ކޮވިޑް-19ގެ މިޙާލަތުގައި ވިލާ އެއަރއިން ހިންގަމުން އަންނަ ފްލައިމީގެ ހުރިހާ މުވައްޒަފުންނަށް ކުރިއަށް އޮތް ތިން މަހު ދެވޭނެ ކަމަށް ބެލެވެނީ 2800 ރުފިޔާ ކަމަށް ވިލާ ޝިޕިން އެންޑް ޓްރޭޑިން ކޮމްޕެނީން ބުނެފިއެވެ.

މަޝްހޫރު ވިޔަފާރިވެރިޔާ ޤާސިމް އިބްރާހީމްގެ ވިލާ ކުންފުނިން ފްލައިމީގެ މުވައްޒަފުންނަށް ފޮނުވާފައިވާ ސަރކިއުލަރގައި ބުނީ ކޮވިޑް-19 އާ ގުޅިގެން ވިލާގެ ދަށުން ހިންގާ ރިސޯޓުތައް ހުއްޓުމަކަށް އައިސްފައިވާ ކަމަށެވެ. އަދި ރާއްޖޭގެ ވައިގެ ބަނދަރު ބަންދުކޮށްފައިވާ މިދަނޑިވަޅުގައި ފަތުރުވެރިން އައުން ހުއްޓި ފްލައިމީގެ އޮޕަރޭޝަންތައް ހުއްޓާލާފައިވާތީ ކުންފުންޏަށް މާލީ ދަތިތަކެއް ލިބެމުންދާކަމަށެވެ.

އެގޮތުން އޭޕްރީލް 1 އިން ފެށިގެން ތިންމަސްދުވަހުގެ މުއްދަތަކަށް ކުންފުނީގެ ހުރިހާ މުވައްޒަފުންނަށް މުސާރައިގެ ގޮތުގައި 2800 ރުފިޔާ ދިނުމަށް ފްލައިމީގެ ޑިރެކްޓަރުންގެ ބޯޑުން ނިންމާފައިވާ ކަމަށެވެ.

2800 ރުފިޔާއަކީ މިދަނޑިވަޅުގައި ދެވެން އޮތް އެންމެ ބޮޑު ޢަދަދުކަން ފާހަގަކޮށް ފްލައިމީއިން ބުނީ ސަރުކާރުން ތަޢާރަފުކޮށްފައިވާ ރިލީފް ޕެކޭޖްގެ ލިބުނުހާ އަވަހަށް މުވައްޒަވުންގެ މުސާރަށް ހެޔޮ ބަދަލެއް ގެންނާނެ ކަމަށެވެ.

މި ނިންމުމަކީ މިހާތަނަށް ކުންފުނިން ނިންމަންޖެހުނު އެންމެ އުދަނގޫ ނިންމުން ކަމަށާއި، މިގޮތަށް ނިންމީވެސް މިޙާލަތުގައި ވެސް އެއްވެސް މުވައްޒަފަކު ވަޒީފާއިން ދޫކޮށްލަން ބޭނުން ނުވާތީ އާއި ކުންފުންޏަށް އެއްވެސް ފައިސާއެއް ހޯދުނަސް އެފައިސާ ހަމަހަމަޔަށް ހުރިހާ މުވައްޒަފުންގެ މެދުގައި ޙިއްސާ ކުރުމުގެ މަޤްޞަދުގައި ކަމަށް ސަރކިއުލާގައި ބުނެފައިވެއެވެ.

މީގެ އިތުރުން ސަކިއުލަރގައި ބުނެފައިވަނީ ކޮވިޑް-19 ގެ ޙާލަތު ކޮންމެ ދުވަހަކުވެސް ބަލައި ވަޒަން ކުރަމުންދާ ކަމަށާއި، ޙާލަތު ރަގަޅުވެ، އޮޕަރޭޝަނަށް ގެނެވޭ ވަރަކުން މުއައްޒަފުންގެ ކަންކަން ހަމަޖައްސަމުންދާނެ ކަމަށެވެ.

ފްލައިމީގެ އޮޕްރޭޝަންތައް ހުއްޓާލާފައިވަނީ މަރޗްމަހުގެ 29 އިން ފެށިގެން ވަކި މުއްދަތެއް ނެތް ގޮތަށެވެ. އަދި ފަލައިމީގެ މުވައްޒަފުންނަށް 2800 ރުފިޔާ ދިނުމަށް ނިންމާފައިވާއިރު، ކުރިއަށް އޮތް ތިން މަހުގެ ވިލާ ކުންފުނީގެ ހުރިހާ ރިސޯޓެއްގައި މަސައްކަތް ކުރާ މުވައްޒަފުންނަށް ވެސް ދިނުމަށް ނިންމާފައިވަނީ އެންމެ 1000 ރުފިޔާއެވެ.