މިއަހަރުގެ އޭޕްރީލް މަހުގެ ނިޔަލަށް ރާއްޖެއަށް ބާރަ ބިލިއަން ރުފިޔާގެ މުދާ އެތެރެ ކުރެވިފައިވާ ކަމަށް މޯލްޑިވްސް ކަސްޓަމްސް ސަރވިސްއިން ބުނެފިއެވެ.

ބުދަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފް ކަސްޓަމްސް ޢަބްދުﷲ ނާޝިދު ވިދާޅުވީ ކޮވިޑް-19އާ ގުޅިގެން ދަތުރުފަތުރު ކުރުމާއި، ބައިނަލްއަޤުވާމީ ވިޔަފާރިތަކަށް ހީނަރުކަމެއް އައިސްފައިވާ ކަމަށެވެ.

ނާޝިދު ވިދާޅުވީ ރާއްޖޭގެ އިންޕޯޓް އެކްސްޕޯޓަށް ވެސް ކޮންވެސް ވަރެއްގެ ހީނަރުކަމެއް އަންނާނެ ކަމަށް ޤަބޫލުކުރަންޖެހޭ ކަމަށެވެ. ނަމަވެސް މިއަހަރުގެ އޭޕްރީލްގެ ނިޔަލަށް ރާއްޖެއަށް ބާރަ ބިލިއަން ރުފިޔާގެ މުދާ އެތެރެ ކުރެވިފައިވާ ކަމަށާއި، އިންޕޯޓު ޑިއުޓީގެ ގޮތުގައި އެއްމިލިއަން ރުފިޔާއަށްވުރެ ގިނަ ފައިސާ ލިބިފައިވާ ކަމަށް ނާޝިދު ވިދާޅުވިއެވެ.

ދިވެހިރާއްޖެއަށް އެތެރެ ކުރެވޭ މުދަލަށް އިޝާރާތް ކުރައްވާ ނާޝިދު ވިދާޅުވީ މުދާ އެތެރެ ކުރެވޭ މިންވަރު ދަށް ކަމަށް ބެލުނުކަމުގައި ވިޔަސް ޢާންމުކޮށް ބޭނުން ކުރާ ކާބޯތަކެތީގެ އިންޕޯޓު ޑިިއުޓީ ފާއިތުވެދިޔަ އަހަރުގެ މިމުއްދަތާ އަޅާ ބަލާއިރު އެއްވަރަކަށް ހިފެހެއްޓިފައިވާ ކަމަށެވެ. އަދި ބައެއް ބާވަތްތަކުން އިތުރުވެފައިވާކަން ނާޝިދު ފާހަގަކުރެއްވިއެވެ.

އެގޮތުން 456 މިލިއަން ރުފިޔާގެ މަހުގެ ބާވަތްތައް، 597 މިލިއަން ރުފިޔާގެ ތަރުކާރީ ބާވަތްތައް އެތެރެކުރެވިފައިވާ ކަމަށް ނާޝިދު ވިދާޅުވިއެވެ.

ނާޝިދު ވިދާޅުވީ އިމްޕޯޓު އެންމެ ދަށްވެފައިވާ ބާވަތްތަކުގެ ތެރޭގައި ހިމެނެނީ ރަލާއި، އޫރުމަސް ފަދަ ތަކެތި ކަމަށެވެ. އަދި ވިދާޅުވީ މިވިޔަފާރިއަކީ ޓޫރިޒަމަށް ބަރޯސާވެފައިވާ ވިޔާފާރިއެއް ކަމަށާއި، ޓޫރިޒަމް ހުއްޓުމަކަށް އައިސްފައިވާ މިދަނޑިވަޅުގައި ވަރަށް ބޮޑުތަނުން ދަށްވެގެންދާނެ ކަމަށެވެ،