ރަމަޟާންމަހުގެ ފުރަތަމަ ދިހަ ދުވަހު އެކަނިވެސް 100ޓަނުގެ ކަރާ ތޮއްޑޫން ބޭރުކުރި
މިއަހަރު ރޯދަމަހަށް ޚާއްޞަކޮށް ދަނޑުވެރިކަން ކުރުމަށް 116 ބިން ވަނީ ދޫކޮށްފައި
ކޮންމެ ރަމަޟާން މަހަކަށް ޚާއްޞަކޮށް ތޮއްޑޫ ދަނޑުވެރިން ގިނަ ޢަދަދެއްގެ ކަރާ ހައްދާ
ބަރަކާތްތެރި ރަމަޟާން މަހުގެ ފުރަތަމަ ދިހައެއް ނިމުނުއިރު ތޮއްޑޫން 100 ޓަނަށްވުރެ ގިނަ ކަރާ ބޭރުކޮށްފައިވާކަމަށް ތޮއްޑޫ ކައުންސިލުން ބުނެފިއެވެ.
ރާއްޖޭގައި އެންމެ ފުޅާ ދާއިރާގައި ދަނޑުވެރިކަން ކުރާ އެއް ރަށް ކަމަށްވާ އއ. ތޮއްޑޫގެ ރަށު ކައުންސިލުން ބުނީ މި ހިނގާ ރަމަޟާންމަހުގެ ފުރަތަމަ ދިހައެއް ނިމުނުއިރު 100 އަށްވުރެ ގިނަ ޓަނުގެ ކަރާ އެރަށުން ބޭރުކޮށްފައިވާކަމަށާއި، ކަރަލުގެ އިތުރުން 25 ޓަނަށްވުރެ ގިނަ ދަނޑުވެރިކަމުގެ އެހެން ބާވަތްތައްވެސް ބޭރުކޮށްފައިވާކަމަށެވެ.
ރަމަޟާންމަހަށް ޚާއްޞަކޮށް ކަރާހެއްދުމަށް ނަން މަޝްހޫރު ތޮއްޑޫން މިއަހަރު ރަމަޟާންމަހަށް ޚާއްޞަކޮށް ދަނޑުވެރިކަން ކުރުމަށް 116 ބިން ދޫކޮށްފައިވެއެވެ. މިއީ މިދިޔަ އަހަރަށްވުރެ އިތުރު ޢަދަދެކެވެ. މިދިޔަ އަހަރު އެރަށުން ދަނޑުވެރިކަމަށް ދޫކުރީ 114 ބިން ކަމަށް ކައުންސިލުން ބުނެއެވެ.
މި ރަމަޟާންމަހުގެ ފުރަތަމަ ދިހަ ދުވަހު 100 ޓަނަށްވުރެ ގިނައިން ކަރާ ތޮއްޑޫން ބޭރުކޮށްފައިވާއިރު، ފާއިތުވި އަހަރުގެ ފުރަތަމަ ދިހައެއްގައި 160 ޓަނަށްވުރެ ގިނަ ކަރާ ތޮއްޑޫން ބޭރުކޮށްފައިވެއެވެ.
ދަނޑުވެރިކަމުގެ އެހެންބާވަތްތައް ބަލާއިރު މިއަހަރު 25 ޓަނަށްވުރެ ގިނައިން ބޭރުކޮށްފައިވާއިރު، މިދިޔަ އަހަރު ބޭރު ކުރި ޢަދަދު ސާޅީސް ޓަނަށް އަރައެވެ.
ފާއިތުވި ދެ އަހަރު ވެސް މޫސުން ގޯސްވުމުގެ ސަބަބުން ތޮއްޑޫގެ ދަނޑުތައް ހަލާކުވުމުގެ އިތުރުން، ދަނޑުތަކަށް ތަފާތު ބަލިތައް ޖެހުމުގެ ސަބަބުން ކަރާހެއްދުމުގައި ބޮޑެތި ގޮންޖެހުންތައް ކުރިމަތިވިއެވެ. އެހެން ނަމަވެސް މިއަހަރަކީ ފާއިތުވި ފަސް އަހަރާ އަޅާބަލާއިރު ދަނޑުތަކަށް ގެއްލުންނުވެ އެންމެ ކާމިޔާބުކަމާއެކު ކަރާ ހެއްދުނު އަހަރުކަމަށް ތޮއްޑޫ ކައުންސިލުން ބުނެއެވެ.
ރަމަޟާން މަހަށް ޚާއްޞަކޮށް، ކަރާގެ އިތުރުން މެލަން އާއި ކިއުކަމްބާ އަދި ބައްޓާއި، މިރުހާއި، ލެޓިއުސްގެ އިތުރުން ކޮޕީފަތް ވެސް ތޮއްޑޫ ދަނޑުވެރިން ހައްދައެވެ.
ކޮވިޑް-19 އާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ޒަރޫރީ ބޭނުންތަކުގައި މެނުވީ ދަތުރުފަތުރު ކުރުން މަނާކޮށްފައިވާއިރު، ތޮއްޑޫން މާލެއަށް މުދާ ހިފައިގެން ކުރާ ދަތުުރުތައް ވަނީ ހަފުތާއަކު ދެ ދަތުރަށް މަދުކޮށްފައެވެ.
ދަނޑުވެރިކަމުގެ ސިނާޢަތް ކުރިއެރުވުމުގެ މަޤުޞަދުގައި ސަރުކާރުން އުފައްދަވާފައިވާ ޚާއްޞަ ކުންފުނި "އެގްރޯ ނެޝަނަލް ކޯޕަރޭޝަން" އިން ވަނީ ދިވެހި ދަނޑުވެރިކަމުގެ ބާވަތްތައް ހަމައަގުގައި ގަތުމުގެ މަސައްކަތް ފަށާފައެވެ.
އެގްރޯ ނޭޝަނަލް ކޯޕަރޭޝަނުން މަޢުލޫމާތުދޭގޮތުގައި އެކުންފުނީގެ މަސައްކަތުގެ ދުވެލި އަވަސްކޮށްފައިވަނީ މިދަނޑިވަޅުގައި ކޮވިޑް-19 ގެ ސަބަބުން ރާއްޖޭގެ އިޤުތިޞާދަށް ކުރާ އަސަރުތައް ކުޑަކޮށް، ކާބޯތަކެތި ހޯދުމަށް ދިމާވެދާނެ ދަތިތަކަށް ޙައްލެއް ހޯދުމުގެ ގޮތުންކަމަށެވެ. އަދި އެކުންފުންޏަށް ތަކެތި ވިއްކަން ބޭނުންވާ ފަރާތްތަކުން އެފަރާތެއްގެ މަޢުލޫމާތު ރަށު ކައުންސިލަށް ދިނުމުން ޓާސްކްފޯސް މެދުވެރިކޮށް މުޢާމަލާތް ކުރުމުގެ އިންތިޒާމު ހަމަޖެހިފައިވާކަމަށެވެ.
އަދި ރަށު ކައުންސިލާ ގުޅިގެން ކަނޑައެޅިފައިވާ މުއްދަތަށް ތަކެތި ހަމަކޮށް މާލެ ފޮނުވުމުން، ބޯޓުން ބާލާ ތަކެތި ވަގުތުން ކިރައި، ހަމަތޯ ބަލާނެ ކަމަށާއި އަދި ހަމަޖެހިފައިވާ އުޞޫލުގެދަށުން ކުންފުންޏަށް ވިއްކި ތަކެއްޗަށް ފައިސާ ދޫކުރާނެކަމަށް އެގްރޯ ނެޝަނަލް ކޯޕަރޭޝަނުން ބުނެއެވެ. އެހެންކަމުން މިއީ ތޮއްޑޫ ދަނޑުވެރިންގެ އިތުރުން ރާއްޖޭގެ ހުރިހާ ދަނޑުވެރިންނަށް ވެސް ލިބުނު ވަރަށްބޮޑު ފަސޭހަކަމެކެވެ.
