ކޮވިޑް-19: ގޭގެކުލި ނުދެއްކިގެން 12 މީހަކު ގެއިން ނެރެފައިވޭ؛ އެޗްއާރުސީއެމް
ކުލި ނުދައްކާނަމަ ގެއިން ނެރޭނެކަމަށް ގޭގެ ވެރިފަރާތުން ބުނެފައިވާ ކަމަށް 25 މީހަކު މައުލޫމާތު ދީފައިވޭ
ކޮވިޑް-19 އާ ގުޅިގެން ހިރިޔާ ސްކޫލް ވަގުތީ ހިޔާއަކަށް ބަދަލުކޮށްފަ: ވަޒީފާއާއި މުސާރައަށް އައި ބަދަލުތަކާ ގުޅިގެން ގިނަ ބައެއްގެ ދިރިއުޅުމަށް ވަނީ ބޮޑެތި އަސަރުކޮށްފަ-
ކޮވިޑް-19 ޕެންޑަމިކްއާ ގުޅިގެން ދިމާވި މާލީ ދަތިކަމުގެ ސަބަބުން ދިރިއުޅެމުންދިޔަ ގޭގެ ކުލި ނުދެއްކުނު 12 މީހަކު ގެއިން ނެރެފައިވާކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)އިން ބުނެފި އެވެ.
އެޗްއާރުސީއެމްއިން ކުރި ދިރާސާއަކުން ދައްކާގޮތުގައި، އެކޮމިޝަނަށް މައުލޫމާތު ދީފައިވާ ފަރާތްތަކުގެ ތެރެއިން 44 ޕަސެންޓް މީހުން ދިރިއުޅެނީ ކުށްޔަށެވެ. އޭގެ ތެރެއިން 30 ޕަސެންޓް މީހުން، އެމީހުންނަށް ލިބެމުންދިޔަ އާމްދަނީ ދަށްވުމުގެ ސަބަބުން ދިރިއުޅޭ ގޭގެކުލި ދެއްކުމަށް ދަތިވެފައިވާ ކަމަށް ބުނެފައި ވެއެވެ.
އެޗްއާރުސީއެމްއިން ކުރި ދިރާސާއިން ދައްކާގޮތުގައި، ކޮވިޑް-19ގެ މިހާލަތާއި ގުޅިގެން ގޭގެކުލި ކުޑަކޮށްދީފައިވާ ކަމަށް 12 ޕަސެންޓް މީހުން ބުނެފައިވާއިރު، 42 ޕަސެންޓް މީހުންގެ ދިރިއުޅުމުގެ ހާލަތަށް ބަދަލެއް އައިސްފައިނުވާ ކަމަށް ބުނެފައި ވެއެވެ.
މައުލޫމާތު ފޯރުކޮށްދިން ފަރާތްތަކުގެ ތެރެއިން 2 ޕަސެންޓް (25) މީހުންނަކީ ކުލި ދެއްކޭނެ ގޮތެއްނެތުމުން ދިރިއުޅޭތަނުން ނެރެލާނެކަމަށް ގޭގެ ވެރިފަރާތުން އަންގާފައިވާ ފަރާތްތައް ކަމަށް އެ ދިރާސާއިން ދައްކައެވެ. އަދި އޭގެ ތެރެއިން 1 ޕަސެންޓް (12) މީހުން، ކުލި ދެއްކޭނެ ގޮތެއް ނެތުމުން ދިރިއުޅެމުންދިޔަ ތަނުން ނެރެލާފައިވާ ފަރާތްތައް ކަމަށްވެސް އެޗްއާރުސީއެމްގެ ދިރާސާއިން ދައްކާއިރު، ގެއިން ނެރެލި 12 މީހުންގެ ތެރެއިން 8 މީހަކު ދިރިއުޅެނީ ވަގުތީ ހިޔަލުގަކަންވެސް އެޗްއާރްސީއެމް ރިޕޯޓްގައި ވެއެވެ.
އެޗްއާރުސީއެމްގެ ދިރާސާއިން ދައްކާގޮތުން، ކުލި ދެއްކޭނެ ގޮތެއް ނެތިގެން، 6 މީހަކު ވަގުތީ ހިޔާގައި، ގެސްޓް ހައުސް، ރަހްމަތްތެރިއެއްގެ ގޭގައި، އެހެން ފަރާތަކުން ނުވަތަ މީހަކު ހިލޭ ބަހައްޓައިދީފައިވާ ތަންތަނުގައި ދިރިއުޅެމުންދާ ކަމަށާއި، 5 މީހެއްގެ ވަޒީފާއާއި މުސާރައަށް އަސަރުކޮށްފައިވާއިރު ރޯދަމަހުގެ އިނާޔަތް ނުލިބޭކަމާއި ކާބޯތަކެތި ހޯދުމަށް ދަތިތަކާ ކުރިމަތިލާންޖެހިފައިވާ ކަމަށް ވަނީ ފާހަގަކޮށްފައެވެ.
