްތަކެވެ. އެގޮތުން އެކްޓިވް ސަރވައިލެންސްގެ ތެރެއިން މިހާތަނަށް 27 ތަނަކުން ސާމްޕަލް ނެގިފައިވާއިރު، އޭގެ ތެރެއިން އެއްބައި ތަންތަނުން ނެގި ހުރިހާ ސާމްޕަލް ވަނީ ޕޮޒިޓިވްވެފަ އެވެ.