ހުޅުމާލޭގައި ހުރި ބައެއް ކޮންސްޓްރަކްޝަން ސައިޓްތަކުގައި އަލުން މަސައްކަތް ފެށުމުގެ ހުއްދަ ދެނީ

ކޮވިޑް-19 އާއި ގުޅިގެން މާލެސިޓީގައި ލޮކްޑައުން އިއުލާނު ކުރުމުގެ ކުރިން ހުޅުމާލޭގައި ފަށާފައި ހުރި ކޮންސްޓްރަކްޝަން މަސައްކަތް އަލުން ފެށުމަށް ހުއްދަ ދޫކުރުމަށް ނިންމާފައިވާކަމަށް ހައުސިންގް ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފި އެވެ.

މިކަމާއި ގުޅިގެން އެޗްޑީސީން ކޮށްފައިވާ އިއުލާނެއްގައި ބުނެފަައިވަނީ، 1 މެއި 2020 ވަނަ ދުވަހު ހެލްތް ޕްރޮޓެކްޝަން އެޖެންސީން އާންމުކޮށްފައިވާ ސަރކިއުލަރ އިން ކޮވިޑް-19 އާ ގުޅިގެން ލޮކްޑައުން ހާލަތަށް އައުމުގެ ކުރިން ފަށާފައި ހުރި ކޮންސްޓްރަކްޝަން މަސައްކަތްތައް ކުރިއަށް ގެންދިއުމުގެ ހުއްދަ ދީފައިވާކަމަށާއި އެ ކުންފުނިން ދޫކުރަމުންދާ މުނިސިޕަލް ހުއްދަތައް، ކުރެހުން ފާސްކުރުން ހިމެނޭގޮތަށް ދޫކުރުމަށް ހަމަޖެހިފައިވާކަމަށެވެ.

އެޗްޑިސީން ވަނީ، ލޮކްޑައުން ހާލަތަށް އައުމުގެ ކުރިން ހުޅުމާލޭގައި ފަށާފައި ހުރި ކޮންސްޓްރަކްޝަން މަސައްކަތްތައް ކުރިއަށް ގެންދިއުމަށް ބޭނުންވާ ފަރާތްތަކުން އީމެއިލް މެދުވެރިކޮށް (inspectors@hdc.com.mv, buildingcontrol@hdc.com.mv ,municipal@hdc.com.mv) ހުށަހަޅައި ހުއްދަ ހޯދުމަށް އެދިފަ އެވެ.

ކޮވިޑް-19 އާ ގުޅިގެން މާލެ ސިޓީ ލޮކްޑައުންކޮށް މާލެ ސިޓީގައި ރެޑް އެލާރޓް އިއުލާންކުރުމާއި ގުޅިގެން މަގުމައްޗަށް ނިކުމެ އުޅުމާއި މީހުން އެއްވެ އުޅުން ވަނީ މަނާކޮށްފަ އެވެ. މިކަމުގެ ސަބަބުން ގިނަ މަސައްކަތްތައް ހުއްޓި ގިނަ ވިޔަފާރިތަކަށް ބޮޑެތި އަދަދުތަކުން ގެއްލުންވާކަން ވިޔަފާރިވެރިންވެސް ވަނީ ފާހަގަކުރަމުންނެވެ. އަދި މިކަމުގެ ސަބަބުން އެންމެ ބޮޑަށް ގެއްލުންވާ އެއް ދާއިރާއަކީ އިމާރާތްކުރުމުގެ މަސައްކަތް ކުރާ ދާއިރާ އެވެ.