16 އަހަރުގެ ފިރިހެން ކުއްޖަކަށް ޖިންސީން ގޯނާކުރި މައްސަލައެއްގައި މީހަކު ހައްޔަރުކޮށްފި
8 މެއި 2020 | ހުކުރު 07:41ހައްޔަރު ކޮށްފައިވަނީ މެދުއުތުރު ޕްރޮވިންސްގެ 53 އަހަރުގެ ފިރިހެނެއް
ފުލުހުންގެ މައިމަރުކަޒު، ޝަހީދު ހުސައިން އާދަމް ބިލްޑިންގ: ކުޑަކުދިންނަށް ޖިންސީ ގޯނާކުރުމުގެ މައްސަލަތަކަކީ ސީރިއަސް މައްސަލަތަކެއްގެ ގޮތުގައި ބަލަމުންދާކަމަށް ބުނޭ
މަތި އުތުރު ޕްރޮވިންސް ގެ ރަށަކުން، 16 އަހަރުގެ ފިރިހެން ކުއްޖަކާމެދު ޖިންސީ ގޯނާކުރިކަމުގެ ތުހުމަތުގައި ފިރިހެނަކު ހައްޔަރުކޮށްފި އެވެ.
މަތިއުތުރު ޕްރޮވިންސް (ހއ. ހދ. ށ) އަތޮޅުތައް ހިމެނޭ ރަށަކުން އުމުރުން 16 އަހަރުގެ ފިރިހެން ކުއްޖަކާމެދު ޖިންސީ ގޯނާކުރިކަމުގެ ތުހުމަތުގައި ހައްޔަރުކޮށްފައިވަނީ 53 އަހަރުގެ ފިރިހެނެއް ކަމަށް ފުލުހުން ބުނެއެވެ.
ފުލުހުން ބުނީ އެމީހާ ހައްޔަރުކޮށްފައިވަނީ، މި މެއި މަހުގެ 8 ވަނަ ދުވަހުގެ 1:20 އެހާކަންހާއިރު ކަމަށެވެ.
ކުޑަކުދިންނާގުޅޭ މައްސަލަތަކަކީ ސީރިއަސް މައްސަލަތަކަކަށްވާތީ، އެކުއްޖަކީ ކޮންކުއްޖެއްކަން އެނގޭނެ މަޢުލޫމާތު ފުލުހުން ހާމަކުރަމުން ނުދެއެވެ.
ކުޑަކުދިންނަށް ޖިންސީ ގޯނާ ކުރުމުގެ އެތައް މައްސަލަތަކެއް މީގެކުރިންވެސް ފުލުހުން ތަޙުޤީޤު ކުރަމުންދިޔަނަމަވެސް، މިމައްސަލަތައް ޙައްލުކުރުމަށް އެކަށީގެންވާ ރަނގަޅު މަސައްކަތްތަކެއް ދައުލަތުގެ އެއްވެސް އިދާރާއަކަށް ކުރެވިފައެއް ނުވާކަމަށްބުނެ، ބައެއް ފަރާތްތަކުން ދައުލަތުގެ ކަމާބެހޭ އިދާރާތަކަށް ދަނީ ފާޑުކިޔަމުން ނެވެ. ޚާއްްޞަކޮށް، ފުލުހުންގެ މުއައްސަސާއަށާއި ޖެންޑަރ މިނިސްޓްރީއަށް މީގެކުރިންވެސް ބޮޑެތި ފާޑުކިޔުންތަކެއް ވަނީ ޢަމާޒު ވެފައެވެ.
