ކުރިއަށް އޮތް ދެހަފްތާގައި ބޭރުގައި ތިބި ދަރިވަރުން ގެނައުމަށް ފްލައިޓެއް ނުބޭއްވި ހިނގާދާނެ: މަބްރޫކް
5 މެއި 2020 | އަންގާރަ 20:03ކުރިއަށް އޮތް ދެހަފްތާ މާލެއަށް އައުމަކީ ރަޢްކާތެރި ގޮތެއް ނޫން
މީގެ ކުރިން ވެސް ގިނަ ދިވެހިން ރާއްޖެއަށް ގެނެސްދީފައިވާކަން ތަރުޖަމާނު މަބްރޫކު ފާހަގަކުރައްވާފައިވޭ
ރާއްޖެއިން ބޭރުގައި ތިބި ކިޔަވާ ދަރިވަރުންގެ ތެރެއިން ރާއްޖެއަށް އަންނަން ބޭނުންވާ ކުދިން ގެނައުމުގެ މަސައްކަތް ކުރަމުންދާ ކަމަށާއި، ނަމަވެސް ކުރިއަށް އޮތް ދެހަފްތާގެ ތެރޭގައި ފްލައިޓެއް ނުބޭއްވި ހިނގާދާނެ ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވެއްޖެއެވެ.
އަންގާރަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ގިނަ އަދަދެއްގެ ދަރިވަރުން ރާއްޖެއިން ބޭރުގައި ކިޔަވަމުންދާ ކަމަށާއި، އަންނަން ބޭނުންވާ ދަރިވަރުން ގެނައުމުގެ މަސައްކަތް ފޮރިން މިނިސްޓްރީއާއެކު ކުރަމުންދާ ކަމަށެވެ.
ނަމަވެސް ކުރިއަށް އޮތް ދެހަފްތާއަކީ މާލެސިޓީއަށް އެންމެ ބިރުވެރި ދެހަފްތާ ކަމަށާއި، މިދުވަސްވަރު މާލެއައުމަކީ އެންމެ ރައްކާތެރި ގޮތް ނޫން ކަމަށެވެ. އަދި މިދެހަފްތާގައި ބޭރުގެ ގައުމަކުން ދަރިވަރުން ގެނައުމަށް ފްލައިޓެއް ނުބޭއްވި ހިނގާދާނެ ކަމަށް މަބްރޫކް ވިދާޅުވިއެވެ.
ބެލަރޫސްގައި ކިޔަންވަން ތިބި ދަރިވަރުންނަށް އަލިއަޅުއްވާލައްވާ މަބްރޫކް ވިދާޅުވީ އެގައުމުގައި ޖުމްލަ 139 ދަރިވަރަކު ތައުލީމް ހާސިލް ކުރަމުންދާ ކަމަށެވެ. އަދި ރާއްޖެއަށް އަންނަން ބޭނުންވާ ދަރިވަރުންގެ ލިސްޓް ހެދުމުގެ މަސައްކަތް ކުރަމުންދާކަން މަބްރޫކް ފާހަގަކުރެއްވިއެވެ.
ކޮވިޑް-19އާ ގުޅިގެން ހާލުގައި ޖެހުނު ނުވަތަ ދަތިތައް ކުރިމަތިވި ގިނަ އަދަދެއްގެ ދިވެހިން ވަނީ ރާއްޖެއަށް ގެނެސްދީފައެވެ. އެގޮތުން ލަންކާ، އިންޑިއާ، މެލޭޝިއާ ގައުމުތަކުން ދިވެހިން ރާއްޖެއަށް ގެނެސްފައިވެއެވެ. މީގެ ތެރޭގައި ބޭސް ފަރުވާއަށް ގޮސް އުޅުނު ދިވެހިން ވެސް ހިމެނެވެ.
