ނ. އަތޮޅުގައި އީއޯސީ އެއް ޤާއިމްކުރަން ހުށަހެޅި ޤަރާރަށް އަތޮޅު ކައުންސިލުގެ ތާއީދެއް ނުލިބުނު
5 މެއި 2020 | އަންގާރަ 18:17ޤަރާރު ހުށަހަޅާފައިވަނީ އަންގާރަ ދުވަހު
ނ. މަނަދޫ
ނ. އަތޮޅުގައި އިމަޖެންސީ އޮޕަރޭޝަން ސެންޓަރެއް ޤާއިމް ކުރުމަށް ހުށަހެޅި ޤަރާރު ފާސް ނުވާކަމަށް އެ އަތޮޅު ކައުންސިލުން ނިންމައިފި އެވެ.
މި ޤާރާރު ހުށަހަޅުއްވާފައިވަނީ ކެނދިކުޅުދޫ ދާއިރާގެ އަތޮޅު ކައުންސިލް މެންބަރު ވާސިފް އަހުމަދު އެވެ. އޭނާ ހުށަހެޅުއްވި ޤަރާރުގައި، ނ. އަތޮޅުގެ ގިނަ ރަށްތަކެއް މޮނިޓަރިންގެ ހާލަތުގައި އޮތްކަން ވަނީ ފާހަގަ ކުރައްވާފަ އެވެ.
މީގެ އިތުރުން ކާބޯތަކެއްޗާއި، ބޭހާއި ތެލާ މި ނޫންވެސް އެތަށް ޒަރޫރީ ތަކެއްޗެއް ރަށްތަކަށް ގެންދިއުމަށް ދަތިވެ، ވަޒީފާއިން އެތަށް ބަޔެއް ވަކިކޮށް، އަތޮޅުގެ ގިނަ އަދަދެއްގެ ރައްޔިތުން މާލޭގައި ތާށިވެ، އިގުތިސާދީ ގޮތުން ކުރަމުން އައި މަސައްކަތްތައް ހުއްޓި ދިރިއުޅުން ދަތިވެފައިވާތީ ރައްޔިތުންގެ ކަންބޮޑުވުންތަކަށް ކޮންމެސް މިންވަރެއްގެ ތަސައްލީއެއް ހޯދައިދިނުނުގެ ނިޔަތުގައި އަތޮޅަށް ނިސްބަތްވާ މަޖިލިސް މެންބަރުންނާއި، މި މަސައްކަތުގައި ހިލޭ ސާބަހަށް މަސައްކަތްކޮށްދެއްވަން ތައްޔާރަށް ތިއްބެވި ފަރާތްތައް އެކުލެވޭ ގޮތުން އަތޮޅު އެމެޖެންސީ އޮޕަރޭޝަން ސެންޓަރެއް ގާއިމުކޮށްދެއްވުމަށް އެދޭ ކަމަށެވެ.
މި ޤަރާރާއި ގުޅޭ ގޮތުން ރާއްޖެ އެމްވީއަށް މައުލޫމާތު ދެއްވަމުން ވާސިފް ވިދާޅުވީ ޤަރާރު ހުށަހެޅުއްވުމުގެ ކުރިން ނ. އަތޮޅުގެ ކައުންސިލް މެންބަރުންނާއި ނ. އަތޮޅަށް ނިސްބަތްވާ ރައްޔިތުންގެ މަޖިލީހުގެ މެންބަރުންގެ ތެރެއިން ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގާއި، މަނަދޫ ދާއިރާގެ މެންބަރު ހާރޫން ރަޝީދު އަދި ކެންދިކުޅުދޫ ދާއިރާގެ މެންބަރު އަހުމަދު އީސާ ހިމެނޭ ގޮތަށް މަޝްވަރާ ބައްދަލުވުމެއް ކުރިއަށް ގެންގޮސްފައިވާ ކަމަށެވެ.
އަދި އެ ޤަރާރު ހުށަހެޅުއްވީ ދާއިރާގެ މަޖިލިސް މެންބަރުންގެ ތާއީދާއި އެކުގައި ކަމަށް އޭނާ ވިދާޅުވިއެވެ. ނަމަވެސް އޯޑިއޯ ކޮންފަރެންސް މެދުވެރިކޮށް އަންގާރަ ދުވަހު ބޭއްވި ކައުންސިލްބައްދަލުވުމުގައި ވޯޓްގައި ބައިވެރި ގިނަ މެންބަރުންގެ ވޯޓް ނުފެންނަކަމަށް ދެއްވާފައިވާތީ އެ ޤަރާރު
ފާސްނުވާކަމަށް އަތޮޅު ކައުންސިލްގެ ރައީސް އަލީ ޒާފިރު ނިންމަވާފައިވާ ކަަމަށް އޭނާ ވިދާޅުވިއެވެ.
މި ޤަރާރާއި ގުޅޭ ގޮތުން ރާއްޖެ އެމްވީއަށް މައުލޫމާތު ދެއްވަމުން ކެނދުކުޅުދޫ ދާއިރާގެ މެންބަރު އަހުމަދު އީސާ ވިދާޅުވީ މި ދަނޑިވަޅަކީ ނ. އަތޮޅުގެ ރައްޔިތުންނަށް ދަތި އުނދަގޫ ދަނޑިވަޅެއް ކަމަށާއި ހެލްތް ސެންޓަރުތަކަށް ބޭނުންވާ ސިއްޚީ އާލާތްތަކާއި ރައްޔިތުންނަށް ކާބޯތަކެތި ފަސޭހައިން ލިބިދޭނެ އިންތިޒާމް ހަމަޖެއްސުމާއި މާލެގައި ތާށިވެފައި ތިބި އަތޮޅުގެ ރައްޔިތުންނަށް ރަށަށް ދެވޭނެ އިންތިޒާމް ހަމަޖައްސުމާއި ވަޒީފާ ގެއްލިފައި ތިބި ދާއިރާގެ ރައްޔިތުންނަށް މާލީ އެހީތެރިކަން ފޯރުކޮށްދިނުމަށް ދާއިރާގެ މެންބަރުންނާއި އަދި އަތޮޅުގައި ހިންގާ ރިސޯޓްތަކާއި އެހެނިހެންވެސް ވިޔަފާރިވެރިންނާއި ޖަމުއިއްޔާ ޖަމާޢަތްތަކުގެ އެހީ ހޯދުމަށް އެކުގައި މަސައްކަތް ކުރުމަށް އަތޮޅުގައި އިމަޖެންސީ ސެންޓަރެއް އުފެއްދުމަކީ ވަރަށް މުހިއްމު ކަމެއް ކަމަށެވެ.
ރައީސުލް ޖުމްހޫރިއްޔާއަށް ލިބިލައްވާފައިވާ ހުރިހާ ބާރުތަކެއް ޑިރެކްޓަރ ޖެނެރަލް އޮފް ޕަބްލިކް ހެ،ލްތަށް ދެއްވަވައިގެން ސަރުކާރުންވެސް މަސައްކަތް ކުރައްވަމުން ގެންދަވާކަން ފާހަގަ ކުރައްވާ އީސަ ވިދާޅުވީ އަތޮޅު ކައުންސިލުންވެސް އެބޭފުޅުންނަށް ލިބިދީފައިވާ ބާރުތަކުގެ ބޭނުން ނަހަމަ ގޮތުގައި ނުހިއްޕަވާ ރައްޔިތިންގެ ލާބަޔާ މަންފާއަށް މަސައްކަތް ކުރެއްވުމަކީ ވަރަށް މުހިއްމު ކަމެއް ކަމަށެވެ. އަދި އެ ޤަރާރު ފާސް ނުވުމަކީ ވަރަށް ހިތާމަ ކުރައްވާ ކަމެއް ކަަމަށް އީސަ ވިދާޅުވިއެވެ.
