ކޮވިޑް-19އާ ގުޅިގެން ގުޅީފަޅަށް ބަދަލުކުރި ބިދޭސީ މަސައްކަތްތެރިންނަށް ޚާއްސަކޮށް ޕްރޮގްރާމްތަކެއް ހިންގުމާ ބެހޭ ގޮތުން މަޝްވަރާ ކޮށްފިއެވެ.

ޑިފެންސް މިނިސްޓްރީން ބުނީ މާލޭގައި ތޮއްޖެހިގެން ދިރިއުޅޭ ބިދޭސީންގެ ތެރެއިން ގުޅީފަޅު ކަރަންޓީން ފެސިލިޓީއަށް ގެންދެވިފައިވާ ބިދޭސީ މަސައްކަތްތެރިންނަށް ޚާއްސަ ކޮށްގެން ޕްރޮގްރާމްތައް ހިންގުމަށް ނިންމާފައިވާ ކަމަށެވެ. އަދި އެޕްރޮގްރާމްތަކާ ގުޅޭ ގޮތުން ޔޫތް މިނިސްޓްރީއާއެކު މަޝްވަރާ ކުރެވިފައިވާ ކަމަށެވެ.

ބުރާސްފަތި ދުވަހު ބޭއްވި މިމަޝްވަރާ ބައްދަލުވުމުގައި ޑިފެންސް މިނިސްޓަރު މާރިޔާ އަހުމަދު ދީދީ، ޔޫތް މިނިސްޓަރު އަހުމަދު މަހުލޫފްގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ބައިވެރިވެ ވަޑައިގެންނެވިއެވެ. އަދި ދެމިނިސްޓްރީގެ އިސްބޭފުޅުން ވެސް މިބައްދަލުވުމުގައި ބައިވެރިވެވަޑައިގެންނެވިއެވެ.

ބިދޭސީ މަސައްކަތްތެރިންނަށް ޚާއްސަކޮށް ޕްރޮގްރާމް ހިންގުމަށް މަޝްވަރާކޮށްފައިވާއިރު، ކޮވިޑް-19އާ ގުޅިގެން ބިދޭސީން ހޭލުންތެރިކުރުވަން ޖެހޭ ކަމަށް ކަމާބެހޭ ފަރާތްތަކުން ބުނެފައިވެއެވެ.

މާލެ ޞަރަޙައްދުގައި އުޅޭ ބިދޭސީންނަށް ޚާއްޞަކޮށް، ގުޅީފަޅުގައި 665 އެނދުގެ ކަރަންޓީން ފެސިލިޓީއެއް ގާއިމްކުރީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރުން ކޮންޓްރޯލް ކުރުމުގެ ގޮތުންނެވެ. ހުޅުމާލޭގެ ދެވަނަ ފިޔަވަހީގައި ވެސް 700 އެއްހާ ބިދޭސީންނަށް ފެސިލިޓީއެއް ގާއިމުކޮށްފައި ވެއެވެ.

މީގެއިތުރުން ހުޅުމާލެ އާއި ގުޅީފަޅާއެކު ޖުމުލަ 6،000 ބިދޭސީން ބޭތިއްބުމަށް ފެސިލިޓީތަށް ޤާއިމު ކުރަމުންދާނެ ކަމަށް ކަމާބެހޭ ފަރާތްތަކުން ވަނީ މީގެކުރިން ބުނެފައެވެ.

ކަމާބެހޭ ފަރާތަތްކުގެ އެންމެ ބޮޑު އިސްކަމެއް ދީގެން ކުރަމުންދާ އެއް މަސައްކަތަކީވެސް، ރާއްޖޭގައި އުޅޭ 200،000 އެއްހާ ބިދޭސީންގެ ތެރެއިން ގިނަ ބަޔަކު ތޮއްޖެހިގެން އުޅެމުންދާތީ، މި ރޯގާ އެމީހުންގެ ތެރޭގައި ފެތުރިއްޖެނަމަ ކޮންޓްރޯލް ކުރަން އުނދަގޫތަކެއް ކުރިމަތިވާނެ ކަމަށް ބަލާފައި ބިދޭސީންގެ ތޮއްޖެހުމުގެ މައްސަލައަށް ޙައްލެގެނައުމުގެ މަސައްކަތެވެ.

ރާއްޖޭގައި ގިނަ ޢަދަދެއްގެ ބިދޭސީން އުޅޭއިރު، ޤަވާއިދާ ޚިލާފަށް ވެސް ގިނަ ޢަދަދެއްގެ ބިދޭސީން އުޅެއެވެ. ބައެއް ފަރާތްތަކުން ލަފާކުރާ ގޮތުގައި ޤަވާއިދާ ޚިލާފަށް ވެސް 100،000 އެއްހާ ބިދޭސީން ރާއްޖޭގައި އުޅެއެވެ.