ވެލިދުއަކީ ވަރަށް ހުނަވެރި ޒުވާނުން އުޅޭ ރަށެއް، މިފަހަރު މިއޮތީ "ބެނީ އެންޑް ޑިޑޫސް" ޓޯކް ޝޯވ

ވެލިދުއަކީ ތަފާތު ހުނަވެރި ޒުވާނުންތަކެއް ދިރިއުޅެމުންދާ ރަށެކެވެ. ކޮންމެ މުނާސަބަތަކާއި ގުޅުވައިގެންވެސް ވެލިދޫގެ ޒުވާނުންގެ ހުނަރު މުޅި ރާއްޖެއަށް ފާހަގަވެގެންދެއެވެ. ސަބަބެއް ނެތިއެއް ނޫނެވެ. ރާއްޖޭގެ ހުރިހާ ރައްޔިތުންނަށް ވެލިދޫގެ ޒުވާނުންގެ ހުނަވެރިވެރިކަމާއި، ކުރަމުން އަންނަ މަސައްކަތްތައް ފުރިހަމަ ކަމުންނެވެ.

ކޮންްމެ އަކަސް ކޮވިޑް-19 އާ ގުޅިގެން މުޅި ރާއްޖޭގައި މިވަނީ ރައްކާތެރިކަމުގެ ފިޔަވަޅުތައް އަޅާފައެވެ. ސަރުކާރުންވެސް އަންގަމުން ދަނީ ގޭގައި ތިބުމަށެވެ. މިފަދަ ހައްސާސް ދަނޑިވަޅެއްގައި ވެލިދޫގެ ޒުވާނުން ވަނީ ގޭގައި ތިބޭ މީހުން މުނިފޫހި ފިލުވައިދިނުމުގެ ގޮތުން ޚާއްސަ ޓޯކް ޝޯވއެއް ފޭސް ބުކް ލައިވް މެދުވެރިކޮށް ބެލުންތެރިންނާއި ހަމައަށް ގެނެސްދޭން ފަށާފައެވެ. "ބެނީ އެންޑް ޑީޑޫސް" ޓޯކް ޝޯވ ގެ ނަމުގައި ވެލިދޫގެ ޒުވާނުންތަކެއް އިސްނަގައިގެން ކުރިއަށްގެންދާ މި ޝޯވއަށް ރާއްޖެއާއި ރާއްޖެއިން ބޭރުގައި ދިރިއުޅޭ ގިނަ ފަރާތްތަކެއް ޝައުގުވެރިކަން ވަނީ ލިބިގެން ގޮސްފައެވެ.

Advertisement

އަހުމަދު ނުހާދު (ބެނީ) އާއި މުހައްމަދު އަހުސަން (ޑިޑޫ) ހުށަހަޅައިދޭ މި ޝޯ ކުރިއަށް ދާނީ ކޮންމެ ރެއަކުވެސް 12:00 އިން 2:00 އަށެވެ.

ކޮންމެ ރެއަކުވެސް ޚާއްސަ މައުޟޫއު އަކަށް ވާހަކަ ދެއްކުމުގެ ފުރުސަތު މި ޝޯގައި ބެލުންތެރިންނަށް ލިބިގެން ދެއެެވެ. މުޖުތަމަޢުގައި ހިނގާ ކަންކަމާއި ގުޅޭ ގޮތުން ބެލުންތެރިން ޝައުގުވެރިވާފަދަ މައުޟޫއެއް ކޮންމެ ރެއެއްގެ ޝޯގައި ވެސް ހިމަނާފައި ވާއިރު އެމައުޟޫއު އަކާއި ގުޅޭ ގޮތުން އެބޭފުޅެެއްގެ ޚިޔާލުތައް ފޭސްބުކް މެދުވެރިކޮށް މެސެޖް ކުރަމުން ގެންދެވޭނެއެވެ.

މީގެ އިތުރުން ޚާއްސަ ސެގްމަންޓެއްގެ ގޮތުގައި "ނީލަން ތަބަށް" ވެސް ވަނީ ހުޅުވާލާފައެވެ. ނީލަން ތަބަކުގައި އޮންނަ "ވަން ޕީސް" ޕްރޮޑަކްޓް ބައްލަވައިގަތުމުގެ ފުރުސަތު ބެލުންތެރިންނަށް ލިބިގެންދެއެެވެ. ނީލަން ތަބަކަކީ ވެލިދޫގައި ހިންގާ އާރޓް އެންޑް ކްރާޕްޓް ތަކެތި ވިއްކާ ފިހާރައެއް ކަަމުގައިވާ "ކޯޓެކްސް" އަދި "ދި އައިލެންޑް އާރޓްސް އެމްވީ" އިން ސްޕޮންސަރ ކޮށްގެން ކުރިއަށް ގެންދާ ސެގްމަންޓެކެވެ. ނީލަން ތަބަށް ވިން ކުރާ ފަރާތަކަށް އެތަކެތި ދަނީ ފޯރުކޮށްދެމުންނެވެ.

ބެލުންތެރިނާއި ވީހާވެސް ބޮޑަށް ގުޅިގެން ކުރިއަށް ގެންދާ މި ޝޯވގައި ބެލިުންތެރިން ކުރާ ކޮމެންޓްތައް ވެސް ކިޔަމުން ގެންދެއެވެ. އަދި ބެލުންތެރިންގެ ރިކުއެސްޓަށް ލަވަކިޔައިދިނުމާއި ނެށުމުގެ ހަރަކާތްތައް ވެސް ކުރިއަށް ގެންދެއެވެ.

މި ޕެންޑަމިކްގައި ގޭގައި ތިބޭ ފަރާތްކަށް ޚާއްސަކޮށްގެން ގެނެސްދާ މި ޓޯކް ޝޯވގެ ޕްރޮޑިއުސަރަކީ އަހުމަދު އަހުނަފް (ތޫޕް) އެވެ. އަދި މި ޝޯ އަހުމަދު މާއިޝް (އައްމު) އެވެ.

މި ޝޯވއާއި ގުޅޭ ގޮތުން ޝޯވގެ ޕްރޮޑިއުސަރ ތޫޕް ބުނީ މިއީ ވެލިދޫގެ ޒުވާނުން ކޮޅެއް މަޖަލަކަށް ފެށިކަމެއް ކަމަށާއި، ޝޯވ ފަށާފައި ވަނީ ވެސް ބަސަރާ ކަދުރާއި ފީވަކު ދޮންކޭލުން ސްޕޮންސަރ ކޮށްގެން ކަމަށެވެ.

ނަމަވެސް ކުޑަ ދުވަސް ކޮޅެއްގެ ތެރޭގައި "ކޯޓެކްސް" ގެ ހެޔޮއެދުންތަކާއެކު ޝޯވ ކުރިއަށް ގެންދިއުމަށް ވަރަށްވެސް ހިތްގައިމު ސެޓެއްވެސް ތައްޔާރުކޮށްދީފައިވާ ކަމަށެވެ. ޝޯވއަށް ވަރަށް ގިނަ ފަރާތްތަކުގެ އެހީތެރިކަން ލިބެމުންދާ ކަމަށެވެ. ޚާއްސަކޮށް ވެލިދޫގެ ހުރިހާ އުމުރުފުރައެއްގެ ބޭފުޅުންގެ ތަރުހީބު ޝޯވއަށް ލިބިގެންދާ ކަަމަށް އޭނާ ބުންޏެވެ.

ސަރުކާރުގެ އިސް ބޭފުޅުންނާއި ރާއްޖޭގެ ގިނަ ސެލެބްރިޓީންވެސް ބަލަމުންދާ މި ޝޯވގައި މިނިސްޓަރ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހުމަދު މަޚްލޫފްވެސް ވަނީ ބައިވެވަޑައިގެންފައެވެ.

ޝޯވއާއި ގުޅޭ ގޮތުން މިނިސްޓަރ މަޚްލޫފް ވަނީ ޝޯވ ވަރަށް ފުރިހަަމަ ކަމަށެވެ. ވެލިދޫގެ ޒުވާނުން މިވަގުތު ކުރަމުން އެ ގެންދަނީ "ސަޅި" ކަމެއް ކަމަށްވެސް ވިދާޅުވެފައެވެ.

މިޝޯވގައި ބައިވެރިވާން ބޭނުންވާ ފަރާތްތަކުން "ފޮލޯ ބެނީ" ޕޭޖަށް ލައިކް ދިނުމުން އެ ޕޭޖުން "ބެނީ އެންޑް ޑިޑޫސް" ޓޯކް ޝޯވ ގަައި ބައިވެރި ވެވޭނެއެވެ.

މި ޓޯކް ޝޯވ ގެ އިތުރުންވެސް ބެނީ އެންޑް ޑިޑޫ ގެންދަނީ ބެލުންތެރިންގެ އެދުމުގެ މަތިން ހަވީރުގެ ވަގުތުގައި ރެކޯޑެޑް ސެގްމަންޓްތައް ވެސް ތައްޔާރު ކުރަމުންނެވެ. ރޯދަމަހު ގޭގައި ތިބޭ ފަރާތްތަކުން ރޯދަކުރުކޮށްލުމަށްވެސް "ފޮލޯ ބެނީ" ޕޭޖުން ޝޯތައް ބަލަމުން ގެންދެވޭނެއެވެ.

"ބެނީ އެންޑް ޑިޑޫސް" ޓޯކް ޝޯގެ އިތުރުން ވެލިދޫ ޒުވާނުން ތައްޔާރު ކުރާ ވެބް ސީރީޒްއެއްވެސް ވަރަށް އަވަހަށް ފެނިގެންދާނެ ކަަމަށް މިޝޯވ އުފައްދާ ފަރާތްތަކުން މަޢުލޫމާތު ދެއެެވެ.