ކޮވިޑް-19އާ ގުޅޭ ގޮތުން ކުރެވޭ ޚަރަދުތަކުގެ ތަފްޞީލު ކޮންމެ ހަފުތާއެއްގެ ހޯމަ ދުވަހު ހާމަ ކުރާނެކަމަށް ފިނޭންސް މިނިސްޓަރު އިބްރާޙިމް އަމީރު ވިދާޅުވެއްޖެއެވެ.

ބުރާސްފަތި ދުވަހު ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީރު ވިދާޅުވީ މިހަފުތާގެ ހޯމަ ދުވަހު ފިނޭންސް މިނިސްޓްރީން ފަރާތުން ކޮވިޑް-19އާ ގުޅޭ ގޮތުން ކުރެވޭ ޚަރަދުތަކުގެ ތަފްޞީލު ޢާންމު ކުރަން ފަށާފައިވާ ކަމަށާއި، މީގެ ފަހުން ކޮންމެ ހަފުތާއެއްގެ ހޯމަ ދުވަހު އެމަޢުލޫމާތު ހާމަ ކުރަމުން ގެންދާނެ ކަމަށެވެ.

މިގޮތަށް ޢަމަލު ކުރުމަށް ނިންމި މައިގަނޑު މަޤުޞަދަކީ ކޮވިޑް-19އާ ގުޅިގެން ކުރެވޭ ޚަރަދުތަކާއި، ކުރާ ހުރިހާ މަސައްކަތްތަކަކީ ދެފުށް ފެންނަ ހާމަކަމާއެކު، ޒިންމާދާރު ކަމާއެކު ކުރެވޭ މަސައްކަތްކަށް ހެދުން ކަމަށް މިނިސްޓަރު ވިދާޅުވިއެވެ.

"ޒީރޯ ޓޮލަރެންސް ޓު ކޮރަޕްޝަން" އަކީ ރައީސް އިބްރާހިމް މުޙައްމަދު ޞާލިޙުގެ ވަޢުދެއްކަން ފާހަގަކުރައްވައި މިނިސްޓަރު އަމީރު ވިދާޅުވީ މިޙާލަތުގައި ވެސް ކޮރަޕްޝަނުގެ ޢަމަލުތަކަށް ފުރުޞަތު ނުދިނުމަށް އެސީސީން ކޮރަޕްޝަން ހިރާސް ކުޑަ ކުރުމުގެ އިރުޝާދު ނާމާއެއް ޢާންމުކޮށްފައިވާ ކަމަށެވެ.

ދައުލަތުގެ އޮފީސްތަކަށް ބަލައި ގަންނަ ފައިސާ މޯބައިލް ޕޮއެންޓް ސޭލް މެދުވެރިކޮށް މިނިސްޓްރީން ޑިވަލޮޕްކޮށްފައިވާ ބަނޑޭރި ޕޯޓަލްއިން ބަލައިގަނެވޭނެ އިންތިޒާމު ހަމަޖެހިފައިވާކަން ފާހަގަކުރައްވައި މިނިސްޓަރު ވިދާޅުވީ ސަރުކާރުގެ ހަ އޮފީހަކުން ކައުންޓަރުންނާއި އެހެނިހެން ގޮތްގޮތުން ބަލައިގަންނަ ފައިސާ މިސިސްޓަމް މެދުވެރިކޮށް ބަލައިގަނެވޭނެ އިންތިޒާމު ހަމަޖެހިފައިވާ ކަަމަށެވެ.

ޚާއްޞަކޮށް ކޮވިޑް-19އާ ގުޅިގެން ސަރުކާރުން އެކިއެކި ފަރާތްތަކުން އެހީގެ ގޮތުގައިދޭ ފައިސާ މިސިސްޓަމް މެދުވެރިކޮށް ބަލައިގަނެވޭނެ ކަމަށާއި، މިއީ ދައުލަތުން މިހާތަނަށް އޮޓަމޭޓް ސިސްޓަމެއް މެދުވެރިކޮށް ލިބޭ ފައިސާ ބަލައިގަނެ ބޭންކް ކުރެވޭނެ އިންތިޒާމު ހަމަޖެހުނު ފުރަތަމަ ފަހަރުކަން މިނިސްޓަރު އަމީރު ވަނީ ފާހަގަކުރައްވާފައެވެ.