މާލެ ތެރޭގެ ހަރަކާތްތައް އިތުރަށް މަދުކުރަން ޓާސްކްފޯހުން މަޝްވަރާކޮށްފި
އިތުރު ކޭސްތަކެއް ފެނިދާނެ ކަމަށް ޕްރޮޖެކްޝަންސްތަކުން ދައްކާ
ެނެޝަނަލް ޓާސްކްފޯސްގެ މެމްބަރުންނާ ވީޑިއޯ ކޮންފަރެންސް މެދުވެރިކޮށް ރައީސް ބައްދަލުކުރައްވަނީ
ކުރިއަށް އޮތް ދެ ހަފުތާގެ ތެރޭގައި ކޭސްތަކުގެ އަދަދު އިތުރުވާނެ ކަމަށް އަންދާޒާކުރެވޭތީ، މީސް މީހުންގެ ހަރަކާތްތައް މަދުކުރަން އިތުރު ފިޔަވަޅުތަކެއް އެޅުމަށް ނެޝަނަލް ޓާސްކްފޯހުން މަޝްވަރާކޮށްފި އެވެ.
މަޝްވަރާކުރެވުނު ކަންތައްތައް ހިއްސާކުރައްވާ ރައީސް އޮފީހުން ކުރި ޓްވީޓެއްގައި ވަނީ، ކޭސްތައް އިތުރުވެދާނެ ކަމަށް ޕްރޮޖެކްޝަންސްތަކުން ދައްކާތީ މިހާރަށް ވުރެ ބޮޑަށް ސަމާލުވާން ޖެހޭ ކަމަށެވެ. އަދި ކޮންމެހެން ބޭރަށް ދާން ޖެހިއްޖެ ހާލަތެއްގައި މެނުވީ އެއް ތަނުން އަނެއް ތަނަށް ދިއުން މަނާކުރަން މަޝްވަރާކޮށްފައި ވެއެވެ.
ފުރަބަންދު ކުރުމާއިއެކު، މާލެ ސިޓީގައި ދިރިއުޅޭ ރައްޔިތުންނަށް ޒަރޫރީ ބޭނުމެއްގައި ނުވަތަ ކުއްލި ހާލަތެއް މެދުވެރިވެގެން މެނުވީ ބޭރަށް ނިކުތުން ވަނީ މަނާކުރެވިފަ އެވެ. އަދި ޒަރޫރީ ބޭނުމެއްގައި ގެއިން ބޭރަށް ނިކުންނަށް ޖެހުނަސް ނިކުމެވެނީ، މޯލްޑިވްސް ޕޮލިސް ސަރވިސްގެ ހުއްދައާއެކުގަ އެވެ.
ރައްޔިތުންގެ ހަރަކާތްތައް މަދުކުރަން އަޅަން ނިންމާފައިވާ ފިޔަވަޅުތަކުގެ ތަފްސީލު މިހާތަނަށް ލިބިފައެއް ނުވެ އެވެ. އަދި މިހާރު ވެސް ވަރަށް ބޮޑަށް ހަރަކާތްތައް ކޮންޓްރޯލް ކުރެވިފައިވާއިރު، ބެލެވޭ ގޮތުގައި އެއް ފަހަރާ މާލޭގެ މަގުމަތީގައި އުޅޭ ފަރާތްތަކުގެ އަދަދު މަދުކުރުމަށް މަސައްކަތް ކުރެވިގެން ދާނެ އެވެ.
ފުލުހުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ހިއްސާކޮށްފައިވާ މައުލޫމާތަށް ބަލާއިރު، މާލެ 26 ޒޯނަކަށް ބަހާލާފައިވާއިރު، ކޮންމެ ޒޯނެއްގައި އެއްފަހަރާ މަގުމަތީގައި އުޅޭނީ ގިނަވެގެން 65 މީހުންނެވެ. މި އަދަދުތަކަށް ބަލާއިރު، ހުއްދަ ދެވިފައިވާ ވަގުތުތަކުގައި މާލޭ މަގުމަތީގައި އެއްފަހަރާ ނިކުމެ އުޅޭނީ 1690 މީހުންނެވެ.
