ކުޅުދުއްފުށި ސިޓީގެ ކާފިއު އަނެއްކާ ވެސް އިތުރުކޮށްފި
7 މެއި 2020 | ބުރާސްފަތި 13:20ކުޅުދުއްފުށީގައި ކާފިއު އިއުލާންކޮށްފައިވަނީ މެންދުރު ފަހު 3:30 އިން ހެނދުނު 6:00 އަށް
ކުޅުދުއްފުށި ސިޓީގެ އަމީނީ މަގު ފެންނަ ގޮތަށް ނަގާފައިވާ ޑްރޯން ޝޮޓެއް - އިތުރު 7 ދުވަހަށް އަނެއްކާ ވެސް ކާފިއު ވަނީ އިތުރުކޮށްފައި
ކުޅުދުއްފުށި ސިޓީގައި ކޮވިޑް-19 ފެތުރުމުގެ ނުރައްކާ ބޮޑުވެފައިވާތީ އެ ސިޓީގެ ކޮވިޑް-19 ޓާސްކު ފޯހުން ކާފިއުގެ މުއްދަތު އަނެއްކާވެސް 7 ދުވަހަށް އިތުރުކޮށްފިއެވެ.
ކުޅުދުއްފުށި ސިޓީގައި ފުރަތަމަ 03 ދުވަހުގެ ކާފިއުއެއް ހިންގީ އޭޕްރީލް މަހުގެ 21 ވަނަ ދުވަހުއެވެ. އެ މުއްދަތު ދެވަނަ ފަރަހަށް އިތުރުކުރީ 1 މެއިގެ މެންދުރު 12:00އިގެ ނިޔަލަށެވެ. އަދި ތިން ވަނަ ފަހަރަށް 7 ދުވަސް އިތުރު ކޮށްފައިވާއިރު، ކާފިއުގެ މުއްދަތު ހަމަވާނީ ބުރާސްފަތި ދުވަހުގެ ނިޔަލަށެވެ.
ކުޅުދުއްފުށީގައި ކާފިއުގެ އަމުރު އިޢުލާނުކޮށްފައިވަނީ މެންދުރު ފަހު 3:30 އިން ހެނދުނު 6:00 އަށެވެ. މިކަމާއި ގުޅިގެން ކުޅުދުއްފުށީ ސިޓީ ކޮވިޑް-19 ޓާސްކް ފޯހުން ބުނެފައިވަނީ ކާފިއުގެ މުއްދަތު 14 މެއިގެ ރޭގަނޑު 12:00 އާއި ހަމައަށް އިތުރުކުރަން ނިންމާފައިވާ ކަމަށެވެ.
ކުޅުދުއްފުށި ކައުންސިލުން ބުނީ ކޮވިޑް-19 ރޯގާގެ ބިރުވެރިކަން ރާއްޖޭގައި އިންތިހާއަށް ބޮޑުވެފައިވާއިރު، އުތުރުގެ ބައެއް ރަށްރަށުގެ މީހުން ބައްޔަށް ޕޮޒިޓިވްވެ، ބަލި އިތުރަށް ފެތުރެމުންދާ ކަމަށެވެ.
ކުޅުދުއްފުށި ސިޓީ ކައުންސިލުގެ ކާފިއު ހިންގަނީ ހެލްތު ޕްރޮޓެކްޝަން އެޖެންސީގެ އެންގުމުގެގައި ލޯކަލް ކައުންސިލްގެ އިޙްތިޞާޞް ހިނގާ ޞަރަޙައްދުތަކުގައި ކޮވިޑް-19 ފެތުރުމުގެ ފުރުޞަތު އޮތް މިންވަރަށާއި، ޙާލަތަށް ރިޢާޔަތްކޮށް، އެއްވެ އުޅުން ހުއްޓުވުމަށާއި އިޖްތިމާޢީ ގައިދުރުކަން ޤާއިމު ކުރުމަށް ފިޔަވަޅު އެޅުމަށް ޑިރެކްޓަރ ޖެނެރަލް އޮފް ޕަބްލިކް ހެލްތު ދެއްވާފައިވާ ބާރުގެ ދަށުންނެވެ.
ކާފިއު އިޢުލާނުކޮށްފައިވާ ވަގުތު ތަކުގައި ހުއްދަ ނެތި ބޭރަށް ނުކުމެ އުޅުމަކީ މަނާ ކަމެއްކަމަށް ކުޅުދުއްފުށީ ކައުންސިލުން ވަނީ އަންގާފައެވެ. އަދި ކާފިއު ހިންގާ ވަގުތު ތަކުގައި އެއްވެސް ވިޔަފާރީގެ އެއްވެސް ޚިދުމަތެއް ދިނުމަކީ މަނާ ކަމެއް ކަމަށާއި، ކާފިއު ނޫން ގަޑިތަކުގައި ވިޔަފާރިތަކުން ޢާންމުންނަށް ޚިދުމަތް ދިނުމަށް އިޖްތިމާޢީ ގައިދުރުކަން ކަށަވަރު ކުރެވޭ ފަދަ ގޮތަކަށް ކައުންސިލުން ދޭ އިރުޝާދާ އެއްގޮތަށް ނިޒާމެއް ރޭވުމަށް ވަނީ އަންގާފައެވެ.
އަދި މި ނޫން ގޮތަކަށް ޢާންމުންނަށް ޚިދުމަތް ދިނުމަކީ މަނާކަމެއްކަމަށާއި، މި އެންގުމާއި ޚިލާފުވާ ފަރާތްތަކާމެދު ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 143 މާއްދާއާއި ޙަވާލާދީ ކައުންސިލުން ކުރާ ޢަމުރަށް ނުކިޔަމަންތެރިވާ ފަރާތްތަކާއި މެދު ޢަދަބެއްގެ ގޮތުގައި މައްސަލައިގެ ކުޑަ ބޮޑުމިނަށް ބަލައި 500 ރުފިޔައާއި 5000 ރުފިޔާއާ ދެމެދުގެ ޢަދަދުކަން ޖޫރިމަނާ ފިޔަވަޅު އެޅުމަށް ލިބިދޭ ބާރުގެ ދަށުން ޢަމަލު ކުރަމުގެ އިޚްތިޔާރު ލިބިގެންވާ ކަމަށެވެ.
