ވީއައިއޭގެ ޓަރމިނަލްގައި ކިއު ހަދާއިރު ތިބެންވީ ދުރުމުން އަންގައިދިނުމަށް މާކްތަކެއް ޖަހައިފި
6 މެއި 2020 | ބުދަ 14:37މުއައްޒަފުންގެ ސަލާމަތާ ރައްކާތެރި ކަމަށް ޚާއްސަ ސަމާލުކަމެއްދޭނެ
ވެލާނާ އިންޓަރނޭޝަނަލް އެއަރޕޯޓުގެ ކިއު ހަދާ ސަރަހައްދުގައި މީހުން ތިބެންވާ ދުރުމުން ފާހަގަ ކުރެވިފައި
ކޮވިޑް-19އިން ރައްކާތެރިވުމުގެ ގޮތުން ވެލާނާ އިންޓަރނޭޝަނަލް އެއަރޕޯޓުގައި އިތުރު ފިޔަވަޅުތަކެއް އަޅައިފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީލްގެ) އިން ބުނީ ކޮވިޑް-19އިން ރައްކާތެރިވުމަށް ގިނަ ފިޔަވަޅުތަކެއް އަޅާފައިވާ ކަމަށާއި، އިތުރަށް ހަރުދަނާ ކުރުމަށް ވެސް މަސައްކަތްތަކެއް ކުރަމުންދާ ކަމަށެވެ.
އެގޮތުން އެއަރޕޯޓުގެ އިންޓަނޭޝަން ޕަސެންޖަރ ޓަރމިނަލްގައި އިޖްތިމާޢީ ގައިދުރުކަން ދެމެހެއްޓުމަށް ސަފު ހަދާއިރު ތިބެންވީ ދުރުމުން އަންގައިދިނުމަށް މާކްތަކެއް ޖަހާފައިވާ ކަމަށެވެ. އަދި ޑޮމެސްޓިކް ޓާމިނަލްގައި ވެސް މިގޮތަށް މާކްތައް ޖަހާފައިވާ ކަމަށް އެމްއޭސީއެލުން ބުނެއެވެ.
އެއަރޕޯޓުގައި ޚާއްޞަ ފިޔަވަޅުތައް އަޅަމުންދާއިރު، މުއައްޒަފުންގެ ސަލާމާތާ ރައްކާތެރިކަމަށް ވަނީ ގިނަ ފިޔަވަޅުތަކެއް އަޅާފައެވެ.
މާލެސިޓީ ފުރަބަންދު ކުރުމާއި ގުޅިގެން ރާއްޖޭގެ ވައިގެ ބަނދަރު ވަނީ ބަންދުކޮށްފައެވެ.
ކޮވިޑް-19އިން ރައްކާތެރިވުމަށް އިޖްތިމާޢީ ގައިދުރުކަން ބެހެއްޓުމަށް ތަކުރާރުކޮށް ކަމާބެހޭ ފަރާތްތަކުން ދަނީ އިލްތިމާސް ކުރަމުންނެވެ. ކޮވިޑް-19އަކީ އަވަހަށް ފެތުރޭ ވައިރަސްއަކަށްވާތީ ކޮންމެ މީހަކު ވެސް ފަރުދީ ޒިންމާ ނެގުމަށް ކަމާބެހޭ ފަރާތްތަކުން ދަނީ އިލްތިމާސްކުރަމުންނެވެ.
