ރާއްޖޭގެ ހުރިހާ ހިސާބަކުން ސާމްޕަލްތައް ނެނގޭނެ އިންތިޒާމު ވަނީ ހަމަޖައްސާފައި: އެންއީއޯސީ
6 މެއި 2020 | ބުދަ 09:53ކޮންމެ ދުވަހަކު އަތޮޅުތެރޭގެ ރަށްރަށުން ސާންޕަލްތައް ނަގާ
ނޫސްވެރިންގެ ބައްދަލުވުމުގެ ތެރެއިން ޓާސްކްފޯހުގެ ތަރުޖަމާނު މަބްރޫކު އަޒީޒް
ރާއްޖޭގެ ހުރިހާ ރަށެއްގައި ކޮވިޑް-19ށް ސާމްޕަލް ނެނގޭނެ އިންތިޒާމު ހަމަޖެހިފައިވާ ކަމަށް ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) އިން ބުނެފިއެވެ.
އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވީ އަތޮޅު ތެރެއިން މިހާރު ވެސް ސާމްޕަލްތައް ނެގޭނެ ނިޒާމުތައް ހަމަޖެހިފައިވާ ކަމަށާއި، ކޮންމެ ދުވަހަކު ވެސް އަތޮޅުގެ ރަށްރަށުން ސާމްޕަލްތައް ނަގަމުން އަންނަކަމަށެވެ. އަދި އެސާމްޕަލްތައް ނެގުމަށްފަހު، މާލެއަށް ގެނެސް ޓެސްޓު ކުރުމުގެ މަސައްކަތްތައް ކުރާކަން މަބްރޫކް ފާހަގަކުރެއްވިއެވެ.
މަބްރޫކް ވިދާޅުވީ އަތޮޅުތެރޭގެ ރަށްރަށުގެ ޙާލަތު ވެސް ވަރަށް ގާތުން މޮނީޓަރ ކުރަމުންދާ ކަމަށާއި، އެރަށްރަށުގެ ރައްޔިތުންގެ ސަލާމަތާ ރައްކާތެރިކަމަށް ފިޔަވަޅުތައް އަޅަމުންދާ ކަމަށެވެ.
ރާއްޖޭގެ ހުރިހާ ހިސާބެއްގައި ކޮވިޑް-19އަށް ސާމްޕަލް ނެގުމުގެ އިންތިޒާމު ހަމަޖެހިފައިވާކަން ފާހަގަކުރައްވައި މަބްރޫކް ވިދާޅުވީ އަންގާރަ ދުވަހު އެކަނި ވެސް ގިނަ ރަށްރަށުން ސާންޕަލްތައް ނަގާފައިވާ ކަމަށެވެ.
އެގޮތުން ތަކަންދޫގައި 33 ސާމްޕަލެއް، ނަރުދޫން 11 ސާމްޕަލެއް، އުލިގަމުން ސާމްޕަލެއް، ފިނޭއިން ސާމްޕަލެއް ނަގާފައިވާ ކަމަށެވެ. މީގެއިތުރުން، ކެންދޫ، ނ. އަތޮޅު ހޮސްޕިޓަލް، ބިލެއްފަހި، މާއުނގޫދޫ އަދި ތުލުސްދޫންވެސް ސާމްޕަލްތައް ނަގާފައިވާކަމަށް ވިދާޅުވިއެވެ.
