މަސައްކަތް ކުރަނީ ރައްޔިތުންގެ ބޭނުންތަކަށް ދަތިނުވާ ގޮތަށް މުދާ ފޯރުކޮށްދިނުމަށް: ނާޝިދު
6 މެއި 2020 | ބުދަ 12:18މުދާ ފޯރުކޮށްދެވެނީ ކަސްޓަމްސްއިން ކްލިއަރ ކޮށްދިނީމައި
ކަސްޓަމްސްގެ ބައެއް މުއައްޒަފުން ދަނީ ގޭގައި ވެސް މަސައްކަތް ކުރަމުން
މޯލްޑިވްސް ކަސްޓަމްސް ސަރވިސްއިން މަސައްކަތް ކުރަނީ ރައްޔިތުންގެ ބޭނުންތަކަށް ދަތިނުވާ ގޮތަށް މުދާ ފޯރުކޮށްދިނުމަށް ކަމަށް އެސިސްޓެންޓް ކޮމިޝަނަރ އޮފް ކަސްޓަމްސް ޢަބްދުﷲ ނާޝިދު ވިދާޅުވެއްޖެއެވެ.
ބުދަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ނާޝިދު ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ އިރުޝާދުގެ ދަށުން ހުރިހާ މަސައްކަތެއް ކުރިއަށްދާ ކަމަށެވެ.
މުދާ ފޯރުކޮށްދިނުމުގެ އެންމެ އިސްދައުރެއް އަދާ ކުރެވޭނެ ބަޔަކީ ކަސްޓަމްސްކަން ފާހަގަކުރައްވައި ނާޝިދު ވިދާޅުވީ ރާއްޖެއަށް މުދަލެއް އިންޕޯޓު ކުރުމަށްފަހު ކަސްޓަމްސްއިން ކްލިއަރކޮށް ނުނީ އެމުދަލެއް ރާއްޖޭގެ އެހެން ރަށްތަކަށްށާއި، މާލެ ތެރޭގައި ހުންނަ ފިހަރާތަކަށް ފޯރުކޮށް ނުދެވޭނެ ކަމަށެވެ.
އެގޮތުން މިމަސައްކަތުގައި ވަރުބަލިކަމެއް ނެތި ކަސްޓަމްސްގެ މުއައްޒަފުން ބުރަ މަސައްކަތްތަކެއް ކުރަމުންދާކަން ނާޝިދު ފާހަގަކުރެއްވިއެވެ. އަދި ވިދާޅުވީ މަސައްކަތް ކުރަނީ އެއްވެސް ދަތިތަކަމެއް ނެތި މުދާ ފޯރުކޮށްދިނުމަށް ކަމަށެވެ.
ނާޝިދު ވިދާޅުވީ އެއަރޕޯޓާއި، ސީޕޯޓް އަދި ހުޅުމާލެ ޕޯޓްގައި ޕިޒިކަލީ އެޓެންވެގެން މަސައްކަތް ކުރަންޖެހޭ އޮފިސަރުންތަކެއް އެކަހެރިކޮށްގެން މަސައްކަތް ކުރެވޭނެ ނިޒާމު ވެސް ޤާއިމުކޮށްދީފައިވާ ކަމަށެވެ. އަދި ވިދާޅުވީ ރައްޔިތުންނަށް މުދާ ލިބުމުގައި ދަތިނުވެ ލިބޭނެ އިންތިޒާމު ހަމަޖެހިފައިވާ ކަމަށެވެ.
