ޗައިނާއިން ކޮވިޑް-19 ގެ އިތުރު 2 ކޭސް ރިޕޯޓުކޮށްފިއެވެ.

ޗައިނާގެ ނޭޝަނަލް ހެލްތު ކޮމިޝަނާ ޙަވާލާދީ ރޮއިޓަރސްގައި ރިޕޯޓުކޮށްފައިވާ ގޮތުން ބުރާސްފަތި ދުވަހު ޗައިނާއިން ކޮވިޑް-19 ގެ އިތުރު 2 ކޭސް ރިޕޯޓް ކޮށްފައިވާއިރު، އެ ދެ ކޭސްއަކީވެސް އިމްޕޯޓަޑް ކޭސްތަކެކެވެ. އެގޮތުން ބުރާސްފަތި ދުވަހު ރިޕޯޓް ކުރެވުނު 2 ކޭސްއަކީ ޤައުމުން ބޭރުން ޗައިނާއަށް ދަތުރުކޮށްފައި އައި ފަހުން ޕޮޒިޓިވްވި ކޭސްތަކެކެވެ.

އޭގެ އިތުރުން، ބުދަ ދުވަހު ޗައިނާއިން ވަނީ އަލާމަތްތައް ނުފެނި ޕޮޒިޓިވްވި އިތުރު 6 ކޭސްއަކާއި އިމްޕޯޓަޑް 2 ކޭސްވެސް ރިޕޯޓް ކުރެވިފައެވެ. ނަަމަވެސް މިއީ އޭގެ ކުރީ ދުވަސްތަކާ އަޅާބަލާއިރު ދަށް ޢަދަދެއްކަމަށް ރިޕޯޓުތައް ބުނެއެވެ.

ޗައިނާގައި ހަލުވިކަމާއެކު ފެތުރުނު ކޮރޯނާވައިރަސް އެންމެ ފުރަތަމަ ފެނުނުކަމަށް ރިޕޯޓުކޮށްފައިވަނީ ހުބެއި ޕްރޮވިންސްގެ ވުހާން ސިޓީންނެވެ. އޭގެފަހުން ޗައިނާގައި ވައިރަސް ޖެހިފައިވާ މީހުންގެ ޢަދަދު 82,883ށް އަރާފައިވާއިރު، އެޤައުމުގައި މަރުވީ މީހުންގެ ޢަދަދު 4633ގައި ވަނީ ހިފެހެއްޓިފައެވެ. އެގޮތުން ޗައިނާގައި މިހާރު ވައިރަސް ކޮންޓްރޯލް ކުރެވިފައިވާކަމަށް އެ ޤައުމުގެ ނޭޝަނަލް ހެލްތު ކައުންސިލުން ބުނެފައިވެއެވެ.

އޭގެ އިތުރުން، ޗައިނާގައި ބަލި ޖެހިގެން ރަނގަޅުވި މީހުންގެ ޢަދަދުވެސް ވަނީ 77،960ށް އަރާފައެވެ.